Ʉkwilaata nʉ bʉswe
Ʉlwɨmbo ʉlwa mahala ʉlwa Ndaabɨti.
32
Asajiigwe ʉjʉ ahobokeliigwe ɨmbiibi syake,ʉjʉ ʉbʉtʉlanongwa bwake bʉsoosiigwepo.
2 Asajiigwe ʉmundʉ,
ʉjʉ ɄNTWA atikʉmmbala ʉkʉja ntʉlanongwa,
ʉjʉ akaja nʉ bʉsyobi nabʉmo mu ndumbula.a
3 Bo ngasʉʉma ʉlʉhobokelo,
ɨfifupa fyangʉ fyalɨ fyonywa,
nakuutaga ɨliisikʉ lyosa.
4 Namanga pamuusi na pakɨlo,
ɨkɨboko kyako kyalɨɨnyiilɨkiile.
Amaka gangʉ gaasookilemo,
bo ʉlwa mɨɨsi aga gikʉʉma palʉmu. Sela
5 Naaliilaatile ʉbʉtʉlanongwa bwangʉ,
ngaabʉfisile kʉmyako.
Naatile, “Ngwilaataga ɨmbiibi syangʉ kʉ NTWA.”
Po ʉgwe gwalɨɨswile ʉbʉtʉlanongwa bwangʉ. Sela
6 Po kʉkʉtɨ mundʉ ʉjʉ ikʉkʉtiila, iipuutege kʉmyako,
paapo kwagigwa.
Nalooli pakabalɨlo akaa mweleesyo,
amɨɨsi gatikwisa kʉfikapo apa alipo.
7 Ʉgwe ʉlɨ bʉjo bwangʉ ʉbwa kwibɨɨlɨlapo,
kʉʉnyeepʉsyaga mbʉtolwe.
Nsyʉngʉʉtɨliigwe na bandʉ aba bikwɨmba,
ɨnyɨmbo ɨsya kʉpokigwa. Sela
8 ɄNTWA ikʉtɨ, “Angʉkʉmanyisya nʉ kʉkʉnangɨsya ɨnjɨla ɨjaa kwendamo.
Angʉkʉlɨngaaniaga nʉ kʉkʉkeetelela.”
9 Mulɨngajaga bo ʉlwa falaasi pamo ɨmbunda,
sikaja na mahala,
mpaka silongosigwe nɨ liijamu nʉ lʉgoje,
ʉkʉtɨ sikwitɨkɨlege.
10 Abatʉlanongwa bikʉkabaga ʉbʉtolwe ʉbwingi,
looli aba bikʉnsʉʉbɨla ɄNTWA,
bikʉsyʉngʉʉtɨligwa ni ipyana lyake.
11 Mwe bagolofu, musekelege ɄNTWA nʉ kʉhoboka.
Mwesa mwe beelu mu ndumbula, musekelege ɄNTWA.