Ɨkɨjabo ɨkya bʉbɨlɨ
(Ɨsabʉli 42–72)
Ʉlwipuuto lwa mundʉ ʉjʉ alɨ mbʉsaamisigwa
Kʉ mpaali gwa lwɨmbo. Ʉlwɨmbo ʉlwa mahala ʉlwa Banya Koola.
42
Bo ʉlwa mbabala ɨjɨ jʉʉmiilwe,jikʉnyonywa amɨɨsi amatalalɨfu agaa nyɨɨsi,
bo jɨlɨ ɨndumbula jangʉ jikʉkʉnyonywa,
ʉgwe Kyala gwangʉ.
2 Ɨndumbula jangʉ jɨmmʉʉmiilwe Kyala, Kyala ʉmʉʉmi.
Mbʉʉke ndɨli ngɨɨme nkyeni mwa Kyala?
3 Amaasosi gangʉ fyo findʉ fyangʉ pamuusi na pakɨlo.
Bo ndɨ pakʉlɨla bikʉtɨ, “Kyala gwako alɨ kʉʉgʉ?”
4 Ɨndumbula jangʉ jikʉbaba bo ngʉkʉmbʉka ɨndasi,
lʉla nendaga nɨ kɨlʉndɨlo ɨkya bandʉ,
ʉkʉbalongosya ʉkʉbʉʉka kʉ tempeli,
kʉ lʉsekelo nʉ kʉmpaala Kyala,
pa lʉkomaano ʉlwa kyaka.
5 Gwe ndumbula jangʉ, ʉsulumeenie fiki?
Kʉlalamuka fiki nkatɨ mmyangʉ?
Nʉnsʉʉbɨlege Kyala ʉkʉndʉʉla,
po angʉmpaalaga kangɨ Kyala, ʉmpoki gwangʉ.
6 Gwe NTWA, ɨndumbula jangʉ jɨsulumeenie nkatɨ mmyangʉ,
ndɨ kʉbʉtali ʉkʉfuma kʉmyako,
ngʉkʉmbʉka ɨkyamba Helimoni nɨ kya Misali,
nkiisʉ ɨkya lwɨsi Jolitani.
7 Ndikʉpɨlɨka nafimo, looli ʉnjwego gwa mbugujo,
amɨɨsi gaake gikʉʉngwangwania.
Amɨɨsi gaako agaa mweleesyo na majɨga gaako goosa,
fikwenda pamwanya pamyangʉ.
8 ɄNTWA ambepo iipyana lyake pamuusi,
pakɨlo nʉmmwɨmbɨle ʉlwɨmbo,
nʉ kwipuuta kwa Kyala ʉjʉ ikʉmbapo ʉbʉʉmi.
9 Ngʉmmbʉʉla Kyala, ʉjʉ jo lwalabwe lwangʉ,
ngʉtɨ, “Fiki ʉʉnyiibiibwe?
Fiki nsulumaniege nʉ kʉboneligwa na balʉgʉ?”
10 Abalʉgʉ bangʉ bikʉʉnyangalɨla akabalɨlo koosa,
bikʉʉndaalʉʉsya bikʉtɨ, “Kyala gwako alɨ kʉʉgʉ?”
Lɨnga bikʉjoba bo ʉlo,
ɨfifupa fyangʉ fikʉbaba ngatɨ fikʉtakanyika.
11 Gwe ndumbula jangʉ, ʉsulumeenie fiki?
Kʉlalamuka fiki nkatɨ mmyangʉ?
Nʉnsʉʉbɨlege Kyala ʉkʉndʉʉla,
po angʉmpaalaga kangɨ Kyala, ʉmpoki gwangʉ.