Ʉlʉtuufyo lwa booloolo ʉbwa NTWA
Ʉlwɨmbo ʉlwa Ndaabɨti. Aalyɨmbile bo iipelile ʉkʉja gwa mbepo nkyeni mmalafyale Abimeleki. Po alɨnkʉkagigwa, alɨnkʉjonga.a
34
Ngʉntuufyaga ɄNTWA akabalɨlo koosa,ngʉmpaalaga bwila nʉ ndomo gwangʉ.
2 Ngwituukɨfyaga mwene ɄNTWA,
abafujufu bapɨlɨke nʉ kʉsekela.
3 Pamopeene na niine tʉntuufyege ɄNTWA,
twesa pamopeene tukʉjɨɨmɨka ɨngamu jaake.
4 Naaliipuutile kʉ NTWA, aalɨɨnyaamwile,
aalɨmbokile na kʉlɨ syosa ɨsi naatiilaga.
5 Munkeetege ɄNTWA ʉkʉtɨ muje nʉ lʉsekelo,
aamutikʉsʉʉkamo sikʉ.
6 Ʉgwa lwijiisyo aaliipuutile.
ɄNTWA aapɨliike,
aalɨmpokile mbʉtolwe bwake boosa.
7 Ʉgwandʉmi gwa NTWA ikʉbalɨndɨlɨla,
abandʉ boosa aba bikʉntiila,
ikʉbapoka mbʉtolwe.
8 Oko, munngele ɄNTWA,
mukeete muno bʉjɨɨliile ʉbʉnunu bwake.
Ʉmundʉ ʉjʉ ikʉmmbopela, ikʉsajigwa fiijo.
9 Oko, muntiilege ɄNTWA, mwe bandʉ baake.
Abandʉ aba bikʉntiila batikwagɨlwamo fimo.
10 Ɨngalamu ɨndubwa sikʉlʉmigwa nɨ njala,
looli aba bikʉnsʉʉbɨla ɄNTWA,
batikwagɨlwa akanunu nakamo.
11 Isaga mwe baanike, mumbɨlɨkɨsye,
angʉbamanyisya ʉkʉntiila ɄNTWA.
12 Gwesa ʉjʉ ikʉlonda ʉkʉtʉʉgala kanunu,
nʉ kʉja nɨ sajo.
13 aleke ʉkʉbaheeha abandʉ,
nʉ kʉtʉngʉlʉpa.
14 Aleke ʉkʉbomba ɨmbiibi, looli abombege ɨnunu.
Alʉsʉʉbɨlege ʉlʉtengaano nʉ kʉlʉkonga fiijo.
15 Namanga ɄNTWA ikʉbakeeta abandʉ abagolofu kʉ kɨbabɨɨlɨsi,
kangɨ ikwambɨlɨla ɨnyiipuuto syabo.
16 Looli aba bikʉbomba ɨmbiibi, ɄNTWA ikʉbasinda iikosi,
batikʉkʉmbʉkigwaga kangɨ pakiisʉ.b
17 Abagolofu lɨnga bikʉnndɨlɨla ɄNTWA, ikʉbapɨlɨka,
ikʉbapoka mbʉtolwe bwabo boosa.
18 ɄNTWA alɨ kɨfuki na aba ɨndumbula syabo sitengwike,
boosa aba basulumeenie mu ndumbula ikʉbapoka.
19 Ɨngʉbɨlo sya mundʉ ʉngolofu nyingi,
looli ɄNTWA ikʉmpoka kʉlɨ syosa.
20 Ikʉfilɨndɨlɨla ɨfifupa fyosa,
kɨtikʉkonyokapo nakɨmo.c
21 Ɨndaamyo aasikʉbagoga ababiibi,
abalʉgʉ baa bagolofu aabikʉlongigwa.
22 ɄNTWA ikʉbapoka ababombeli baake,
boosa aba bikʉbopela kʉmyake batikwisa kʉlongigwa.