Ʉbʉtʉlanongwa bwa bandʉ
Kʉ mpaali gwa lwɨmbo. Ʉlwɨmbo ʉlwa Ndaabɨti.
14
Ʉnkonyofu ikʉjoba mu ndumbula ikʉtɨ,“Akajako Kyala.”
Boonangiike boosa, bikʉbomba ɨnyali,
akajako najʉmo ʉjʉ ikʉbomba ɨnunu.
2 Ʉkʉfuma kʉmwanya ɄNTWA ikʉbakeeta abandʉ,
ʉkʉtɨ akeete lɨnga alipo jʉmo ʉgwa mahala,
ʉjʉ ikʉnndonda Kyala.
3 Abandʉ boosa balekile ʉkʉntiila Kyala,
boonangiike akajɨɨlo kaabo.
Akajako najʉmo ʉjʉ ikʉbomba ɨnunu,
akajako najʉmo.a
4 Bʉle, ababomba mbiibi batikʉsyagania?
Bikʉbalya abandʉ bangʉ ngatɨ fisyesye,
balekile ʉkʉmmwipuuta ɄNTWA.
5 Apa po apa abatʉlanongwa, bikʉkoligwa nʉ lʉtende,
namanga Kyala alɨ pamopeene na bagolofu.
6 Mwe baniongafu, mukoonanga ɨsi babaatiike aboonywa,
looli ɄNTWA jo bʉbopelo bwabo.
7 Ʉbʉpoki bwa Isilaɨli lɨnga bwisaga,
ʉkʉfuma nkyamba Syoni.
ɄNTWA bo ikʉbagomokesya ɨsajo abandʉ baake,
abaa ndʉjungu lwa Jaakobo aabikʉsekelaga,
aBanyaisilaɨli aabikʉhobokaga.