Ìsá̰à̰ 14

Sèsíì-dà yòǹ cɔ̀ku mɛ̀ǹkù kɔ́dì-nà-ku Báàa pesá

¹ Kà Sèsíì é pà caka è yɔ̀: Nɛ yàma dá buupa. Nɛ́ n'dań Weèdi, è mɛ̀ɛ té nà n dań. ² Kààka dɔ́ɔ́di péé-ma n Báàa hɔ̰́ɔ̰̀ta mɛhɛká. N kɔ́dí è kó tɛ̀i dɔ̀hà bá nɛ mɛ̀ǹǹ dɛ̀ɛ̀-ko-dà kààdi. K'yè pú yòǹ bemú, è yenì n pú mà nɛ cakáà. ³ Kà n taá è nɛ dɔɔ̀haà-ní kààdi è yɔ̀ɔ, n kó tóní-ma-ní é nɛ tódá é nɛ tanà n pesá, k'yé teha n kó taá m'péé-sa, kà nɛ mɛ̀ɛ t'éè m'péé. ⁴ Nɛ yá̰á̰-dà n kɔ́dí-sa ye cɔ̀ku.

⁵ Kà Tòmáà óò béka è yɔ̀: N Teù, ti pú yá̰á̰ a kɔ́dí-yà. Ntɛ́ ti kó hḭmà é n'yá̰á̰ ye cɔ̀ku? ⁶ Kà Sèsíì óò tɛ̰́ná è yɔ̀: Mmí-dà yòǹ cɔ̀ku, è yòǹ wɛbemú, è yòǹ fòùmu. Òcɔ̰́ǹ pú kó nɛɛ́ é taá Báàa pesá k'ò pú yɛɛ̀ nà mmí. ⁷ Kà nɛ n yá̰á̰, nɛ mɛ̀ɛ té kó yá̰dá-dà n Báàa. É tódá sá̰mà, n'ɔɔ̀ dɛ́hà-á-ma, òò yá̰á̰.

⁸ Kà Fìdípù óò caka è yɔ̀: N Teù, ti bɛka a Báàa yè kó ti n'sà-á-ma. ⁹ Kà Sèsíì óò tɛ̰́ná è yɔ̀: Nà n nɛ péé-nà tḭ́ń daadì, a mum pú n yá̰á̰-a̰ Fìdípù? Mɛ̀ǹǹ n dɛ́hà-ko, ò dɛ́hà n Báàa-dà. Baà tee k'à yɔ̀ ń nɛ bɛka n Báàa? ¹⁰ A pú dań è yɔ̀ n péé n Báàa mɛhɛká-dà, k'ò péé n mɛhɛká? Wɛmà n nɛ cakú-mà pú péé-nà-ní n pesá. N Báàa mɛ̀ǹǹ péé-ko n mɛhɛká-dà pa̰kú o dehèna. ¹¹ Ní n'dań-nà n nɛ hḭ́mpù-ní, è yɔ̀ n péé n Báàa mɛhɛká-dà k'ò mɛ̀ɛ té péé n mɛhɛká. Bá kà nɛ pú dań mɛma, kà nɛ́ n'dań o dehèna n pa̰à̰-na kú hḭ́ǹka. ¹² Bemú-dà n nɛ cakú-ma, mɛ̀ǹǹ n dań-ko mɛ̀ɛ té kó pa̰á̰-ma dehèna n pa̰kú-na. Ò múńtà kó pa̰á̰-na kó n'wɛhinà-á-ma n kpɛ́ɛná, mìì tee-sá n kɔ́dí n Báàa pesá. ¹³ Nɛ kó cɔhà-sa wɛǹni nà n yèdi, n k'éè pa̰á̰-ma k'yé teha kà Bíitá é wɛkàna Báàa yèdi. ¹⁴ Kà nɛ cɔɔ̀haà yècḭ́ḭ̀ nà n yèdi, n k'éè pa̰á̰-ma.

Sèsíì hḭ́nà nùdi è yɔ̀ ò kó kɔ̰́ɔ̰́-ní Weèdi Sèdi

¹⁵ Kà nɛ n dɔ́sí, nɛ kó tṵṵ̀na-á-ma n hɔ̰́ɔ̰wencí nùka. ¹⁶ Mmí, n kó cɔhà-á-ma n Báàa, k'ó nɛ kɔ̰́ɔ̰́-ní Yɔ́dàko tɔɔ̀o, k'ó tɛ̀ni é nɛ m'péé-nà wɔ̀ka wɛǹni, é nɛ n'tempú-nà. ¹⁷ Ye Yɔ́dàko-dà héé Weèdi Sèdi mɛ̀nì toó-di wɛbeèdi. Nìpa mɛ̀m̀pà pú yá̰á̰-pa Weèdi pú kó nɛɛ́ nì tà̰ǹta pa cɔhɔ̀ka, mìì tee-sá pà pú kó nɛɛ́ nì dɛ́há, pà mɛ̀ɛ pú kó nɛɛ́ nì yá̰dá. Nɛ́na mɛ̀ɛkà, nɛ nì yá̰á̰-ma, mìì tee-sá nì nɛ péé-nà, è mɛ̀ɛ kó tṵ́má é m'péé nɛ mɛhɛká.

¹⁸ N pú kó nɛ héé nɛ cɔ̰́ɔ̰̀di kà nɛ́ n'yònà kpíibíhí. N tóńti-í-ma-ní nɛ pesá. ¹⁹ Wɔ̀ni kaá cɛ̰́ma, kà fòùku kpɛ́ɛpá koò pú kó n dɛ́há. Àmá nɛ́na, nɛ kó n dɛ́há-ma, mìì tee-sá n fòù-ú-ma, kà nɛ mɛ̀ɛ té kó n'fòù. ²⁰ Ye kú daadí, nɛ kó bantá-ma è yɔ̀ mmí, n péé n Báàa mɛhɛká-dà, kà nɛ péé n mɛhɛká, kà n mɛ̀ɛ té péé nɛ mɛhɛká.

²¹ Mɛ̀ǹǹ púsi-ko n hɔ̰́ɔ̰wencí nùka, è tṵ̀n kà hḭ́mpú, mɛnń-dà n dɔ́sí. Kà mɛ̀ǹǹ n dɔ́sí-ko, n Báàa k'óò n'dɔ́sí-ma. Mmí mɛ̀ɛtékà, n k'óò n'dɔ́sí-ma, óò m'bɛkú n cɔ̰́ɔ̰̀di.

²² Kà Sùútì, é m'bààsí Sùdásì Ìsìkàdíyɔ́tì óò béka è yɔ̀: N Teù, baà tee k'à kó ti bɛka a cɔ̰́ɔ̰̀di, àá pú kó bɛka a cɔ̰́ɔ̰̀di fòùku nìpa? ²³ Kà Sèsíì óò tɛ̰́ná è yɔ̀: Kà nìdo n dɔ́sí, ò kó m'pa̰kú-ma n wɛmá hḭ́mpú. Ye wɔ̀ni, n Báàa k'óò n'dɔ́sí-ma, mmí nà n Báàa kà tí tɛ̀ni é m'péé o fòùmu mɛhɛká. ²⁴ Mɛ̀ǹǹ pú n dɔ́sí-ko, pú hɔ̰́ m'pa̰kú n wɛmá hḭ́mpú. Nɛ you kà n cakú-mà wɛmà, mà pú péé-nà-ní n pesá, mà péé-nà-ní n Báàa mɛ̀ǹǹ n tɔn-kó-ní pesá-dà.

²⁵ N nɛ cakáà miya̰, è káà nɛ péé-nà-á-ma. ²⁶ Àmá, Weèdi Sèdi mɛ̀nì yòǹ-di Yɔ́dàko, n Báàa kó tɔn-dí-ní nà n yèdi, mɛní-dà kó nɛ biɔhàna niìya̰ wɛǹni, é nɛ dehèna n nɛ cakáà-sa wɛǹni.

²⁷ N nɛ hédà wɛ̀ɛ̀di-dà. N wɛ̀ɛ̀di-dà n nɛ pɔ̰n-má. Mmí pú nì nɛ pɔ̰n fòùkù mɛnkù kú nìpa nì pɔ̰nkúma. Nɛ yàma dá buupa, nɛ mɛ̀ɛ dá n'wani. ²⁸ Nɛ yeèkaà-á-dà n nɛ cakáà-ma è yɔ̀: N kɛ̰hɛdi, àmá n tóńti-í-ma-ní nɛ pesá. Kà nɛ de n dɔ́sí, yè de kó nɛ n'naa-á-ma nà nɛ yeèkaà-ma kà n yɔ̀ n kɔ́dí n Báàa pesá, mìì tee-sá ò n wɛhinà-á-ma. ²⁹ N nɛ cakáà ye kú niì-ní sá̰mà k'yè mum pú tɛ̀ni, è kpɛ̀i k'yè tɛ̀ni tḭ́ń daadí, kà nɛ́ n'dań-ma. ³⁰ N koò pú kó nɛ wɛɛ́-nà sàma, mìì tee-sá fòùkù mɛnkù kú wódo pení. Ò pú káá kpeèti tìcɔ̰́tì n hḭ́ǹka. ³¹ Àmá, yè békú fòùkù mɛnkù kú nìpa-dà é bantá è yɔ̀ n dɔ́sí-ma n Báàa, è pa̰kú ò hḭ́n n pa̰á̰-sa. Yíí-nà miì, kà tí ka̰há.