Ìsá̰à̰ 6

Sèsíì dià nìpa tòhìka kànùm̀

Dentá Màtíyéè 14.13-21; Mádíkì 6.30-44; Dúkì 9.10-17

¹ Ye kú dàhàka, kà Sèsíì é deèta Kàdìdéè *baàdi sóìdi tɔɔ̀di. Ye kú baàdi-dà pà tṵ́mà toò-ma Tìbèyáádì baàdi. ² Kà nìku dɔ́ɔ́di ò tṵ̀n, mìì tee-sá kù de dɛ́hù pɔ́ńtápa̰á̰ma ò pa̰kú-ma-dà mɔkàpa hḭ́ǹka è pà kpekànì. ³ Kà Sèsíì é dìsi ta̰à̰di hḭ́ǹka, é tɛ̀i é kaàdi mɛnń n'ɔ̀ɔ dapàm̀ma. ⁴ Yè de hɔ̰́tà Sùwífùpa kúúdi pà toò-di Núǹtiyɛ̀ɛ̀ma kúúdi-dà tɔ́sí. ⁵ K'ó wáńtá é dɛ́há nìku dɔ́ɔ́di kà kù pení o pesá, k'ó béka Fìdípù è yɔ̀: Ti kó dɛ́tá yadà dimá é dontá k'yèe nìkù mɛnkù é dii ku wɛnnì? ⁶ Ò de békú Fìdípù mɛma è kpɛ̀i é dɛ́há ò kó tɛ̰́ńkama-dà, è yá̰á̰ ò de yɔ̀ɔ yá̰á̰-pu-dà ò kó pa̰á̰-sa.

⁷ Kà Fìdípù óò tɛ̰́ná è yɔ̀: Bá weǹtṵ́ṵka kɔ̀ɔnà dɛ́ɛ́ tɔmú dífa pú kó tɛ̀i ti kó dontá-ma pɛ̰́ɛ̰̀pa sàma, kà bá mɛ̀ǹǹ dɛ̀ɛ̀-ko é dɛ́tá wɛ́ɛ̀sa. ⁸ K'òo dapàǹn tɔɔ̀ɔ, Sìmɔ́-Píyɛ́ɛ̀ kúcàa, pà toò-ko À̰ǹtìdéè óò caka è yɔ̀: ⁹ Dapàm̀bíitá tàcɔ̰́tà-dà péé miì è káá *ɔ́sì^a pɛ̰́ɛ̰̀pa pànùm̀ nà num̀bííhí hìdɛ́ɛ́. Mii há̰ kó nɛɛ́ pa̰á̰ ba niìdɔ́ɔ́dì mɛnì kú tɔɔdì?

¹⁰ Kà Sèsíì yɔ̀: Héé-nà k'yèe nìpà é kaàdi pa wɛnnì. Yè de hɔ̰́tà míti-dà péé ye pesá sàma. K'yèe nìpa é kaàdi. Pa mɛhɛká, niìdaapá de yɔ̀ɔ-ɔ́-ma tòhe-kànùm̀ kpɛ́ɛmá. ¹¹ Ye wɔ̀ni, kà Sèsíì é tódá ye pɛ̰́ɛ̰̀pa é sɛda Weèdi, é héé kà pá pà totá ye nìpa mɛ̀m̀pà de kaàdi-pá. K'ó yíí tódá num̀bííhí é hḭn mɛma, é héé kà pá hì totá nìpa pà de kpɛ̀kaàma kú nùdi. ¹² Pà dii-má é dɛn pa wɛǹni, k'ó caka o dapàm̀ma è yɔ̀: Tíká-nà mìì sɔ̰́ńtà-sa k'yècḭ́ḭ̀ dá sèǹ! ¹³ Kà pá kodá pà de dii ye ɔ́sì pɛ̰́ɛ̰̀pa pànùm̀ é sɔ̰́ńtá-sa, k'yé sṵ́ná náḿbòhi píì-hìdɛ́ɛ́.

¹⁴ Nìpa dɛ́hà-ma pɔ́ńtápa̰á̰ma ò de pa̰à̰-ma, kà pà yɔ̀: Ye dɔɔɔ̀ mɛnǹ yòǹ mɔ́masí-dà Weèdi wɛtɛ̰́náko mɛ̀ǹǹ yònà é tɛ̀ni-kó-ní fòùku mɛhɛká.

¹⁵ Kà Sèsíì é bantá è yɔ̀ pà kpɛ̀i é tɛ̀ni óò tódá óò cɛ̰ɛ̰́ wóòti-dà nà nɔɔ̀ti, k'ó yíí é tṵ́má dìsi ta̰à̰di hḭ́ǹka o cɔ̰́ɔ̰̀di pesá.

Sèsíì cèn nɛ́ɛmá hḭ́ǹka

Màtíyéè 14.22-33; Mádíkì 6.45-52

¹⁶ Kà yohokú é yodá, kà Sèsíì dapàm̀ma é sḭ́ńtá-ní Kàdìdéè baàdi nùdi. ¹⁷ Kà pá tɛ̀i é dúú hà̰à̰pu mɛhɛká, è kɛ̰hɛdi Kàpɛ̀nàúm̀ yɔtí, ye baàdi sóìdi tɔɔ̀di. Kà yèǹka é bóka kà Sèsíì mum pú tóní pa pesá. ¹⁸ K'yèe baàdi nɛ́ɛmá nampú sàma, mìì tee-sá yakpeekú-dà de heu. ¹⁹ Kà pá pa̰á̰ kìdòmɛ́tídìpa pànùm̀ yoo pàkɔ̀ɔ̀ kpɛ́ɛmá, é dɛ́há Sèsíì k'ò cèǹtì-ní nɛ́ɛmá hḭ́ǹka è tɔ́kàǹta-ní ye hà̰à̰pu, kà wandanfɔ̰̀di é pà cɛ̰dí. ²⁰ Àmá, k'ó pà caka è yɔ̀: Mmí-dà, nɛ dá n'wani.

²¹ Kà pá n'kpɛ̀i óò tódá ye hà̰à̰pu mɛhɛká, é cemá é n'hɔ̰́tà pa hà̰à̰pu pḭ́ń kóḿbòni tɔɔ̀di pà de kɔ́ɔ́-di.

Sèsíì-dà yòǹ dimá mɛ̀mà kɔ̰́nì-ma fòùmu

²² K'yé wentá, kà nìku mɛ̀ǹkù wontà cá̰ńtà-ku ye baàdi sóìdi tɔɔ̀di, é deǹta-ní è yɔ̀ hà̰à̰pu mùcɔ̰́-dà wontà péé ye baàdi nùdi. K'ùá yá̰á̰-ma è yɔ̀ Sèsíì pú wontà pɛ́ɛ̀ é dúú-n'ɔ̀ɔ dapàm̀ma mu mɛhɛká, pà wontà ka̰hà pa cɔ̰́ɔ̰̀di-dà. ²³ Kà hà̰à̰na tɔɔ̀na de é yíí-ní nà Tìbèdìyádì yɔtí, é ta̰ntá-ní bɛ̀m̀bɛ̀ni nìcɔ̰́nì, kà nì pú nátà-nà Teó wontà sɛ́ɛ̀-sa Weèdi pɛ̰́ɛ̰̀pa kpɛ́mú, kà pá dii. ²⁴ Ye nìku bantà-ma è hɔ̰́tà Sèsíì kɔ́ɔ́ ye pesá, k'òo dapàm̀ma mɛ̀ɛ té yè kɔ́ɔ́, kà kú cemá dúú ye hà̰à̰na mɛhɛká é taá o pɛhàpu Kàpɛ̀nàúm̀.

²⁵ K'yèe nìpa é tɛ̀i dɛ́há Sèsíì baàdi sóìdi tɔɔ̀di, óò béka è yɔ̀: Dakpɛ̰́ǹn, wɔ̀ni m̀mɔ́ni-dà a ta̰ntà-ma-ní mìì? ²⁶ K'ó pà tɛ̰́ná è yɔ̀: N nɛ cakú bemú-dà. Nɛ n pɛnti nɛ wontà dii-pú kpɛ́mú-dà pɛ̰́ɛ̰̀pa é dɛn, àmá nɛ pú n pɛnti è yɔ̀pu kpɛ́mú nɛ bantà pɔ́ńtápa̰á̰ma n pa̰kú-ma cakú-sa. ²⁷ Nɛ dá n'dehú dimá mɛ̀mà hɔ̰́ cɔ̰ha-má cɔ̰́ɔ̰̀di kpɛ́mú, àmá nɛ́ n'dehú dimá mɛ̀mà pú cɔ̰hú-má kpɛ́mú è tṵ́mà kɔ̰́nì fòùmu mɛ̀mù bá yɔ̀ɔ-pu. Ye kú dimà, Niìfòùo Bíitá-dà kó mà nɛ kɔ̰́ɔ̰́, mɛntá kú hḭ́ǹka-dà mɛ̀ɛ dɛɛ̀ Báàa Weèdi pa̰à̰-ma o nɔɔ̀ti yḭḭ́pa.

²⁸ Kà p'óò béka è yɔ̀: Ntɛ́ ti yònà é hḭmà é pa̰á̰ tɔná Weèdi kpɛ̀i-ná? ²⁹ K'ó pà tɛ̰́ná è yɔ̀: Weèdi kpɛ̀i nɛ́ pa̰á̰-sa-dà héé, nɛ́ n'dań nì tɔn-kó-ní.

³⁰ Ye wɔ̀ni, kà pá tṵ́m'ɔ́ɔ̀ béka è yɔ̀: Pɔ́ńtápa̰á̰ma m̀mɔ́ma-dà a kó nɛɛ́ pa̰á̰-ma k'yé n'yòǹ yḭdó é ti bɛka k'yé teha kà tí n'àà n'dań? Tɔmú m̀mɔ́mu-dà a kó pa̰á̰-ma? ³¹ Càwenkú mɛhɛká, ti yààpa de dii dimá pà toò-ma-dà *màánì é n'yònà pà wà̰tà Weèdi pɔ̀kàta mɛhɛká è hḭ́mpú: Ò pà pɛ̰ḭ dimá mɛ̀mà yɛ̀ni-nà-ma-dà-ní hḭ́ǹka, kà pá dii. ³² Kà Sèsíì é pà caka è yɔ̀: N nɛ cakú bemú-dà, yè pú yòǹ Mɔ̀yísì-dà de nɛ pɛ̰ḭ dimá mɛ̀mà yɛ̀ni-nà-ma-ní hḭ́ǹka, àmá n Báàa-dà nɛ pɔ̰n dimá mɔ́má mɛ̀mà yɛ̀ni-nà-ma-ní hḭ́ǹka. ³³ Weèdi dimá-dà héé mɛ̀mà cútà-ma-ní nà hḭ́ǹka, è kɔ̰́nì nìpa fòùmu. ³⁴ Ye wɔ̀ni kà p'óò caka è yɔ̀: Dakpɛ̰́ǹn, kà mɛmá-dà k'á ti m'pɔ̰n daàka wɛǹni ye kú dimà-ní.

³⁵ Kà Sèsíì é pà caka è yɔ̀: Mmí-dà héé dimá mɛ̀mà kɔ̰́nì-ma fòùmu. Mɛ̀ǹǹ kó tɛ̀ni-kó-ní n pesá, kòni koò pú k'óò cɛ̰ɛ̰́ daadí yènì, mɛ̀ǹǹ mɛ̀ɛ n dań-ko nɛ́yà̰a̰kú koò pú k'óò cɛ̰ɛ̰́ daadí yènì. ³⁶ Àmá n yè nɛ cakáà-á-ma: Nɛ n dɛ́hà-á-ma, nà mɛma nɛ pú teháà é taàa nɛ dandaní n hḭ́ǹka. ³⁷ N Báàa n kɔ̰́nì-pa wɛǹni kó tɛ̀ni-í-ma-ní n pesá. N mɛ̀ɛ pú kó yeda daadí yènì mɛ̀ǹǹ kú wɛǹni kó tɛ̀ni-kó-ní n pesá, ³⁸ mìì tee-sá n pú cútà-ní nà hḭ́ǹka è kó pa̰á̰ n cɔ̰́ɔ̰̀di kú kpɛ̀imá, àmá n cútà-ní è kó pa̰á̰ mɛ̀ǹǹ tɔn-kó-ní kú kpɛ́ɛmá-dà. ³⁹ Ǹtɛ mɛ̀ǹǹ tɔn-kó-ní kpɛ̀i-sá: N pú yònà é féná òcɔ̰́ǹ ò n kɔ̰́ɔ̰̀-pa wɛǹni mɛhɛká, àmá n yònà é pà yá̰hìna-á-ma *dadèǹdèni daadí. ⁴⁰ N Báàa kpɛ̀i-sá-dà héé: Mɛ̀ǹǹ kú wɛnnì dɛ́hà-ko o bíitá, é taàa o dandaní ta hḭ́ǹka, ò kó dɛ́tá-ma fòùmu mɛ̀mù bá yɔ̀ɔ-pú, ká n ò yá̰hìna dadèǹdèni daadí.

⁴¹ Kà Sùwífùpa óò n'wṵkapú-nà, n'ɔ̀ɔ̀ de wɛdà-ma kpɛ́mú è yɔ̀ ò yòǹ dimá mɛ̀mà cútà-ma-ní nà hḭ́ǹka. ⁴² Kà pá m'békú pa tɔɔ̀pa è tonà: Sèsíì dɔ, Sòsɛ́fù bíitá-a? Ti yá̰á̰-dà-ma sukú o báàa n'ɔ̀ɔ màa! Ntɛ́ y'àá hḭmà wɔ̀nì mɛnì k'ò toò ò cútà-ní nà hḭ́ǹka?

⁴³ K'ó pà tɛ̰́ná è yɔ̀: Nɛ dá n'wṵkapú nɛ cɔ̰́ɔ̰̀di pesá! ⁴⁴ Òcɔ̰́ǹ pú kó nɛɛ́ é tɛ̀ni n pesá kà n Báàa mɛ̀ǹǹ n tɔn-kó-ní p'óò tɛɛ̀-ní n pesá. Mmí mɛ̀ɛkà, n kó wáńtá yá̰hìna-á-ma ye yaǹn dadèǹdèni daadí. ⁴⁵ Pà wà̰tà Weèdi wɛtɛ̰́nápa pɔ̀kàhi mɛhɛká è yɔ̀: Weèdi-dà kó biɔhàna nìpa wɛǹni. Mɛ̀ǹǹ kú wɛǹni besí-ko Báàa, é ta̰ǹta o biɔhànamá, mɛnń-dà kɔ́dí-ní n pesá. ⁴⁶ Mii pú kpɛ̀i caka è yɔ̀ òcɔ̰́ǹ dɛ́hà Báàa, ṵ́ṵ̀. Mɛ̀ǹǹ yɛ̀ni-nà-ko-ní Weèdi pesá, mɛnń cɔ̰́ɔ̰̀di-dà dɛ́hà Báàa. ⁴⁷ N nɛ cakú bemú-dà, mɛ̀ǹǹ n dań-ko, ò káá-ma fòùmu mɛ̀mù bá yɔ̀ɔ-pú. ⁴⁸ Mmí, n yòǹ dimá mɛ̀mà kɔ̰́nì-ma-dà fòùmu. ⁴⁹ Nɛ yààpa de dii-í-ma màánì càwenkú mɛhɛká, nà mɛma pà koò pú kadí. ⁵⁰ Dimá mɛ̀mà cútà-ma-ní nà hḭ́ǹka, mɛmá-dà miì. Kà nìi mà dii ò pú kó kpíí. ⁵¹ Mmí-dà héé dimá mɛ̀mà cútà-ma-ní nà hḭ́ǹka è kɔ̰́nì fòùmu. Kà nìi dii ye kú dimà, ò kó n'fòù-ú-ma k'yé n'kɔ́ɔ́ yɔ̀ɔmá. Dimá n kó kɔ̰́ɔ̰́-ma-dà héé n wɔ̰̀ǹku. N mà kɔ̰́nì fòùku-dà è yɔ̀ kú n'fòù.

⁵² Sùwífùpa yeèkaà-ma mɛma, kà pá cemá cetá è há̰kádí pa cɔhɔ̀ka, è békú pa tɔɔ̀pa è tonà: Ntɛ́ nìì mɛnǹ kó nɛɛ́ ti kɔ̰́kaà o wɔ̰̀ǹku kà tí dii? ⁵³ Kà Sèsíì é pà caka è yɔ̀: N nɛ cakú bemú-dà, kà nɛ pú dii Niìfòùo bíitá wɔ̰̀ǹku, é nìì-nà ta hḭ̀ma, fòùmu kɔ́ɔ́ nɛ mɛhɛká. ⁵⁴ Mɛ̀ǹǹ kó dii-kó n wɔ̰̀ǹku, é yà̰à̰ n hḭ̀ma, ye yaǹn kó n'káá-ma fòùmu mɛ̀mù bá yɔ̀ɔ-pú, n mɛ̀ɛ kó wáńtá óò yá̰hìna-á-ma dadèǹdèni daadí. ⁵⁵ N wɔ̰̀ǹku yòǹ dipú mɔ́mmú-dà, kà n hḭ̀ma yòǹ *yà̰à̰sa mɔ́myá̰. ⁵⁶ Kà mɛ̀ǹǹ dii-kó n wɔ̰̀ǹku, è nìì n hḭ̀ma, ye yaǹn n múń-nà-á-ma, kà n ò múń-nà. ⁵⁷ É n'yònà n Báàa mɛ̀ǹǹ n tɔn-kó-ní fòù-ma è tee kà n fòù, mɛ̀ǹǹ kó dii-kó n wɔ̰̀ǹku n mɛ̀ɛ té kó n'tee-é-ma k'ó n'fòù. ⁵⁸ Dimá mɛ̀mà cútà-ma-ní nà hḭ́ǹka, mɛmá-dà miì. Mà pú yònà nɛ yààpa de dii-má. Pà de mà dii-í-ma, p'oòcɔ̰́ǹ há̰ koò pú kadí. Mɛ̀ǹǹ há̰ kó dii-kó ye dimà mɛmà, ò kó n'fòù-ú-ma k'yé n'kɔ́ɔ́ yɔ̀ɔmá. ⁵⁹ Sèsíì de wɛdà ye wɛmà-ní, è péé Kàpɛ̀ɛ̀nàúm̀ Weèdi wɛmá biɔhà-nàmɔ̀ni mɛhɛká-dà è biɔhànì.

Wɛmá mɛ̀mà kɔ̰́nì-ma fòùmu mɛ̀mù bá yɔ̀ɔpú

⁶⁰ Pà yèkaà-ma k'ó wɛdá mɛma, k'òo dapàm̀ma dɔ́ɔ́di yɔ̀: Wɛmà ò wɛdà-mà mà tà̰hì-í-ma. Wodà kó nɛɛ́ mà teha? ⁶¹ Kà Sèsíì é bantá è yɔ̀ ò wɛɛ̀-sa pú teháà o dapàm̀ma, kà pà wṵkapú ye hḭ́ǹka. K'ó pà béka è yɔ̀: Yè nɛ tɔ̰dí-ma? ⁶² Ntɛ́ y'àá kó nɛ n'yòmù, kà nɛ dɛ́hà Niìfòùo bíitá kà tà dìkìdì è tóńti tà de péé-ka-ní bɛ́ka? ⁶³ Weèdi Sèdi-dà kɔ̰́nì nìpa fòùmu. Nìdo pú kó nɛɛ́ pa̰á̰ miya̰. Wɛmá n nɛ cakáà-ma péé-nà-ní Weèdi Sèdi pesá-dà, mɛmá-dà mɛ̀ɛ kɔ̰́nì fòùmu. ⁶⁴ Àmá pàcɔ̰́ nɛ mɛhɛkà pú dań. Sèsíì de yá̰á̰-ma nà cetáma-ní mɛ̀m̀pà de pú dań-pa, nà mɛ̀ǹǹ de k'óò yɛda-kó. ⁶⁵ K'ó tuɛ̀ha è yɔ̀: Ye kú kpɛ́mú-dà tee n nɛ cakáà-ma è yɔ̀, òcɔ̰́ǹ pú kó nɛɛ́ tɛ̀ni n pesá kà n Báàa pú tee.

⁶⁶ É tódá ye kú wɔ̀ni, k'òo dapàm̀ma dɔ́ɔ́di é kpaàta dàhàka, pà koò p'óò nɔhú-nà. ⁶⁷ Kà Sèsíì é béka o dapàm̀ma píì-pàdɛ́ɛ́ è yɔ̀: Nɛ́na tá, nɛ mɛ̀ɛ té pú kpɛ̀i é ka̰há? ⁶⁸ Kà Sìmɔ́-Píyɛ́ɛ̀ óò tɛ̰́ná è yɔ̀: Ti Teù, woò kú peyà-dà ti kó taá-ma? Fɔ̰́ń-dà káá wɛmá mɛ̀mà kɔ̰́nì-ma fòùmu mɛ̀mù bá yɔ̀ɔpú. ⁶⁹ Tḭ́ńti dań-ma è yá̰á̰ è yɔ̀ fɔ̰́ń-dà Weèdi batà-ma áa tɔn-ní. ⁷⁰ Kà Sèsíì é pà tɛ̰́ná è yɔ̀: Mmí pú nɛ ta̰kadà nɛ píì-pàdɛ́ɛ́ dò? Nà mɛma baàkaà, n'ɔɔ̀cɔ̰́ yòǹ wɛɛ̀kupá wódo kóoó-dà. ⁷¹ Ò de wɛì Sùdásì-dà, Sìmɔ́ɔ̀ Ìsìkàdìyɔ́tì bíitá. Mɛnń-dà de k'óò yɛda, n'ɔ̀ɔ̀ baà de yòǹ-sà o dapàm̀ma píì-pàdɛ́ɛ́, p'oòcɔ̰́.