Ʉkʉsʉʉma ʉbʉtʉʉli
Ʉlwɨmbo ʉlwa Ndaabɨti.
35
Gwe NTWA, ʉbapɨnge aba bikʉpɨngana na niine,ʉlwege na aba bikʉlwa na niine.
2 Gwege ɨngʉlʉ jaako ɨnywamu,
gwise kʉkʉndʉʉla.
3 Gwege ɨngwego nʉ ndunda,
ʉbapɨnge aba bikʉʉfwɨma ʉne.
Ʉʉmbʉʉle ʉne ʉtɨ,
“Ndɨ mpoki gwako.”
4 Sibakolege ɨsoni kangɨ basʉʉkege,
aba bikʉlonda ʉkʉʉngoga.
Bagomosigwege kʉnyuma, baalanganege,
aba bikʉbaatɨka ʉkʉʉfulasya.
5 Bafwanege bo ʉlwa mikʉkʉʉjɨlo,
ɨgɨ gikʉbelelʉsigwa nʉ mbelo,
ʉgwandʉmi gwa NTWA bo ikʉbakaga.
6 Ɨnjɨla jaabo jɨjege nɨ ngiisi nʉ bʉtyelele,
ʉgwandʉmi gwa NTWA bo ikʉbakaga.
7 Namanga baalɨndegile nɨ mitego,
kɨsita nongwa najɨmo.
Bo ngalɨga ɨnongwa najɨmo,
baalɨngʉmbiile ʉbwina.
8 Ʉlʉpyuto lʉbaage nakalɨnga.
Ʉntego ʉgʉ baategile, gʉbakole baabo,
bagwɨle nkatɨ nʉ kʉpyutigwa.
9 Po ngwisa kʉsekelaga mu NTWA,
nʉ kʉbʉtuufya ʉbʉpoki bwake.
10 Nɨ ndumbula joosa ngwisa kʉtɨgɨ,
“Gwe NTWA, jo jwani afwene na nungwe?
Kʉmpoka ʉmoonywa kʉ gwa maka,
ʉndondo kʉlɨ ʉjʉ ikʉmmwibɨla.”
11 Abakeeti abaa bʉtʉngʉlʉ bikwɨma,
bikʉʉndaalʉʉsya ɨsi ngasimanya.
12 Bikʉʉhomba ɨmbiibi paa nunu,
naabwike amaka.
13 Looli abeene bo babine,
ʉne naafwele amalogota ʉkʉnangɨsya ʉbʉsulumanie,
niifundaga kʉ njɨla jaa kʉfipɨɨka ɨfindʉ,
naabiipuutɨlaga fiijo.
14 Naafwanaga ngʉnndɨlɨla fiijo ʉmmanyaani,
pamo ʉnkamu gwangʉ.
Naabʉʉkaga ʉko na ʉko kʉ bʉsulumanie,
ngatɨ mfwɨliilwe na jʉʉba.
15 Looli bo niipɨɨseenie, baabʉngeene, balɨnkʉʉseka.
Baalɨɨmbʉnganiile abandʉ abaa mwalo aba ngabamanya,
bakaalekile ʉkʉʉnyangafula.
16 Kɨsita kʉntiila Kyala balɨnkʉʉnyʉʉgɨɨlɨla,
balɨnkʉʉsyegetulɨla amiino gaabo kʉ ngalalɨsi.
17 Gwe Ntwa, kʉkeetelelaga itolo mpaka ndɨli?
Ʉmboke kʉ lʉfundo lwabo.
Ʉbʉpoke ʉbʉʉmi bwangʉ kʉ ngalamu ɨsi.
18 Ngʉgwaga ʉlʉpi kʉmyako pa kɨlʉndɨlo ɨkɨnywamu,
ngʉkʉtuufyaga nkyeni mmbandʉ abingi.
19 Ʉlɨngabaleka abalʉgʉ bangʉ,
ʉkʉʉseka ʉne mbʉtʉngʉlʉ bwabo.
Ʉlɨngabaleka aba baambengile,
ʉkʉʉheeha ʉne kɨsita nongwa.
20 Namanga batikʉjoba amasyʉ agaa lʉtengaano,
looli bikwagʉla amasyʉ agaa bʉtʉngʉlʉ,
kʉ bandʉ aba batikʉjwega.
21 Bikʉʉnyaasamila akanwa kaabo bikʉtɨ,
“Nalooli! Tʉsibwene na maaso gɨɨtʉ ɨsi ʉbombile.”
22 Gwe NTWA ʉsibwene ɨsi, ʉlɨngajaga kɨmyemye.
Gwe Ntwa, ʉlɨngajaga kʉbʉtali na niine.
23 Gwe Kyala gwangʉ, gwe Ntwa gwangʉ,
sumuka, gwɨme ʉndʉʉle,
ʉjɨnosye ɨnongwa jangʉ.
24 Gwe NTWA, Kyala gwangʉ,
ʉʉnosye ʉkʉkongana nʉ bʉgolofu bwako,
abalʉgʉ bangʉ balɨngaasekaga ʉne.
25 Ʉlɨngabaleka ʉkʉjoba mu ndumbula syabo, ʉkʉtɨ,
“Syo ɨsi twalondaga!”
Pamo ʉkʉtɨ, “Tʉmmilile ʉjʉ.”
26 Ʉbaleke batoligwe nʉ kʉsʉʉka,
aba bikʉsekela bo ngʉtaamigwa ʉne.
Boosa aba bikwijumbɨka ʉkʉngɨnda ʉne,
sibakole ɨsoni, basʉʉke.
27 Baluluutɨlege nʉ kʉsaala,
aba bahobwike ʉkʉnosigwa kwangʉ.
Nalooli bwila batɨgɨ, “Atuufigwege ɄNTWA,
ʉjʉ iikyeliile ʉlʉtengaano ʉlwa mbombeli gwake.”
28 Po ʉlʉlɨmi lwangʉ lukʉfumusyaga ʉbʉgolofu bwako,
nʉ kʉkʉtuufya iisikʉ lyosa.