Ìsá̰à̰ 11

Dàsáà kṵ́mú

¹ Dɔɔ̀o òcɔ̰́ǹ-dà de mɔkáà, è péé Bètàníì yɔtí, k'òo yèdi toò Dàsáà. K'òo potɔ̰ɔ̰̀pa Màdíì n'ɔ̀ɔ kúkɔ̀ɔ Màátì pɛ́ɛ̀ ò péé-nà. ² Màdíì há̰ de yòǹ poòo mɛ̀ǹǹ de cóò-ko-dà tùdàdésa Teó tàka hḭ́ǹka, é kà hṵtá n'ɔ̀ɔ yùti. O kú datɔ̰ɔ̰̀ɔ̰-dà de mɔn. ³ Mɛnń n'ɔ̀ɔ kúkɔ̀ɔ kà pá tɔn nìdo è yɔ̀ ó taá caka Sèsíì è yɔ̀: Teù, a dópo mɔn.

⁴ Sèsíì yèkaà-ma mɛma, è yɔ̀: Dɔnkù mɛnkù pú kó kònà Dàsáà. Kù kó bɛka nìpa Weèdi wɛhimú sá̰pu-dà, é tṵ́má é hédá kà ni bíitá kpɛ́mú é fodá. ⁵ Sèsíì há̰ de naa-nà-á-ma Màátì n'ɔ̀ɔ ya̰ǹn Màdíì, nà pa datɔ̰ɔ̰̀ɔ̰ Dàsáà. ⁶ Ò de yeèkaà-ma kà pà yɔ̀ Dàsáà mɔn, k'ó tṵ́má pa̰á̰ daàa kàdɛ́ɛ́-dà ye bɛ̀m̀bɛ̀ni ò de péé-di. ⁷ Ye kú dàhàka-dà, k'ó caka o dapàm̀ma è yɔ̀: Tí tón-nà Sùdéè tempáàku mɛhɛká. ⁸ K'òo dapàm̀ma óò caka è yɔ̀: Dakpɛ̰́ǹn, yè mum pú yókáà nà Sùwífùpa d'aa pɛnti-má ka bɛ́ka è k'áa ká̰mu tá̰à̰ka áa kɔ̀ù, k'àá tṵ́mà kpɛ̀i éè tón? ⁹ Kà Sèsíì é pà tɛ̰́ná è yɔ̀: Ntoò máàti píta nà tìdɛ́ɛ́-dà péé-ma weǹtṵ́ṵní mɛhɛká? Kà nìdo centì weǹtṵ́ṵní mɛhɛká, ò pú kó téúdá mìì tee-sá wenkú péé k'ò dìi póí. ¹⁰ Àmá, kà nìi centì yèǹka, ò hɔ̰́ n'téúhú-ma mìì tee-sá wenkú kɔ́ɔ́.

¹¹ Ò de wɛdà mɛmá-dà é yɔ̀ɔ, é tuɛ̀ha è yɔ̀: Ti dópo Dàsáà dɔɔ́-ma. N kɔ́dí è kó taá ò hèǹta-á-ma. ¹² K'òo dapàm̀ma óò caka è yɔ̀: Ti Teù, k'ò dɔɔ́-dà, ò kó kpeka-á-ma. ¹³ Sèsíì mɛnn de wɛì Dàsáà kṵ́mú wɛmá-dà, àmá k'òo dapàm̀ma mɛmpa tonà ò wɛì nuǹdɔmù mɔ́mù-dà. ¹⁴ Mɛmá-dà, k'ó pà caka pópóí è yɔ̀: Dàsáà kpíi-í-ma. ¹⁵ Yè n naa-á-ma nà nɛ kpɛ́mú, n'ɛ̀ɛ̀ pa̰à̰-ma kà n kɔ́ɔ́ ye pesá, k'yé teha kà nɛ́ n taàa dandaní. Tí taá-nà o pesá wɔ̀nì mɛnì. ¹⁶ Ye wɔ̀ni, kà Tòmáà, pà tṵ́mà toò-ko kpɛ́kàta é caka o tɔɔ̀pa è yɔ̀: Tɔɔ̀ta-nà kà tí taá pɛ́ɛ́ é kpíí-nà ti dakpɛ̰́ǹn.

Sèsíì-dà yòǹ yá̰ńtáma è tṵ́mà yòǹ fòùmu

¹⁷ Kà Sèsíì é n'kó ta̰ntá-ho ye pesá, é tɛ̀i è hɔ̰́tà pà dánà Dàsáà k'yè yɔ̀a daàa kànàhì. ¹⁸ Bètàníì há̰ de pú nátà-nà Sèdìsàdɛ́m̀, ye ta̰nta̰ǹni dɛumú de pú tɛ̀i kìdòmɛ́tídìpa pàta̰a̰. ¹⁹ Ye kú kpɛ́mú-dà tee Sùwífùpa de tɛ̀ni-má-ní sàma, è kó dɔa Màátì nà Màdíì nà pa datɔ̰ɔ̰̀ɔ̰ kṵ́mú. ²⁰ Màátì yèkaà-ma è yɔ̀ Sèsíì pení, k'ó taá o codápu, kà Màdíì mɛnn é cá̰ńtá è kàdi hɔ̰́ɔ̰̀ta. ²¹ K'ó tɛ̀i é caka Sèsíì è yɔ̀: N Teù, k'à de yè péé miì è yenì n datɔ̰ɔ̰̀ɔ̰ pú kpíi. ²² Àmá, n há̰ yá̰á̰-ma è yɔ̀ bá sá̰mà, k'à cɔ̀haà-sa wɛǹni Weèdi, nì k'éè n'àà kɔ̰́ɔ̰́-ma. ²³ Kà Sèsíì óò caka è yɔ̀: A datɔ̰ɔ̰̀ɔ̰ kó yá̰ńtá-ma. ²⁴ Kà Màátì óò tɛ̰́ná è yɔ̀: N yá̰á̰-ma è yɔ̀ kpíípa kó yá̰ńtá tḭ́ń daadí, dadèǹdèni daadí, ò kó yá̰ńtá-ma. ²⁵ Kà Sèsíì óò caka è yɔ̀: Mmí, n yòǹ yá̰ńtáma-dà è yòǹ fòùmu. Kà nìi n dań, ò kó n'fòù-ú-ma bá k'ò kpíi. ²⁶ Kà nìi mɛ̀ɛ fòù è n dań, ò pú kó kpíí daadí yènì. A mà teháà-á-dà? ²⁷ K'óò tɛ̰́ná è yɔ̀: À̰à̰ n Teù, n dań-ma è yɔ̀ a yòǹ Kídísì-dà, Weèdi Bíitá mɛ̀ǹtà kó tɛ̀ni-tá-ní pemá mɛhɛká.

Sèsíì kɔń

²⁸ Màátì wɛɛ̀-ma mɛma é yɔ̀ɔ, é ka̰há é taá yíí o ya̰ǹn Màdíì, óò wɛ́dá è yɔ̀: Dakpɛ̰́ǹn tɛ̀ni, è kpɛ̀i áa dɛ́há. ²⁹ Màdíì yeèkaà-ma mɛma, é cemá yíí é cocí é taá o peètanàpu. ³⁰ Yè de hɔ̰́tà Sèsíì mum pú dúú-ní yɔtí mɛhɛká. Ò de káà kaá-ní bɛ̀m̀bɛ̀ni Màátì de ò codà-di-dà. ³¹ Sùwífùpa mɛ̀m̀pà de péé-pa nà Màdíì hɔ̰́ɔ̰̀ta mɛhɛká òò yɔ́dí ò dɛ́hà-ma k'ó yíí é yɛ̀ɛ̀ feǹ-fem̀ma, kà pà mɛ̀ɛ t'óò tṵ̀na. Pà de tonà ò kɔ́dí híúdi pesá-dà è kó taá hódí. ³² Ò ta̰ntà tḭ́ń wɔ̀ni Sèsíì péé-sa, óò dɛ́há, é cemá hìu-ho o fɔ̰̀di, óò caka è yɔ̀: N Teù, k'à de yè péé miì, è yenì n datɔ̰ɔ̰̀ɔ̰ pú kpíi. ³³ Sèsíì dɛ́hà-ma k'ò hódì, kà Sùwífùpa mɛ̀m̀pà de ò bɛ́hìnà-pa-ní mɛ̀ɛ té hódì, k'yé kɔkapa o yàma dɛ́dɛ́í, kà mà yɔ̀ kɔ̰̀. ³⁴ K'ó pà béka è yɔ̀: N'ɔɔ̀ tàà ya-dà? Kà p'óò tɛ̰́ná è yɔ̀: Dakpɛ̰́ǹn, ya̰ní é dɛ́há. ³⁵ Kà Sèsíì é hódí. ³⁶ Kà Sùwífùpa cem̀ yɔ̀: Cɔ́ɔ́-nà ò d'oò dɔ́sí-ma kú bookú. ³⁷ Kà pa tɔɔ̀pa pàcɔ̰́ yɔ̀: Mɛnń-dà baà dìhìnà yɔ̀ǹn-a̰, ò de pú kó nɛɛ́ é kpáná ò kó kpíí-ma?

Dàsáà yá̰ńtáma

³⁸ K'yé tṵ́má kɔkapa Sèsíì yàma dɛ́dɛ́í, k'ó taá ye híúdi pesá. Ye híúdi de yòǹ tá̰à̰di fɔ̰̀ɔ̰kú-dà kà pá tódá tá̰hàku é kpená ni nùdi. ³⁹ Kà Sèsíì é pà caka è yɔ̀: Hḭḭ̀ta-nà ye tá̰hàkù. Kà Màátì, ye kpíìo potɔ̰ɔ̰̀ɔ̰ óò caka è yɔ̀: N Teù, ò kó n'yɔ̀ɔ toópu-dà nɔ́kú, mìì tee-sá o danàhidí-dà yenì nà p'òò dánà-ma. ⁴⁰ Kà Sèsíì óò tɛ̰́ná è yɔ̀: Mmí-dà baà a cakáà, è yɔ̀ k'à dań a kó dɛ́há Weèdi wɛhimú sá̰p'a? ⁴¹ Kà pá hḭḭ̀ta ye tá̰hàku. Kà Sèsíì é yoòda o nɔ̀ǹci hḭ́ǹka è yɔ̀: N Báà, m'a sɛdí n'àa pa̰à̰-ma m'a cɔɔ̀haà-sa. ⁴² Mmí, n yá̰á̰-ma è yɔ̀ a hɔ̰́ pa̰á̰ wɔ̀ka wɛǹni m'a cɔɔ̀hu-sá, àmá n wɛì nìkù mɛ̀ǹkù n yéńtà-kù kpɛ́mú-dà, k'yé teha kà kú n'dań è yɔ̀ fɔ̰́ń-dà n tɔn-ní. ⁴³ Ò wɛdà-ma mɛma é yɔ̀ɔ, ye wɔ̀ni é dedí kpeéma è yɔ̀: Dàsáà, yɛɛ̀ni! ⁴⁴ K'yèe kpíìo é yɛǹni, o tàka n'ɔ̀ɔ nɔ̀hi k'yè fḭń fḭń pɛ́ńcí, k'òo yìhìka pɔ̰ṵ́ kùdáapɛ́íta. Kà Sèsíì é pà caka è yɔ̀: Ò fḭntá-nà, óò hédá k'ó ka̰há.

Sùwífùpa múnà nùdi è kó kɔ̀ù Sèsíì

Dentá Màtíyéè 26.1-5; Mádíkì 14.1-2; Dúkì 22.1-2

⁴⁵ Sùwífùpa mɛ̀m̀pà de tɛ̀ni-pá-ní Màdíì hɔ̰́ɔ̰̀ta, dɛ́hà-ma Sèsíì de pa̰à̰-sa, kà pa sààpa é taàa pa dandaní o hḭ́ǹka. ⁴⁶ Àmá, kà pa tɔɔ̀pa pàcɔ̰́ é taá é dɛ́há Fàdísìpa é pà caka ò de pa̰à̰-sa. ⁴⁷ Ye wɔ̀ni, kà dɔ̀hɔ̀ka yam̀ma kpɛ̰́m̀ma nà Fàdísìpa é pehìna pa tíkáyudí sàdi nìpa, é béka pa cɔ̰́ɔ̰̀di è yɔ̀: Ntɛ́ ti kó hḭmà-dà? Nìì mɛnǹ pa̰kú pɔ́ńtápa̰á̰ma-dà sàma. ⁴⁸ Kà t'oò hédà k'ò baà sɔ̰ncí, nìpa wɛǹni kó taàa pa dandaní o hḭ́ǹka-dà. Ye wɔ̀ni, Hɔ̀dɔ́m̀ yam̀ma kó tɛ̀ni é pɔ́dá-ma ti Weèdi hɔ̰́ɔ̰̀ta, é kɔ̀ù ti bookú. ⁴⁹ Kà p'oòcɔ̰́, kà p'òò toò Kàyífù, è hɔ̰́tà ò yòǹ dɔ̀hɔ̀ka kpɛ̰́ǹn ye kú benní, k'ó pà caka è yɔ̀: Nɛ pú dìi mìì yònà é pa̰á̰-yà? ⁵⁰ Nɛ pú dìi è yɔ̀, yè kó nɛ n'tɔ̰́ṵ-nà-á-dà, nìdo òcɔ̰́ kpíí nìku kpɛ́mú, nà n'aa héé-ma kà pá tɛ̀ni é kɔ̀ù nɛ bookú? ⁵¹ Ò de pú wɛdà mɛma n'ɔ̀ɔ cɔ̰́ɔ̰̀di kú nɔɔ̀ti. Ò de yòǹ-ma kpɛ́mú dɔ̀hɔ̀di kpɛ̰́ǹn yè kú benní, ye kú kpɛ́mú-dà tee Weèdi de héè-ma k'ó wɛdá è yɔ̀, Sèsíì yònà é kpíí Sùwífùpa bookú kpɛ́mú-dà. ⁵² Y'àá de pú yòǹ ò kó kpíí Sùwífùpa bookú kpɛ́mú cɔ̰́ɔ̰̀di-dà. Ò de yònà é kpíí, è mɛ̀ɛ té tíká Weèdi bííhí wɛǹni-dà, mɛ̀ǹhì petà petà-hi, kà hí hḭn nìdo òcɔ̰́. ⁵³ É tódá n'ɛ̀ɛ kú daadí-dà, Sùwífùpa kpɛ̰́m̀ma ta̰kadà-ma è yɔ̀ pà kó kɔ̀ù Sèsíì. ⁵⁴ Ye kú kpɛ́mú-dà tee, Sèsíì de koò pú centì-ma è bɛkú o cɔ̰́ɔ̰̀di Sùwífùpa cɔhɔ̀ka. K'ó yídá ye pesá é ka̰há yɔtí pà toò-ti Èfààyím̀, kà tì hɛ́dí-nà càwenkú teǹka, k'ó tɛ̀i é m'péé ye pesá n'ɔ̀ɔ dapàm̀ma. ⁵⁵ Yè de hɔ̰́tà Sùwífùpa Núǹtiyɛ̀ɛ̀ma kúúdi-dà tɔ́sí, kà pa teǹka nìpa dɔ́ɔ́di pómù Sèdìsàdɛ́m̀ è kó taá wekàna pa cɔ̰́ɔ̰̀di k'yèe kúúdì é nɛɛ́ tɛ̀ni. ⁵⁶ Ni daadí, kà pá m'pɛnti Sèsíì, è békú pa tɔɔ̀pa Weèdi hɔ̰́ɔ̰̀ta mɛhɛká è tonà: Nɛ maàhu m̀mɔ́ma-dà? Ò pení kúúdì nkɛ́ɛ̀ ò pú pení? ⁵⁷ Dɔ̀hɔ̀ka kpɛ̰́m̀ma nà Fàdísìpa há̰ de yɔ̀ɔ cakàpu-dà nìpa, è yɔ̀ kà mɛ̀ǹǹ yá̰á̰-ko ò péé-sa, k'ó ya̰ní pà caka kà p'óò cɛ̰dí.