Kʉno bikʉlabɨla abanunu na babiibi
Ʉlwɨmbo ʉlwa Ndaabɨti.
37
Ʉlɨngataamigwaga kʉnongwa jaa babomba mbiibi,ʉlɨnganyonywaga ʉkʉja bo ʉlwa baniongafu.
2 Namanga bikwisa kʉʉma nakalɨnga bo ʉlwa liisʉ,
bikwisa kʉkofuka nakalɨnga bo ʉlwa maani amabɨsi.
3 Ʉnsʉʉbɨlege ɄNTWA, ʉbombege ɨnunu,
po kʉtʉʉgalaga nkiisʉ nʉ kʉlʉtiima ʉlʉtengaano.
4 Ʉjege nʉ lʉsekelo kʉ NTWA,
aikʉkʉpa ɨfi ɨndumbula jaako jikʉnyonywa.
5 Gwininge kʉ NTWA,
ʉnsʉʉbɨlege, aikʉkʉtʉʉla.
6 Aikʉbʉpela ʉbʉgolofu bwako ʉkʉmulɨka,
bo ʉlwa lʉmuli.
Aikʉbʉpela ʉbwanalooli bwako ʉkʉmulɨka,
bo ʉlwa isʉba ɨlɨ lɨlɨ pantʉ.
7 Ʉjege kɨmyemye nkyeni mu NTWA,
ʉnnguulɨlege nʉ lʉtengaano.
Ʉlɨngataamigwaga lɨnga ʉmundʉ ʉmbiibi ɨnjɨla syake sikʉnoga,
pamo ikʉbomba ɨmbiibi ɨsi asibaatiike.
8 Ʉlɨngajaga nɨ lyojo, ʉlɨngajaga nɨ ngalalɨsi,
fikʉtwala ʉkʉbomba ɨmbiibi.
9 Abatʉlanongwa bikwisa kʉpyutigwa,
looli aba bikʉnsʉʉbɨla ɄNTWA
bikwisa kʉkɨkaba ɨkiisʉ.
10 Kakaalɨ akabalɨlo akapimba,
ababomba mbiibi batikʉjangapo.
Aakʉbalondaga pabʉjo bwabo, ʉtikʉbaagaga.
11 Looli abaa lwijiisyo bikwisa kʉkɨkaba ɨkiisʉ.
Bikwisa kwisekeesyaga nʉ lʉtengaano ʉlwingi.
12 Ʉntʉlanongwa ikwinogona ʉkʉmmbombela ɨmbiibi ʉngolofu,
nʉ kʉnsyegetulɨla amiino kʉ ngalalɨsi.
13 Looli ʉNtwa ikʉnseka ʉmbiibi,
ameenye ʉkʉtɨ iisikʉ lyake ɨlya bʉlongi likwisa.
14 Abaniongafu bikʉfyʉtʉla ɨnyʉʉbo syabo,
nʉ kʉpɨnda ɨmbɨnde syabo,
ʉkʉtɨ babagwɨsye abalondo na batolwe,
bikʉlonda ʉkʉbaboola abagolofu.
15 Looli ɨnyʉʉbo syabo sikwisa kʉsilasaga ɨndumbula syabo,
ɨmbɨnde syabo sikwisa kʉkonyokaga.
16 Ɨfinandɨ ɨfi alɨ nafyo ʉngolofu finunu,
fikɨkɨndile ɨkyʉma ɨkingi ɨkɨ balɨ nakyo abaniongafu abingi.
17 Namanga amaka agaa baniongafu aagikʉkonyoligwa,
looli ɄNTWA aikʉbatʉʉlaga abagolofu.
18 ɄNTWA ikʉbalɨndɨlɨla abasita nongwa najɨmo,
ɨkɨlɨngo kyabo kya bwila na bwila.
19 Batikwisa kʉsʉʉka mbʉtolwe bwabo,
nkabalɨlo akaa njala bikʉjaga nɨ findʉ fingi.
20 Looli ababomba mbiibi bikwisa kʉfwaga,
bo ʉlwa bʉlenge ʉbwa mmigʉnda.
Abalʉgʉ baa NTWA bikwisa kʉmalɨka,
bikwisa kʉjonga bo ʉlwa lyosi.
21 Ʉmundʉ ʉmbiibi ikʉkopa looli atikʉgomola,
looli ʉmundʉ ʉngolofu mooloolo, ikʉpa.
22 Aba basajiigwe nʉ NTWA aabikʉkɨkaba ɨkiisʉ,
aba baguniigwe nʉ mwene, bikwisa kʉpyutigwa.
23 ɄNTWA ikʉnndongosya ɨnjɨla ʉngolofu,
ikwikyela na kajɨɨlo kaake.
24 Lɨnga iipɨɨseenie, atikʉgwaga paasi.
ɄNTWA ikʉnkola ɨkɨboko nʉ kʉntʉʉla.
25 Naalɨ ndʉmyana, lɨɨlɨno ndɨ nkangale,
looli ngammbonamo ʉngolofu ʉkʉlekigwa nʉ NTWA,
pamo abaanaake ʉkʉsʉʉma sʉʉma ɨfindʉ.
26 Akabalɨlo koosa ikʉpa nʉ kʉkopesya,
abaanaake bikʉja lʉsajo.
27 Ʉsilekege ɨmbiibi, ʉbombege ɨnunu,
po kʉtʉʉgalaga mbʉjo bwako bwila na bwila.
28 Namanga ɄNTWA abʉganile ʉbʉgolofu,
atikʉbaleka abiikemo baake.
Ikʉbalɨndɨlɨla bwila na bwila,
looli abaana baa batʉlanongwa bikwisa kʉpyutigwa.
29 Abagolofu bikwisa kʉkɨkaba ɨkiisʉ ɨkɨ aafingile ʉkʉbapa,
bikwisa kʉtʉʉgalaga ʉmo bwila na bwila.
30 Akanwa kaa ngolofu kikʉjoba amasyʉ gaa mahala,
ʉlʉlɨmi lwake lukʉjoba ɨsya bwanalooli.
31 Ɨndagɨlo sya Kyala gwake silɨ mu ndumbula jaake,
atikʉtyelemuka mu njɨla jaake.
32 Ʉmundʉ ʉmbiibi ikʉntegelela ʉngolofu,
ikʉlonda ʉkʉnngoga.
33 Looli ɄNTWA atikʉnndeka mmaboko gaa ndʉgʉ,
kangɨ atikʉnndeka ʉkʉtobesigwa pa nongwa.
34 Ʉnnguulɨlege ɄNTWA,
ʉjɨkongege ɨnjɨla jaake.
Aikʉkwɨmɨkaga, ikʉkʉpaga ɨkiisʉ,
aakʉbabonaga abatʉlanongwa bo bikʉpyutigwa.
35 Nʉmmbwenemo ʉmundʉ ʉntʉlanongwa ʉnkalɨ fiijo,
ʉjʉ aabɨlile bo ʉlwa mpiki pa mfu ʉnnunu.
36 Nakalɨnga aakɨndile, aasobile!
Naalɨnndondile, ngaalɨmmwagile.
37 Ʉnkeete fiijo ʉmundʉ ʉjʉ akaja na kababye nakamo,
ʉnkeete ʉmundʉ ʉngolofu.
Ʉbʉmalɨkɨlo bwa mundʉ ʉjo bʉlɨ nʉ lʉtengaano.
38 Looli abatʉlanongwa bikwisa kʉpyutigwa boosa,
ababiibi kʉmmalɨɨkɨsyo bikwisa koomoligwa.
39 Ʉbʉpoki bwa bagolofu bukʉfuma kʉ NTWA,
ʉmwene lyo ilinga lyabo pa bʉtolwe.
40 ɄNTWA ikʉbatʉʉla nʉ kʉbapoka,
ikʉbanyaka kʉ babiibi nʉ kʉbaabʉla,
paapo bikʉmmbopela ʉmwene.