Ʉlwipuuto lwa kʉsʉʉma ʉbʉtʉʉli
Kʉ mpaali gwa lwɨmbo. Ʉlwɨmbo ʉlwa mahala ʉlwa Banya Koola.
44
Gwe Kyala, tʉpɨliike nɨ mbʉlʉkʉtʉ syɨtʉ,ɨsi batʉbʉʉlile abiisʉkʉlʉ bɨɨtʉ,
ɨmbombo ɨsi gwabombile mmasikʉ gaabo agaa ijolo.
2 Ʉgwe gwafikagile ɨfikolo ɨfya bandʉ,
ʉlɨnkʉbatʉʉgasyamo abiisʉkʉlʉ bɨɨtʉ.
Ʉgwe gwabafundile abandʉ aba baalimo nkiisʉ,
looli abiisʉkʉlʉ bɨɨtʉ ʉlɨnkʉbapa ʉbʉnoge.
3 Bakaakɨtolile ɨkiisʉ kʉ nyʉʉbo syabo,
pamo kʉ maka gaabo.
Baakɨtolile kʉ maka gaako amakʉlʉmba,
kʉ lʉmuli lwako ʉlʉsisya,
paapo gwaliikyeliile nabo.
4 Ʉgwe gwe Malafyale gwangʉ, kangɨ gwe Kyala gwangʉ,
ʉtwale ʉbʉtoli kʉmyɨtʉ twe baa ndʉjungu lwa Jaakobo.
5 Aatukʉbatola abalʉgʉ bɨɨtʉ kʉ maka gaako,
mu ngamu jaako aatukʉbakanyangania aba bikʉtʉpɨnga.
6 Namanga ndikʉsʉʉbɨla ʉbʉpɨnde bwangʉ,
loope ʉlʉʉbo lwangʉ lʉkabagɨla ʉkʉmboka.
7 Looli jo ʉgwe kʉtʉpoka kʉ balʉgʉ bɨɨtʉ,
kʉbasʉʉsya aba batʉbengile.
8 Akabalɨlo koosa tukwituukɨfya ʉgwe gwe Kyala,
tukʉkʉgwɨlaga ʉlʉpi bwila na bwila. Sela
9 Leelo ʉtʉtaagile, ʉtʉsʉʉsiisye,
ʉtikʉbʉʉka pamopeene na nuuswe kʉ bwite.
10 Ʉtʉpelile ʉkʉbabopa abalʉgʉ bɨɨtʉ,
aba bikʉtʉpɨnga bapʉpile ɨkyʉma kyɨtʉ.
11 Ʉtʉlekile ʉkʉbooligwa bo ʉlwa ngʼoosi,
ʉtʉbaleenie mfikolo ɨfingi.
12 Ʉtʉʉliisye twe bandʉ baako kʉ ntengo ʉgwa paasi,
ʉkakabamo nafimo.
13 Ʉtʉpelile ʉkʉsekigwa kʉ bapalamani bɨɨtʉ,
bikʉtoobela nʉ kʉtʉʉgɨɨlɨla.
14 Ʉtʉpelile ʉkʉfujuligwa na bandʉ abaa mfikolo ɨfingi,
bikʉjʉngaania ɨmitʉ gyabo.
15 Nsʉʉkile pakɨlo na pamuusi,
ndɨ soni ndʉpʉ kʉmaaso,
16 kʉnongwa jaa masyʉ gaa kyʉgɨɨla na maheelu,
namanga abalʉgʉ bikʉlonda ʉkʉʉmbukɨsya ɨmbiibi.
17 Syosa ɨsyo sitwagile ʉswe,
na paapo tʉkakwibwa ʉgwe,
kangɨ tʉkoomolapo ʉlwitɨkano lwako.
18 Tʉkakʉsambʉkɨlapo ʉgwe,
pamo ʉkʉjɨleka ɨnjɨla jaako.
19 Looli poope ʉgwe ʉtʉtakeenie,
ʉtʉlekile mbʉjo bwa tʉmbwe,
ʉtʉkupɨkiile nɨ ngiisi jaa bʉfwe.
20 Lɨnga twakwibiibwe, ʉgwe gwe Kyala gwɨtʉ,
pamo twaliipuutile kwa lyakyala,
21 gwe Kyala, ngalɨ ʉsyageenie ɨsyo,
paapo ʉgwe ʉsimeenye ɨsya mbʉtiitʉ ɨsya mu ndumbula.
22 Looli amasikʉ goosa tukʉgogigwa,
paapo tukʉkʉbombela ʉgwe.
Ʉswe tukʉbombeligwa kabiibi,
bo ʉlwa ngʼoosi ɨsya kʉbooligwa.a
23 Gwe Ntwa, lembʉka! Keeta ʉgonile ʉtʉlo?
Sumuka! Ʉlɨngatʉtaaga bwila na bwila!
24 Fiki ʉtikʉtʉkeeta?
Kwibwa fiki ʉbʉtolwe nɨ ngʉbɨlo syɨtʉ?
25 Tʉgwɨliile paasi pa mfu,
ɨmibɨlɨ gyɨtʉ gikʉlambalala pa fumbɨ.
26 Gwɨme, ʉtʉtʉʉle,
ʉtʉpoke kwi ipyana lyako.