Ʉndagɨli ʉnkʉlʉmba
Kʉ mpaali gwa lwɨmbo. Ʉlwɨmbo ʉlwa Banya Koola.
47
Mwe bandʉ mwesa, mukome amanja,mummwɨmbɨle Kyala na koogo kaa lʉsekelo.
2 Namanga ɄNTWA ʉNkʉlʉmba nsisya,
ʉmwene jo Malafyale ʉNkʉlʉmba gwa kiisʉ kyosa.
3 Atʉpeele ʉbʉtoli kʉ fikolo ɨfingi,
ababɨɨkile abandʉ paasi pa malʉndɨ gɨɨtʉ.
4 Atʉsaliile ɨkiisʉ ɨkɨ ʉkʉja kɨlɨngo kyɨtʉ,
ɨkɨ bikʉmogela abaa ndʉjungu lwa Jaakobo,
ʉjʉ abaganile. Sela
5 Kyala afyʉkile na koogo akaa lʉsekelo,
ɄNTWA afyʉkile bo sikʉlɨla ɨngangabwite.
6 Mummwɨmbɨle Kyala ɨnduufyo, mummwɨmbɨle!
Mummwɨmbɨle ʉmalafyale gwɨtʉ ɨnduufyo, mummwɨmbɨle!
7 Namanga Kyala jo Malafyale gwa kiisʉ kyosa,
mumpaalege.
8 Kyala jo ndagɨli gwa fikolo fyosa,
atʉʉgeele pa kɨkota kyake ɨkya bʉtwa ɨkiikemo.
9 Abalongosi baa bandʉ bikʉbʉngaana,
bikʉbʉʉka pamopeene na bandʉ baa Kyala gwa Abulahamu.
Namanga abalagɨli baa pakiisʉ balɨ paasi paa Kyala,
ʉjʉ ikwɨmɨkigwa fiijo.