Ìsá̰à̰ 9

Sèsíì kpekànà dɔɔ̀o òcɔ̰́ǹ k'ò yɔ̀n nà p'òò pɛdà-ma

¹ Ye kú dàhàka, kà Sèsíì é n'kɛ̰hɛdi, é dɛ́há cɔ̀ku hḭ́ǹka dɔɔ̀o òcɔ̰́ǹ k'ò yòǹ yɔ̀ǹn nà p'òò pɛdà-ma. ² K'òo dapàm̀ma óò béka è yɔ̀: Dakpɛ̰́ǹn, baà tee kà pá pɛdá dɔɔò mɛnǹ k'ò yɔ̀n? O mɔ́nń-dà pa̰à̰ sḭ̀ḭ̀ma nkɛ́ɛ̀ o báàpa-dà pa̰à̰ sḭ̀ḭ̀ma k'yóò hḭn-nà mɛma?

³ Kà Sèsíì é pà tɛ̰́ná è yɔ̀: Yè pú yòǹ mɛnń yoo o báàpa-dà pa̰à̰ sḭ̀ḭ̀ma k'yóò hḭn mɛma. O yɔ̀ǹkù-dà kó hédá kà Weèdi é bɛka o hḭ́ǹka ni kpeèti sá̰pu. ⁴ Yè békú tí pa̰á̰ mɛ̀ǹǹ n tɔn-kó-ní dehèna-dà kà wèǹku kadí. Yèǹka-dà pení k'òcɔ̰́ǹ koò pú kó nɛɛ́ deha. ⁵ N káà péé-mà fòùkù mɛhɛkà, n yòǹ wenkú-dà mɛ̀ǹkù tìi-kú nìpa. ⁶ Ò wɛdà-ma mɛma é yɔ̀a, é tṵ́dá nuǹtɔ̰tí teǹka, é butá tá̰à̰ti, é tódá ye tá̰à̰ti é sɔ̰́hí ye yɔ̀ǹn nɔ̀ǹci, ⁷ ye wɔ̀ni óò caka è yɔ̀: Taá é yudá a yìhìka bínhɔɔ̀dí pà toò-di Sìdòwéè mɛhɛká. (Ye yèdì kpɛ̀i é n'yɔ̀ tɔnkó-dà.) K'yèe yɔ̀ǹn é ka̰há, é tɛ̀i yudá o yìhìka, é n'tóńti-ní è dìi pópóí.

⁸ Ò dentɔɔ̀pa nà mɛ̀m̀pà de ò dɛ́hù-pa k'ò cɔ̀hu, kà pà békú pa tɔɔ̀pa è tonà: Yè pú yòǹ dɔɔ̀o mɛ̀ǹǹ de kaàdi-kó-dà miì è cɔ̀hu? ⁹ Kà pàcɔ̰́ tonà: Mɛnń-dà. Kà tɔɔ̀pa tonà: Mɛnn dɔ, òò yònà-á-ma. K'yèe dɔɔ̀o mɔ́nń tonà: Mmí-dà n fòùo n fòùo. ¹⁰ Kà p'óò béka è yɔ̀: Ntɛ́ yè hḭmà k'àa nɔ̀ǹci é diìda? ¹¹ K'ó tɛ̰́ná è yɔ̀: Nìdo pà toò-ko Sèsíì-dà butà tá̰à̰ti cɛ̰́ma é sɔ̰́hí n nɔ̀ǹci, é n caka è yɔ̀, ń taá yudá Sìdòwéè bínhɔɔ̀dí mɛhɛká. Ká n taá é tɛ̀i é yudá, kà n nɔ̀ǹci é diìda póí. ¹² Kà p'óò béka è yɔ̀: Ye nìi péé ya-dà? K'ó tɛ̰́ná è yɔ̀: N pú yá̰á̰ ò péé-sa.

Fàdísìpa békú ye yɔ̀ǹn pà dìhìna-ko

¹³ Kà pá tanà ye yɔ̀ǹn pà dìhìna-ko Fàdísìpa pesá. ¹⁴ Y'àá de hɔ̰́tà damuhipàdi daadí-dà Sèsíì de butà-ma tá̰à̰ti óò dìhìna. ¹⁵ Ye kú kpɛ́mú-dà tee kà Fàdísìpa mɛ̀ɛ té béka ye dɔɔ̀o, yè hḭmpú k'ò yɔ̀ɔ è dìi-nà. K'ó pà caka è yɔ̀: Ò sɔ̰́hí n nɔ̀ǹci-dà tá̰à̰ti cɛ̰́ma, ká n taá é yudá é n'hɔ̰́tà n dìi póí.

¹⁶ Kà Fàdísìpa pàcɔ̰́ yɔ̀: Nìi mɛ̀ǹǹ hḭn-kó mɛma pú yòǹ Weèdi kóoó, mìì tee-sá ò pú tṵnà kpɛ̰́ńtìnùka hḭ́mpú damuhipàdi hḭ́ǹka. Àmá kà tɔɔ̀pa tonà: Ntɛ́ niìsḭ̀ǹn kó nɛɛ́ hḭmà é pa̰á̰ pɔ́ńtápa̰á̰mà mɛmà-ní? Mɛmá-dà, kà totáma é pa̰á̰ pa cɔhɔ̀ka.

¹⁷ Kà pá tṵ́má é béka ye yɔ̀ǹn pà dìhìnà-ko è yɔ̀: Fɔ̰́ń tá há̰kà, a maàhu è yɔ̀ mɛ̀ǹǹ a dìhìnà-kò yòǹ wodà? K'ó pà tɛ̰́ná è yɔ̀: Ò yòǹ Weèdi wɛtɛ̰́náko-dà.

¹⁸ Nà mɛma baàkaà, Sùwífùpa kpɛ̰́m̀ma de pú kpɛ̀i é teha è yɔ̀ ò de yɔ̀n è há̰ dìi sá̰kù. Ye kú kpɛ́mú, kà pá yíí-ní o báàpa. ¹⁹ Kà pá tɛ̀ni, kà pá pà béka è yɔ̀: Nɛ bíitá-dà miì? Mɔ́masí-dà nɛ tà pɛdà-ma kà tà yɔ̀n? Ntɛ́ yè hḭmà kà tà dìi sá̰kù?

²⁰ K'yèe báàpa é tɛ̰́ná è yɔ̀: Mɔ́masí-dà ò yòǹ-ma ti bíitá, n'ɔ̀ɔ pɛdáma-dà mɛ̀ɛ dɛɛ̀ k'ò yɔ̀n. ²¹ Àmá ti pú yá̰á̰ yè hḭmá k'ò dìi sá̰mà-ní, ti mɛ̀ɛ tṵ́mà pú yá̰á̰ mɛ̀ǹǹ ò dìhìnà-ko. Ò béka-nà o mɔ́nń-ḭ́ḭ̀, ò koò pú bíí-ma, ò kó nɛɛ́ nɛ caka-á-dà mìì ò dìi-sá. ²² O báàpa de hín mɛma, mìì tee-sá pà de wani Sùwífùpa kpɛ̰́m̀ma-dà. Yè de hɔ̰́tà pà yɔ̀ɔ pɛ́ɛ́pu-dà nùdi, è kó bɔhà Weèdi wɛmá biɔhà-nàmɔ̀ni mɛhɛká, mɛ̀ǹǹ kú wɛnnì kó n'yɔ̀-ko, Sèsíì-dà yòǹ Kídísì. ²³ Ye kú kpɛ́mú-dà tee k'òo báàpa yɔ̀: Ò koò pú bíí, ò béka-nà o mɔ́nń.

²⁴ Kà Fàdísìpa é yíí-ní dɛ́ɛ̀má ye dɔɔ̀o mɛ̀ǹǹ de yɔ̀n-kó, óò caka è yɔ̀: Caka bemú Weèdi yìhìka. Tḭ́ńti yá̰á̰ è yɔ̀ ye dɔɔò mɛnǹ yòǹ niìsḭ̀ǹn-dà. ²⁵ K'yèe dɔɔ̀o é pà tɛ̰́ná è yɔ̀: K'ò yòǹ niìsḭ̀ǹn yoo ò pú yòǹ niìsḭ̀ǹn, n pú yá̰á̰. N yá̰á̰-sa sá̰à̰di, n de yòǹ yɔ̀ǹn-dà sá̰mà è dìi póí. ²⁶ Kà p'óò béka è yɔ̀: W'àà pa̰à̰ badà? Ntɛ́ ò hḭmà áa dihìna? ²⁷ K'ó pà tɛ̰́ná è yɔ̀: N mà nɛ cakáà-á-dà-ma, nɛ pú besí-ma. Badà tee kà nɛ kpɛ̀i n tṵ́má mà kódí? Nɛ mɛ̀ɛ té dá n'kpɛ̀i é hḭn o dapàm̀ma?

²⁸ Kà p'óò tèùnà è yɔ̀: Fɔ̰́ń-dà yòǹ o dapàǹn. Tḭ́ńti yòǹ Mɔ̀yísì kú dapàm̀ma-dà. ²⁹ Ti yá̰á̰ è yɔ̀ Weèdi de wɛɛ̀-nà Mɔ̀yísì-dà. Àmá mɛnǹ mɛnn, tḭ́ńti pú yá̰á̰ ò yɛ̀ni-kà-ní bɛ́ka.

³⁰ K'yèe dɔɔ̀o é pà tɛ̰́ná è yɔ̀: Ǹtɛ mìì n dii-s'éè, nɛ́na hḭ́n-sá è yɔ̀ nɛ pú yá̰á̰ ò yɛ̀ni-kà-ní-ì! Mɛnń-dà há̰ n dihìn'ɛ̀! ³¹ Ti yá̰á̰-dà-ma è yɔ̀ Weèdi pú bekù niìsḭ̀m̀ma, àmá nì hɔ̰́ besí mɛ̀ǹǹ kú wɛnnì nì cùùnì-ko-dà, è pa̰kù ni dɔ́kàma. ³² Nà ti péé-ma, ti mum pú yeèkaà kà pà yɔ̀ òcɔ̰́ǹ dìhìnà yɔ̀ǹn kà p'òò pɛɛ̀-ní k'ò mà yòǹ. ³³ K'yèe nìdò de pú yòǹ Weèdi kóoó, ò de pú kó nɛɛ́ pa̰á̰ yècḭ́ḭ̀. ³⁴ Kà p'óò tɛ̰́ná è yɔ̀: Fɔ̰́ń mɛ̀ǹǹ yòǹ-ko sḭ̀ḭ̀ma yaǹn a tàka n'àa yudí nà p'àà pɛdà-ma-ní, fɔ̰́ń-dà kó ti kɔ̰́ɔ̰́ biɔhànamá? Ye wɔ̀ni, kà p'óò bɔ̀hà Weèdi wɛmá biɔhà-nàmɔ̀ni mɛhɛká.

Mɛ̀m̀pà yòǹ-pa yɔ̀m̀ma mɔ́mpá

³⁵ Kà Sèsíì é yekà è yɔ̀ p'òò bɔ̀haà, k'ó taá o peètanàpu é tɛ̀i óò béka è yɔ̀: Fɔ̰́ń tá, a dań-dà Niìfòùo bíitá hḭ́ǹka? ³⁶ K'óò tɛ̰́ná è yɔ̀: N caka mɛnn héé-ko n Teù, k'yé teha ká n taàa n dandaní o hḭ́ǹka. ³⁷ Kà Sèsíì óò caka è yɔ̀: A ò dìi-í-ma, mɛnń-d'àà wɛì-nà. ³⁸ Ye wɔ̀ni, k'ò yɔ̀: N dań-ma n Teù, é ceḿ hìu dúùka o yìhìka. ³⁹ Kà Sèsíì yɔ̀: N tɛ̀ni fòùkù mɛnkù kú mɛhɛká sídàma kpɛ́mú-dà, k'yé teha kà yɔ̀m̀ma é diìda, kà mɛ̀m̀pà dìi-pá é yɔ̀n. ⁴⁰ Fàdísìpa pàcɔ̰́ mɛ̀m̀pà de péé-pa ye pesá yeèkaà-ma mɛma, kà p'óò béka è yɔ̀: Tḭ́ńti mɛ̀ɛ té yòǹ yɔ̀m̀ma-d'aà? ⁴¹ Kà Sèsíì é pà tɛ̰́ná è yɔ̀: Kà nɛ de yòǹ yɔ̀m̀ma-dà, è yenì nɛ kɔ́ɔ́ sḭ̀ḭ̀ma màcɔ̰́mà. Àmá, n'aá toò-mà: Ti dìi-í-dà, ye kú kpɛ́mú-dà tee kà nɛ baà kó m'péé sḭ̀ḭ̀ma mɛhɛká.