Kyala alɨ pamopeene na nuuswe
Kʉ mpaali gwa lwɨmbo. Ʉlwɨmbo ʉlwa Banya Koola. Ʉlwɨmbo lwa kwɨmba abalɨndwana.
46
Kyala jo bʉbopelo bwɨtʉ, kangɨ jo maka gɨɨtʉ.Ʉmwene bwila jo bʉtʉʉli bwɨtʉ mbʉtolwe.
2 Fyobeene tʉtikʉtiilaga nafimo,
nalɨnga ɨkiisʉ kikʉsenyendeka,
nɨ fyamba fikʉgwɨla mu nyanja,
3 nalɨnga amɨɨsi gaa mu nyanja gikoobela nʉ kʉsambʉka,
na majɨga amakalɨ gikʉjʉgɨɨsya ɨfyamba. Sela
4 Lʉlipo ʉlwɨsi ʉlʉ lukʉtwala ʉlʉsekelo nkaaja kaa Kyala,
pabʉjo ʉbwikemo ʉbwa Kyala ʉNkʉlʉmba.
5 Kyala alimo nkaaja ako, kakabagɨla ʉkʉpyutigwa.
Kyala aikʉkatʉʉla kʉbʉkye.
6 Ɨfikolo ɨfingi fikaleele, ʉbʉnyafyale bukʉjʉgɨla,
Kyala ikʉtajanika, ɨkiisʉ kikwengʉka.
7 ɄNTWA gwa filʉndɨlo alɨ pamopeene na nuuswe,
Kyala gwa Jaakobo bo bʉponelo bwɨtʉ. Sela
8 Isaga mukeete ɨmbombo sya NTWA,
muno atwaliile ʉlʉpyuto nkiisʉ.
9 Kyala jo ʉjʉ ikwɨmɨka ʉbwite pakiisʉ,
ikʉkonyolania ʉbʉpɨnde nɨ ngwego,
ikʉkosya ɨngʉlʉ mmooto.
10 Ikʉtɨ, “Namuleke ʉbwite, namusyaganie ʉkʉtɨ ne Kyala,
ʉne ngwɨmɨkigwa mfikolo fyosa,
ʉne ngʉtuufigwa pakiisʉ.”
11 ɄNTWA gwa filʉndɨlo alɨ pamopeene na nuuswe,
Kyala gwa Jaakobo jo bʉponelo bwɨtʉ. Sela