Syoni akaaja kaa Kyala
Ʉlwɨmbo ʉlwa Banya Koola.
48
ɄNTWA jo nkʉlʉmba, jo gwa kʉtuufigwa fiijo,nkaaja kaa Kyala gwɨtʉ, pa kyamba kyake ɨkiikemo.
2 Ɨkyamba Syoni kɨfyʉkile kanunu fiijo,
kikʉtwala ʉlʉsekelo pakiisʉ.
Kyo kyamba ɨkiikemo ʉkʉfikɨnda fyosa,
kaaja kaa Malafyale ʉnkʉlʉmba.
3 Kyala alɨ mu nyumba syake ɨsya kɨtangaalala,
amanyiigwe ʉkʉtɨ lyo ilinga lya kʉponelamo.
4 Abanyafyale bo babʉngeene,
balɨnkwisa kʉkʉkakoma akaaja.
5 Looli bo bakabwene balɨnkʉtiila,
balɨnkʉkoligwa nʉ lʉtende,
balɨnkwenda nʉ kʉbopa.
6 Balɨnkʉtetema fiijo,
balɨnkʉbabigwa fiijo,
bo ʉlwa nkiikʉlʉ ʉjʉ alɨ kɨfuki ʉkʉpaapa.
7 Balɨnkʉfwana bo ʉlwa sitima ɨsya mu Talisisi,
ɨsi sikʉpangʉligwa nʉ mbelo ʉgwa kʉ bʉsookelo.
8 Syosa ɨsi tʉpɨliike twikeetiile,
nkaaja akaa NTWA gwa filʉndɨlo,
nkaaja akaa Kyala gwɨtʉ,
aka akakasiisye ʉkʉjako bwila na bwila. Sela
9 Gwe Kyala, tukʉliinogona iipyana lyako,
bo tʉlɨ mu tempeli jaako.
10 Ɨngamu jaako jikʉtuufigwa kʉkʉtɨ bʉjo,
ɨnduufyo syako sibalaniile pakiisʉ poosa,
paapo kʉlagɨla kʉ bʉgolofu.
11 Abandʉ abaa mu Syoni basekelege,
ʉtwaja ʉtwa mu Juuta tʉsaniege,
kʉnongwa jaa kʉlonga kʉ bʉgolofu.
12 Mwendege mu Syoni,
mukakasyʉngʉʉtɨle akaaja,
mufibale ɨfisonge fyake.
13 Mugakeetege amamato gaake,
mugeeneesye amalinga gaake,
ʉkʉtɨ mwise mubapangɨlege,
abandʉ baa mu sopelo ɨsi sikwisa.
14 Namanga bo alɨ Kyala, Kyala gwɨtʉ.
Bwila na bwila jo ikʉtʉlongosyaga.