Ʉlwipuuto ʉlwa ʉjʉ ikʉkʉbɨlwa
Ʉlwɨmbo ʉlwa Ndaabɨti. Ɨsya kʉbakʉmbʉsya abandʉ.
38
Gwe NTWA, ʉlɨngangemelaga mbʉkalale bwako,pamo ʉkʉʉfunda mu ngalalɨsi syako.
2 Namanga ɨmitipʉlo gyako gɨɨndasile,
ɨkɨboko kyako kɨɨnyiilɨkiile.
3 Ʉmbɨlɨ goosa gʉbinile,
kʉnongwa jaa ngalalɨsi syako.
Fyope nɨ fifupa fyangʉ fikʉtaamigwa,
kʉnongwa jaa bʉtʉlanongwa bwangʉ.
4 Ɨmbiibi syangʉ sigʉkupɨkiile ʉntʉ,
bo ʉlwa kɨtwalo ɨkɨsito ɨkɨ ngabagɨla ʉkʉkɨpɨmba.
5 Ɨfifulalo fyangʉ fikʉnunga, fibolile,
kʉnongwa jaa bʉkonyofu bwangʉ.
6 Ngokobeele, niineeme fiijo,
iisikʉ lyosa ngwenda ngwilɨlɨɨsya.
7 Ɨsekema jɨngolile fiijo,
ʉmbɨlɨ goosa gʉbinile,
8 gwiswile ɨfifulalo, ngandile,
ngwikeema kʉnongwa jaa kʉtaamigwa.
9 Gwe Ntwa, ɨfi ngʉnyonywa ʉfimeenye,
ʉkwikeema kwangʉ kʉkiifisa kʉmyako.
10 Ɨndumbula jangʉ jikʉkungʼunda,
amaka gangʉ gamaliike,
goope amaaso gangʉ gapʉʉpeele.
11 Abamanyaani bangʉ na biinangʉ bikʉtandamala,
kʉnongwa jaa bʉbine bwangʉ.
Abapalamani bangʉ bɨɨmile kʉbʉtali.
12 Aba bikʉlonda ʉkʉʉngoga bikʉtega ɨmitego,
aba bikʉlonda ʉkʉʉfulasya balɨ na masyʉ agaa kʉtiilɨsya,
iisikʉ lyosa bikwinogona ɨsya kʉʉnyoonanga.
13 Looli ndɨ bo ʉlwa mundʉ ʉgwa mapʉlɨ, ndikʉpɨlɨka,
ndɨ bo ʉlwa mundʉ ʉgwa kɨnuunu, ʉjʉ akabagɨla ʉkʉjoba.
14 Nalooli ndɨ bo ʉlwa mundʉ ʉgwa mapʉlɨ,
ʉjʉ akanwa kaake kakabagɨla ʉkwamula.
15 Gwe NTWA, ngʉkʉguulɨla ʉgwe.
Gwe Ntwa, Kyala gwangʉ, ʉgwe aakʉʉnyaamula.
16 Ngʉkʉsʉʉma ʉkʉtɨ abalʉgʉ bangʉ balɨngaasekaga,
balɨngiituufyaga ʉkʉgwa kwangʉ.
17 Ndɨ kɨfuki ʉkʉgwa,
ndimo ngʉbabigwa fiijo.
18 Ngwilaata ʉbʉtʉlanongwa bwangʉ,
nsulumeenie kʉ mbiibi syangʉ.
19 Abalʉgʉ bangʉ bongeliile kɨsita nongwa,
bingi aba baambengile bo ngalɨga nasimo.
20 Aba bikʉʉmbukɨsya ɨmbiibi paa nunu,
bikʉmbɨnga paapo ngʉbomba ɨnunu.
21 Gwe NTWA, komma ʉkʉʉndeka.
Kyala gwangʉ, ʉlɨngajaga pabʉtali na niine.
22 Ʉkʉʉjege ʉkwisa kʉkʉndʉʉla,
gwe Ntwa, gwe mpoki gwangʉ.