Ʉlwipuuto lwa mundʉ ʉmbine
Kʉ mpaali gwa lwɨmbo. Ʉlwɨmbo ʉlwa Ndaabɨti.
41
Asajiigwe ʉmooloolo kʉ boonywa,ɄNTWA ikʉmpoka pi isikʉ lya bʉtolwe.
2 ɄNTWA ikʉnndɨndɨlɨla nʉ kʉmmbɨɨka kʉ bʉʉmi,
ikʉnsaja nnyumba jaake,
atikʉmmbɨɨka mmaboko gaa balʉgʉ.
3 ɄNTWA ikʉnkasya bo abinile pa kɨtala,
ikʉmmbʉmbʉlʉsya ʉbʉbine bwake.
4 Ʉne naatile, “Gwe NTWA, ʉlɨɨmbaakɨsya,
ʉʉmbʉmbʉlʉsye, namanga ngʉbombiile ɨmbiibi.”
5 Abalʉgʉ bangʉ bikʉʉnjobela amasyʉ amabiibi,
bikʉtɨ, “Ikʉfwa ndɨli, ʉkʉtɨ ɨngamu jaake jɨmalɨke loosa?”
6 Ʉjʉ lɨnga iisile kʉkʉngeeta,
ikʉjoba ɨnongwa ɨsya mwalo.
Ikʉbʉngaania ɨnongwa ɨmbiibi,
ikwakʉbalania ɨnongwa ɨsyo panja.
7 Boosa aba baambengile, bikʉʉheeha ʉne,
bikʉʉnyiinogonela ɨmbiibi.
8 Bikʉtɨ, “Ʉbʉbine ʉbʉpalapala bʉnkolile,
atikwisa kʉsumukamo sikʉ.”
9 Joope nʉ mmanyaani gwangʉ ʉjʉ nansʉʉbɨlaga,
ʉjʉ twalyaga pamopeene,
asanwike ʉkʉja ndʉgʉ gwangʉ.a
10 Looli ʉgwe gwe NTWA, ʉlɨɨmbaakɨsya,
ʉʉnyiinʉle, mbatole abalʉgʉ bangʉ.
11 Mmeenye ʉkʉtɨ gwikyeliile na niine,
paapo ʉndʉgʉ gwangʉ atikʉndola.
12 Looli ʉgwe ʉndʉʉlile paapo ndɨ ngolofu,
ʉʉmbɨɨkile nkyeni mmyako bwila na bwila.
13 Atuufigwege ɄNTWA Kyala gwa Isilaɨli, bwila na bwila.
Ameni na Ameni.