Ʉlwilaato lwa mundʉ ʉjʉ ikʉkʉbɨlwa
Kʉ mpaali gwa lwɨmbo. Kwa Jendutuni. Ʉlwɨmbo ʉlwa Ndaabɨti.
39
Naajobile naatile, “Ngʉsitiimaga ɨnjɨla syangʉ,ndɨngiisa kʉtʉla ɨnongwa kʉ bʉjobi bwangʉ.
Ngʉgubaga fiijo,
bo ababiibi balɨ kɨfuki na niine.”
2 Naalɨ kɨnuunu,
poope kʉkaalɨndʉʉlile nafimo.
Looli ʉkʉbabigwa kʉlɨnkʉkɨndɨlɨla,
3 ɨndumbula jangʉ jɨlɨnkʉpya nkatɨ mmyangʉ.
Bo ngwinogona, ʉmooto gʉlɨnkʉbukuka,
po ndɨnkʉjoba ndɨnkʉtɨ,
4 “Gwe NTWA, ʉʉmbʉʉle ʉbʉmalɨkɨlo bwangʉ,
na masikʉ gangʉ agaa kʉjako kʉ bʉʉmi,
mbʉmanye ʉbʉpimba bwa bʉʉmi bwangʉ.
5 Keeta, ʉmbeele ʉbʉʉmi ʉbʉpimba fiijo!
Amasikʉ gaa bʉʉmi bwangʉ manandɨ fiijo kʉmyako.
Ʉbʉʉmi bwa mundʉ bʉlɨ bo ʉlwa mʉʉji itolo.” Sela
6 Nalooli kʉkʉtɨ mundʉ ikʉkɨnda bo ʉlwa nsyʉngʉʉlʉ.
Syosa ɨsi ikwijʉʉla ʉkʉbomba sya itolo.
Ikʉbʉngaania ɨkyʉma looli atikʉmmanya ʉjʉ ikwisa kwegaga.
7 Gwe Ntwa, ʉlʉ ngʉguulɨla ɨfiki?
Ngʉkʉsʉʉbɨla ʉgwe.
8 Ʉmboke kʉ mbiibi syangʉ syosa.
Ʉlɨngambela ʉkʉja gwa kʉsekigwa na bakonyofu.
9 Ndɨ mye, ndikʉjoba iisyʉ nalɨmo,
namanga ʉlʉfundo ʉlʉ lʉfumile kʉmyako.
10 Ʉlɨɨsookesyapo ʉlʉfundo ʉlʉ!
Ʉngomile nɨ kɨboko! Mmaliike!
11 Bo kʉmfunda ʉmundʉ nʉ kʉnkemela kʉ mbiibi syake,
koonanga ɨfi afiganile, bo ʉlwa ifiliifili.
Ʉbʉʉmi bwa mundʉ bʉlɨ bo ʉlwa mʉʉji itolo. Sela
12 Gwe NTWA, ʉpɨlɨke ʉlwipuuto lwangʉ,
ʉtege ɨmbʉlʉkʉtʉ syako bo ngʉlɨla,
ʉlɨngajaga kɨmyemye kʉ maasosi gangʉ.
Namanga kʉmyako ʉne ndɨ nheesya gwako,
ndɨ mwenda njɨla bo ʉlwa biisʉkʉlʉ bɨɨtʉ.
13 Ʉʉndeke, ndɨngataamigwaga, nje nʉ lʉsekelo kangɨ,
bo ngaalɨ ʉkʉfwa nʉ kʉjonga loosa.