Ʉlwɨmbo lwa lʉtuufyo
33
Mwe bagolofu, mummwɨmbɨlege ɄNTWA nʉ lʉsekelo,ʉkʉmpaala kʉbabagiisye abagolofu.
2 Mumpaalege ɄNTWA na mapango,
mummwɨmbɨle nɨ fisango ɨfya mbote kalongo.
3 Mummwɨmbɨle ʉlwɨmbo ʉlʉpya,
mukʉbe kanunu nʉ kʉlaata nʉ lʉsekelo.
4 ɄNTWA ikʉjoba ɨsya bʉgolofu,
syosa ɨsi ikʉbomba sya bwanalooli.
5 ɄNTWA abʉganile ʉbwanalooli nʉ bʉgolofu,
ɨkiisʉ kiiswile iipyana lyake.
6 ɄNTWA aapelile ʉmpaalanga kwi isyʉ lyake,
nʉ mʉʉji gwa nkanwa kaake aapelile ɨndondwa syosa.
7 Aagabʉngeenie amɨɨsi agaa mu nyanja pabʉjo bʉmobwene,
amɨɨsi agaa mbʉsolofu aagabɨɨkile mu ndamba.
8 Ɨkiisʉ kyosa kɨntiilege ɄNTWA,
abandʉ boosa abaa pakiisʉ bammwɨmɨkege.
9 Namanga ʉmwene bo ajobile, kɨlɨnkʉjako ɨkiisʉ,
bo alagiile, kɨlɨnkʉboneka.
10 ɄNTWA ikʉsyandʉla ɨsi fibaatiike ɨfikolo,
ikʉpɨnga ɨsi babaatiike abandʉ.
11 Ʉlʉbaatɨko lwa NTWA lʉlipo bwila na bwila,
ɨnyango jaake jikʉjako mu sopelo syosa.
12 Kɨsajiigwe ɨkɨkolo ɨkɨ ɄNTWA jo Kyala gwabo,
bo bandʉ aba abasʉngwile ʉkʉja baa kɨlɨngo kyake.
13 ɄNTWA ikʉkeeta ʉkʉfuma kʉmwanya,
ikʉbabona abandʉ boosa.
14 Ʉkʉfuma apa ikʉtʉʉgala,
ikʉbakeeta boosa aba balɨ pakiisʉ.
15 Ʉmwene asibʉmbile ɨndumbula sya bandʉ boosa,
ikʉsimanya syosa ɨsi bikʉbomba.
16 Ʉmalafyale atikʉpokigwa kʉ bwingi bwa balwabwite baake,
pamo ʉngaasi ʉkʉtola kʉ bwingi bwa maka gaake.
17 Ɨfalaasi jaa bwite jɨtikʉsʉʉbɨligwa ʉkʉtwala ʉbʉtoli,
na paapo jɨlɨ na maka mingi, jɨkabagɨla ʉkʉpoka.
18 ɄNTWA ikʉbakeeta aba bikʉntiila,
na aba bikʉsʉʉbɨla iipyana lyake.
19 Ikʉbapoka kʉ bʉfwe,
nʉ kʉbapa ʉbʉʉmi nkabalɨlo akaa njala.
20 Tukʉnsʉʉbɨla ɄNTWA,
ʉmwene bʉtʉʉli bwɨtʉ,
kangɨ ngʉlʉ jɨɨtʉ.
21 Kʉnongwa jaake ɨndumbula syɨtʉ silɨ nʉ lʉsekelo,
namanga tukʉjɨsʉʉbɨla ɨngamu jaake ɨnyiikemo.
22 Gwe NTWA, iipyana lyako lɨjege na nuuswe,
paapo tukʉkʉsʉʉbɨla ʉgwe.