Ʉbʉtʉlanongwa bwa mundʉ
Kʉ mpaali gwa lwɨmbo. Ʉlwɨmbo ʉlwa Ndaabɨti, ʉmbombeli gwa NTWA.
36
Ɨmbiibi jikʉjoba kʉ mundʉ ʉntʉlanongwa,nkatɨ mu ndumbula jaake,
jikʉtɨ, ʉkʉntiila Kyala kʉkajako.a
2 Namanga ikwisyoba mu ndumbula jaake,
ʉkʉtɨ ʉbʉtʉlanongwa bwake aabʉtikʉboneka nʉ kʉbengigwa.
3 Syosa ɨsi ikʉjoba mbiibi kangɨ sya bʉsyobi,
alekile ʉkʉbombela amahala nʉ kʉbomba ɨnunu.
4 Bo alambaleele ikʉbaatɨka ʉkʉbomba ɨmbiibi,
ikwibɨɨka mu njɨla ɨjɨ jɨkaja nunu,
atikʉbʉkaana ʉbʉbiibi.
Ʉbooloolo bwa Kyala
5 Gwe NTWA, iipyana lyako likʉfika kʉmwanya,
ʉbwanalooli bwako bukwakʉfika mmabɨngo.
6 Ʉbʉgolofu bwako bʉlɨ bo ʉlwa fyamba ɨfitali fiijo,
ʉbʉlongi bwako bʉlɨ bo ʉlwa nyanja ɨsolofu fiijo.
Gwe NTWA, kʉbalɨndɨlɨla abandʉ nɨ finyamaana.
7 Gwe Kyala, bo bʉpala bʉki iipyana lyako!
Abandʉ bikʉbopela nkɨpepo kya mapɨko gaako.
8 Bikwikʉta ɨfindʉ ɨfya nnyumba jaako,
kʉbanwesya amɨɨsi agaa ndwɨsi ʉlwa bʉnunu bwako.
9 Namanga kʉmyako jɨliko ɨnyiibʉko ɨjaa bʉʉmi,
ʉlʉmuli lwako lukʉtʉmulɨkɨla.
10 Gwendelelege ʉkʉja ni ipyana kʉlɨ aba bakʉmeenye,
ʉbʉgolofu bwako bʉjege kʉ beelu mu ndumbula.
11 Abaa matingo balɨngandola,
goope amaboko agaa baniongafu galɨngangagaga.
12 Keeta muno bagwɨliile ababomba mbiibi,
bagwɨsiigwe paasi, bakabagɨla ʉkwɨma.