Ìsá̰à̰ 10

Wɛbemú yohènamá nà hɔ̰ɔ̰̀cɛ̰nto n'ɔ̀ɔ hɔ̰̀ci

¹ Kà Sèsíì é tuɛ̀ha è yɔ̀: Bemú-dà n nɛ cakú-ma. Kà nìi pú dúú hɔ̰ɔ̰̀kódedí mɛhɛká nà há̰ńnùdi, àmá k'ò ha̰tà bonkú è dúú, ye yaǹn yòǹ túùdo-dà è tṵ́mà yòǹ nɛnfèùko. ² Mɛ̀ǹǹ há̰ hɔ̰́ dúú-ko hɔ̰ɔ̰̀kódedí mɛhɛká nà há̰ńnùdi, mɛnń-dà yòǹ hɔ̰ɔ̰̀cɛ̰nto. ³ Mɛ̀ǹǹ ceì-ko hɔ̰ɔ̰̀kódedí hɔ̰́ ò kpetá-ma há̰ńnùdi, kà hɔ̰̀ci té yekà o boòku. Ò hɔ̰́ yíí-ma o hɔ̰̀ci bá mɛ̀ǹfà dɛ̀ɛ̀-fa nà fa yèdi, é cì dèna tapaàdi. ⁴ Ò dènà tḭ́ń wɔ̀ni o kpɛ́cí wɛǹni, é n'nihí yìhìka kà cì n'tṵ̀n, mìì tee-sá cì yá̰á̰-ma o boòku. ⁵ Cì pú hɔ̰́ tṵṵ̀na cì pú yá̰á̰-ko. Múńdìkaà, k'ò cì yíí, cì hɔ̰́ cocí-ma óò nátá-nà, mìì tee-sá cì pú yá̰á̰ o boòku. ⁶ Sèsíì de pà cakáà ye kú wɛbemù yohènamà-dà, àmá pà pú bantà ò de kpɛ̀i é n'yɔ̀pu.

Sèsíì-dà yòǹ hɔ̰ɔ̰̀cɛ̰nto mɔ́nń

⁷ Kà Sèsíì é tṵ́má pà caka è yɔ̀: Bemú-dà n nɛ cakú-ma, mmí-dà yòǹ hɔ̰ɔ̰̀kódedí há̰ńnùdi. ⁸ Mɛ̀m̀pà kú wɛnnì cedí tɛ̀ni-pá-ní kà mum pú tɛ̀ni, yòǹ túùpa-dà è tṵ́mà yòǹ nɛnfèùpa, hɔ̰̀ci mɛ̀ɛ pú pà besí. ⁹ Mmí, n yòǹ há̰ńnùdi-dà. Kà nìdo yɛɛ̀ nà mmí è dúú, ye yaǹn kó fḭ́tá-ma. Ò kó n'dúù-ú-ma è yɛ̀hu-ní, ò mɛ̀ɛ pú kó mɔ́ńka o dipú. ¹⁰ Túùdo hɔ̰́ tɛ̀ni è kpɛ̀i é yódá-ma, é kɔ̀ù, é fɛ́úwá sá̰à̰di. Mmí, n tɛ̀ni è kpɛ̀i nìpa-dà é dɛ́tá fòùmu, é mù n'káá sàma.

¹¹ Mmí, n yòǹ hɔ̰ɔ̰̀cɛ̰nto sudó-dà. Hɔ̰ɔ̰̀cɛ̰nto sudó hɔ̰́ kɔ̰́ɔ̰́ o fòùmu-dà o hɔ̰̀ci kpɛ́mú. ¹² Mɛ̀ǹǹ pú tee-kó hɔ̰̀ci, è há̰ cì cɛ̰nti dící kpɛ́mú, pú yòǹ hɔ̰ɔ̰̀cɛ̰nto. Kà càkomɔɔ̀di pení è kó cì cɛ̰dí, ò hɔ̰́ cì yahí-ma-ho é nàa nɔ̀ka. Ye wɔ̀ni, k'yèe càkomɔɔ̀di té tɛ̀ni é dɔdi ci hḭ́ǹka, é cì pidá. ¹³ Ye kú yanǹ kú bookù hɔ̰́ hḭmpú-dà, mìì tee-sá ò dehú dící kpɛ́mú-dà, hɔ̰̀ci wɛmá p'óò yɛ̰̀ḭ. ¹⁴ Mmí, n yòǹ hɔ̰ɔ̰̀cɛ̰nsudó-dà. N yá̰á̰-ma n hɔ̰̀ci, kà n hɔ̰̀ci n yá̰á̰, ¹⁵ é n'yònà n Báàa n yá̰káàma, kà n ò yá̰á̰. N mɛ̀ɛ kɔ̰́nì n fòùmu n hɔ̰̀ci kpɛ́mú-dà. ¹⁶ N káà káá-ma hɔ̰̀ci tɔcí kà cì mum pú dúú hɔ̰ɔ̰̀kódedì mɛnì kú mɛhɛká. Yè békú n mɛ̀ɛ té cì kpɛ̀i-í-ma-ní é cì dúù-ní. Cì kó yekà-á-ma n boòku, é múná é hḭn hɔ̰ɔ̰̀kàdo òcɔ̰́, kà hɔ̰ɔ̰̀cɛ̰nto é m'pee òcɔ̰́.

¹⁷ N Báàa n dɔ́sí-ma, mìì tee-sá n kó kɔ̰́ɔ̰́ n fòùmu é tṵ́má wáńtá mù tà̰ǹta. ¹⁸ Òcɔ̰́ǹ pú mù nà n fèù, àmá n mù kɔ̰́nì nà n yàma-dà. N káá-ma nɔɔ̀ti è kó nɛɛ́ mù kɔ̰́ɔ̰́, è káá nɔɔ̀ti è kó nɛɛ́ mù tà̰ǹta. N Báàa n kɔ̰́ɔ̰̀ nùdi è yɔ̀ n pa̰á̰-sa-dà.

¹⁹ Kà totáma é tṵ́má pa̰ná Sùwífùpa cɔhɔ̀ka n'ɛ̀ɛ kú wɛmà kpɛ́mú. ²⁰ Kà pa sààpa tonà: Wɛɛ̀ko-dà péé o mɛhɛká, ò fikadà-á-ma. Baà tee kà n'ɔɔ̀ besí? ²¹ Kà tɔɔ̀pa tonà: Wɛɛ̀ko péé-ko kú mɛhɛká pú kó nɛɛ́ wɛdá mɛmà kú bookú. Wɛɛ̀ko kó nɛɛ́-dà é dihìna yɔ̀m̀ma?

Sùwífùpa yedáà Sèsíì

²² Yè de hɔ̰́tà sémú wɔ̀ni-dà, kà pà pètà Sèdìsàdɛ́m̀, è yon Weèdi hɔ̰́ɔ̰̀ta wekànamá kúúdi^a. ²³ Kà Sèsíì é n'centì è tóǹ-ní Weèdi hɔ̰́ɔ̰̀ta hà̰ǹhà̰ni mɛhɛká, pà toò-di Sàdòmɔ́ɔ̀ hà̰ǹhà̰ni. ²⁴ Kà Sùwífùpa é tɛ̀ni óò yéńtá-ho, è yɔ̀: Háá daadí m̀mɔ́ni-dà a baà kó ti caka-ma wɛbeèdi a hḭ́ǹka? Kà fɔ̰́ń-dà héé Kídísì, k'á ti caka pópóí.

²⁵ Kà Sèsíì é pà tɛ̰́ná è yɔ̀: N mà nɛ yɔ̀a cakàpu-dà, nɛ mɛ̀ɛ pú mà teháà. Dehèna n pa̰kú-na nà Báàa yèdi, mɛná-dà bɛkú n yòǹ-ko. ²⁶ Àmá nɛ́na nɛ pú dań, mìì tee-sá nɛ pú yòǹ n hɔ̰̀ci. ²⁷ N hɔ̰̀ci you-ú-ma n boòku. Mmí, n cì yá̰á̰-ma, kà cì mɛ̀ɛ n tṵ̀n. ²⁸ N cì pɛ̰ḭ fòùmu mɛ̀mù bá yɔ̀ɔpú-dà. Cì pú kó kpíí daadí yènì, òcɔ̰́ǹ mɛ̀ɛ pú kó nɛɛ́ cì fèdà n nɔ̀ku mɛhɛká. ²⁹ N Báàa mɛ̀ǹǹ cì nà n kɔ̰́ɔ̰̀-ko, ò wɛhinà-á-ma niìya̰ wɛǹni^b, òcɔ̰́ǹ mɛ̀ɛ pú kó nɛɛ́ cì fèda o nɔ̀ku mɛhɛká. ³⁰ Mmí nà n Báàa, ti yòǹ òcɔ̰́-dà.

³¹ Kà Sùwífùpa é tṵ́má é ta̰nka tá̰à̰ka, è k'óò ká̰mu é kɔ̀ù. ³² K'ò mɛ̀ɛ pà caka è yɔ̀: Nɛ dɛ́hà-á-dà dehèsuuná dɔ́ɔ́di n pa̰à̰-na nà n Báàa kpeèti. Ye dehènà, na m̀mɔ́mu kú kpɛ́mú-dà tee kà nɛ kpɛ̀i é n ká̰mu tá̰à̰ka é n kɔ̀ù? ³³ Kà Sùwífùpa óò tɛ̰́ná è yɔ̀: Ti pú kpɛ̀i áa ká̰mu tá̰à̰ka áa kɔ̀ù dehèsuumú mùcɔ̰́mù kú kpɛ̀mú, àmá ti kpɛ̀i áa ká̰mu tá̰à̰ka mìì tee-sá a teù Weèdi-dà. Fɔ̰́ń a yòǹ nìdo-dà, è há̰ tóńkú a cɔ̰́ɔ̰̀di Weèdi.

³⁴ Kà Sèsíì é pà tɛ̰́ná è yɔ̀: Pà pú wa̰tà nɛ kpɛ̰́ńtìnùka mɛhɛká è yɔ̀ Weèdi yɔ̀: Nɛ yòǹ weèka-dà^c? ³⁵ T'aá yá̰á̰-dà è yɔ̀ ti pú kó nɛɛ́ é kɔ̀ù Weèdi wɛmá màcɔ̰́m'ɛ̀. Weèdi-dà há̰ de yíí weèka nì de kɔ̰́ɔ̰̀-pa ni wɛm'ɛ́ɛ̀. ³⁶ Mmí há̰kà, Weèdi-dà n ta̰kadà é n tɔn-ní fòùku mɛhɛké-è. Ntɛ́ y'àá kó hḭmà kà nɛ yɔ̀ n teù Weèdi-dà, nà n hḭ́mpú kpɛ́mú n yòǹ Weèdi bíitá? ³⁷ Kà n pú pa̰kú n Báàa dehèna, nɛ dá nà n dań. ³⁸ Kà n há̰ nà pa̰kú-dà, bá kà nɛ pú n dań, kà nɛ́ n'dań o dehèna hḭ́ǹka, k'yé teha kà nɛ́ bantá é n'yá̰á̰ è yɔ̀ Báàa péé n mɛhɛká, kà n péé o mɛhɛká. ³⁹ Kà pá tṵ́má é pɛha pà kó hḭmá óò cɛ̰dí, àmá k'ó fḭ́tá. ⁴⁰ K'ó tón tṵ́m̀kaà Sùùtɛ̰́ɛ̰̀ kónsóìdi tɔɔ̀di bɛ́ka, é tɛ̀i é m'péé bɛ̀m̀bɛ̀ni Ìsá̰à̰ de cómù-di nìpa. ⁴¹ Kà nìku dɔ́ɔ́di kɔ́dì-ní o pesá è cakú pa tɔɔ̀pa è tonà: Ìsá̰à̰ pú pa̰à pɔ́ńtápa̰á̰ma màcɔ̰́mà. Àmá, ò de cakáà-sa wɛǹni nìì mɛnǹ kú hḭ́ǹka, yòǹ mɔ́ma-dà. ⁴² Ye pesá, kà nìku dɔ́ɔ́di é taàa ku dandaní o hḭ́ǹka.