Ʉlwɨmbo lwa lʉtuufyo
Kʉ mpaali gwa lwɨmbo. Ʉlwɨmbo ʉlwa Ndaabɨti.
40
Naalyʉmɨɨliile ʉkʉnnguulɨla ɄNTWA nʉ lʉtengaano,aalɨɨsanukiile, aapɨliike ʉkʉlɨla kwangʉ.
2 Aalɨɨfyʉlile mbwina bwa loonangɨko,
ʉkʉfuma mu mfu ʉgwa bʉtyelele.
Aagabɨɨkile amalʉndɨ gangʉ pa lwalabwe,
nʉ kʉmbapo ʉbʉjo ʉbʉnunu ʉbwa kwɨmapo.
3 Aalɨɨmanyiisye ʉlwɨmbo ʉlʉpya,
ʉlwɨmbo ʉlwa kʉntuufya Kyala gwɨtʉ.
Bingi aabikʉsibona ɨsi aabombile nʉ kʉtiila,
bikʉnsʉʉbɨlaga ɄNTWA.
4 Asajiigwe ʉjʉ ikʉnsʉʉbɨla ɄNTWA,
ʉjʉ atikʉbasʉʉbɨla abandʉ abaa matingo,
ʉjʉ atikʉsanukɨla kʉlɨ bala bikwipuuta kwa gyabaakyala.
5 Gwe NTWA Kyala gwangʉ,
ʉtʉbombiile nyingi ɨsya kʉswigɨsya.
Ɨsi gwasibaatiike kʉnongwa jɨɨtʉ,
akajako najʉmo ʉjʉ abagiile ʉkʉsibala.
Lɨnga naasijobaga nʉ kʉsilɨngaania,
nyingi fiijo sitikʉbaligwa.
6 Ʉkiigana ʉkʉkʉsookesya iikemo ɨlya finyamaana,
ʉtikwikyela amakemo amookye na makemo gaa koomola ʉbʉtʉlanongwa,
looli kʉndʉʉla ʉkʉtɨ ngʉpɨlɨkege nʉ kʉkʉtiila.
7 Po ndɨnkʉtɨ, “Keeta ʉne niisile.
Ɨsi ngʉlondigwa ʉkʉbomba, sisimbiigwe mwa Kalata ʉMwikemo.
8 Gwe Kyala gwangʉ, ngʉhoboka ʉkʉbomba ɨsi sikʉkʉkyela,
ɨndagɨlo syako silɨ mu ndumbula jangʉ.”a
9 Mfumwisye ɨmbombo syako ɨsya bʉpoki,
ndʉkomaano lwa bandʉ abingi.
Gwe NTWA, ʉmeenye,
ndikʉmyeka ʉkʉlʉmbɨlɨla.
10 Ngasifisa ɨnongwa ɨsya bʉpoki bwako, ʉkʉja syangʉ niimwene,
mfumwisye ʉbwanalooli nʉ bʉpoki bwako.
Ngafinda iipyana nʉ bwanalooli bwako,
kʉ lʉkomaano lwa bandʉ abingi.
11 Gwe NTWA, ʉlɨngasigɨla ɨkɨsa kyako kʉmyangʉ,
iipyana nʉ bwanalooli bwako fiindɨndɨlɨlege amasikʉ goosa.
Ʉlwipuuto ʉlwa kʉsʉʉma ʉbʉtʉʉli
12 Ʉbʉtolwe bwingi bʉʉsyʉngʉʉtiile,
ʉbʉtʉlanongwa bwangʉ bʉngolile, ndikʉjɨbona ɨnjɨla.
Ɨmbiibi syangʉ nyingi ʉkʉkɨnda ɨnywili syangʉ,
fyobeene noonywike amaka.
13 Gwe NTWA, gwikyele ʉkʉmboka.
Gwe NTWA, ʉkʉʉje ʉkʉndʉʉla.
14 Boosa aba bikʉlonda ʉkʉʉngoga,
bafujuligwe nʉ kʉsʉʉka.
Aba bikʉsekela ʉkʉtaamigwa kwangʉ,
bakagigwe bakenye.
15 Aba bikʉtɨ, “Namunkeete!”
Batoligwe nʉ kʉsʉʉka fiijo.
16 Looli boosa aba bikʉkʉlonda ʉgwe,
basekelege nʉ kʉhoboka.
Aba babʉganile ʉbʉpoki bwako,
bwila batɨgɨ, “ɄNTWA atuufigwege!”
17 Looli ʉne ndɨ ntolwe, kangɨ naagilwe,
ʉNtwa ambaakɨsye.
Gwe ntʉʉli gwangʉ, gwe mpoki gwangʉ,
gwe Kyala gwangʉ, ʉlɨngakaabɨlaga.