Ʉlwɨmbo lwa bʉnyafyale ʉlwa pa bwegi
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Amajɨbɨjɨbɨ. Ʉlwɨmbo ʉlwa mahala ʉlwa Banya Koola. Ʉlwɨmbo lwa pa bwegi.
45
Ɨndumbula jangʉ jiiswile amasyʉ amanunu,angʉmmwɨmbɨla ʉmalafyale ʉlwɨmbo.
Ʉlʉlɨmi lwangʉ, lʉlɨ bo ʉlwa simbɨlo,
jaa nsimbi ʉnnunu.
Amasyʉ kʉ malafyale
2 Ʉgwe ʉlɨ nnunu ʉkʉbakɨnda abandʉ boosa,
mmilomo gyako likʉsooka ɨliipyana.
Kyala akʉsajile bwila na bwila.
3 Gwe ngaasi, gwipinye ʉlʉʉbo lwako mu nsana,
ʉbʉsisya nʉ bʉnunu fyako ʉgwe.
4 Ʉkabe ʉbʉtoli mbʉsisya na mbʉnoge bwako,
ʉbʉlwɨlege ʉbwanalooli nʉ bʉgolofu.
Amaka gaako gabombe ɨmbombo ɨngʉlʉmba.
5 Ɨmitipʉlo gyako myʉgi,
gɨsilase ɨndumbula sya balʉgʉ baako,
fyope ɨfikolo fyosa fikʉgwa paasi pamyako.
6 Ʉgwe gwe Kyala, ɨkɨkota kyako ɨkya bʉtwa,
kikʉjako bwila na bwila.
Ʉbʉnyafyale bwako,
bʉnyafyale bwa bʉgolofu.
7 Ʉgwe ʉbʉganile ʉbʉgolofu,
nʉ kʉsibenga ɨmbiibi syosa.
Po leelo Kyala, Kyala gwako, akʉpakile amafuta,
agaa kʉja nʉ lʉsekelo,
ʉkʉkʉbɨɨka ʉkʉja nkʉlʉmba,
ʉkʉbakɨnda abanino boosa.a
8 Ɨmyenda gyako gikʉsoosya ʉlʉʉma ʉlʉnunu,
ʉlwa mafuta, ʉnkota nʉ ndalasini.
Abakʉba fisango bikʉkʉsekeesya,
mu nyumba ɨsya kɨtangaalala,
ɨsi sinosiigwe nɨ mbembe ɨsya sofu.
9 Abalenga balipo pakʉkwambɨlɨla,
joope ʉmwehe ʉjʉ kʉja pakwega ɨɨmile kʉ kiilɨɨlo kyako,
iinosiisye ʉtʉndʉ ʉtwa sahabʉ ɨjaa mu Ofili.
Amasyʉ kʉ ndɨndwana ʉjʉ ikwegigwa
10 Gwe ndɨndwana ʉgwe, ʉpɨlɨkɨsye,
ʉtege ɨmbʉlʉkʉtʉ jaako,
ʉbiibwe abaa kʉmyɨnu na bakamugo.
11 Ʉbʉnunu bwako bʉnkyele ʉmalafyale,
ʉmwene jo ntwa gwako, ʉmmwɨmɨkege.
12 Abandʉ abaa mu Tili aabikʉkʉtwalɨla ɨfya kʉsekeesya,
abandʉ abaa kyʉma kingi bikʉlondaga ʉbʉkʉndwe kʉmyako.
13 Ʉndenga ʉjʉ ikwegigwa ikwingɨla, nnunu fiijo,
ʉmwenda gwake ʉgwa bwegi, gʉlɨ nʉ bʉʉsi ʉbwa sahabʉ.
14 Afwele ʉmwenda ʉnnunu, bikʉntwala kʉ malafyale,
alongoseenie na balɨndwana aba bikʉnsindɨkɨla.
15 Bikwisa nʉ lʉsekelo ʉlʉkʉlʉmba,
bikwingɨla nkɨtangaalala.
Ʉlʉsajo pa bwegi
16 Abaanaako abalʉmyana bikwisa kʉjaga banyafyale bo ʉlwa biisʉkʉlʉgo,
kwisa kʉbabɨɨka ʉkʉja balagɨli nkiisʉ kyosa.
17 Ɨngamu jaako angʉjɨpela ʉkʉja fumuke mu sopelo syosa,
fyope ɨfikolo fikʉkʉtuufyaga bwila na bwila.