Ìsá̰à̰ 15

Sèsíì-dà yòǹ pɛ́ɛ̀sɔ̰pú mɔ́mmú

¹ Kà Sèsíì é tuɛ̀ha è yɔ̀: Mmí, n yòǹ pɛ́ɛ̀sɔ̰pú mɔ́mmú-dà, kà n báàa yòǹ mu yaǹn. ² Dɛ̀ɛkú mɛ̀ǹkù kú wɛnnì n tásí-nà-ku è pú pɛní, ò kó kù cédá-ma. Dɛ̀ɛkú mɛ̀ǹkù kú wɛnnì pɛní-ku, ò hɔ̰́ kù som-ḿ-ma k'yé teha kà kú dɔ̀hà é pɛdá bíiká. ³ Wɛmà n nɛ cakáà-mà, mà nɛ som-ḿ-ma é yɔ̀ɔ. ⁴ Ní nà n tásí-nà é n'yònà n nɛ tásí-nà-ma kú bookú. É n'yònà dɛ̀ɛkú pú kó nɛɛ́ pɛdá-ma bíiká kà kù pú tásí-nà tepú, ma kú bookú-dà nɛ pú kó nɛɛ́ pɛɛ́-ma bííká kà nɛ pú n tásí-nà.

⁵ Mmí, n yòǹ tepú piidí-dà, kà nɛ yòǹ dɛ̀ɛcí. Mɛ̀ǹǹ n tásí-nà-ko kà n ò tásí-nà, ye yaǹn-dà kó pɛdá bíiká sàma, è yá̰á̰ nɛ pú kó nɛɛ́ pa̰á̰ yècɛ̰́ɛ̰̀ kà n kɔ́ɔ́. ⁶ Mɛ̀ǹǹ pú n tásí-nà-ko, pà k'óò wɛ́í tapaàdi-dà é n'yònà pà hɔ̰́ wɛ́í-ma kú bookú dɛ̀ɛkú kà kú kpɛí. Dɛ̀ɛcí mɛ̀ǹcì kpɛí-ci, pà hɔ̰́ cì tíkáná-ma, é cì tɔ̀n ha̰mú kà cí cɔ́dá. ⁷ Kà nɛ n tásí-nà, kà n wɛmá péé nɛ mɛhɛká, nɛ kó cɔhà-sa, nɛ k'éè dɛ́há-ma. ⁸ Kà nɛ pɛdà bíiká sàma, n Báàa yèdi kó wɛhika-á-ma, ma kú bookú-dà nɛ kó bɛka-má è yɔ̀ nɛ yòǹ n dapàm̀ma. ⁹ N nɛ dɔ́káà n báàa n dɔ́káàma kú bookú-dà. Ní m'péé-nà n dɔ́kàma mɛhɛká. ¹⁰ Kà nɛ tṵnà n hɔ̰́ɔ̰wencí nùka, nɛ kó m'péé n dɔ́kàma mɛhɛká-dà é n'yònà n tṵnà-ma kú bookú n báàa hɔ̰́ɔ̰wencí nùka è péé o dɔ́kàma mɛhɛká.

¹¹ N nɛ wɛɛ̀-nà mɛma, è kpɛ̀i n yaǹnaakú-dà é nɛ m'péé-nà, k'yé teha kà nɛ yaǹnaakú é cɛ̰ɛ̰̀na. ¹² Ǹtɛ hɔ̰́ɔ̰wencí nùdi n nɛ kɔ̰́nì-di: Nɛ́ n'dɔ́sí nɛ tɔɔ̀pa é n'yònà n nɛ dɔ́sí-ma kú bookú. ¹³ Dɔ́kàma sàma nìdo kó nɛɛ́ bɛka-má-dà héé ó kɔ̰́ɔ̰́ o fòùmu o dóòpa kpɛ́mú. ¹⁴ Kà nɛ pa̰kú n hḭ́mpú, nɛ kó n'yòǹ n dóòpa-dà. ¹⁵ N koò pú kó nɛ n'yún dehèpa, mìì tee-sá deho pú hɔ̰́ n'yá̰á̰ o dakpɛ̰́ǹn pa̰kú-sa. N nɛ yún n dóòpa-dà mìì tee-sá, n nɛ bɛkáà-á-dà n Báàa n bɛkáà-sa wɛǹni. ¹⁶ Yè pú yòǹ nɛ́na-dà n bàtà, àmá mmí-dà nɛ batà é nɛ tɔn è yɔ̀ nɛ́ taá é pɛɛ́ bíiká mɛ̀ǹkà kó yóka-ká. Kà nɛ hḭn mɛma, n Báàa kó nɛ kɔ̰́ɔ̰́-ma nɛ k'óò cɔ̀hà-sa wɛǹni nà n yèdi. ¹⁷ Nùdi n nɛ hḭ́nì-di-dà héé, nɛ́ n'dɔ́sí nɛ tɔɔ̀pa.

Fòùkù mɛnkù kú nìpa kó nɛ n'sɛ̰ɛ̰́-ma

¹⁸ Kà fòùku nìpa nɛ sɛ̰ɛ̰́, kà nɛ́ n'yá̰á̰ è yɔ̀ pà cedí é sɛ̰dá mmí-dà. ¹⁹ Kà nɛ de yòǹ fòùku kpɛ́ɛpá, è yenì fòùkù mɛnkù kú nìpa nɛ dɔ́sí-ma, mìì tee-sá nɛ yòǹ ku kpɛ́ɛpá-dà. Há̰kà, n nɛ batà é nɛ deèna-ní fòùku mɛhɛká, kà nɛ koò pú yòǹ ku kpɛ́ɛpá, mií-ì tee kà kù nɛ sɛ̰ɛ̰́. ²⁰ Nɛ́ deǹta wɛmá n nɛ cakáà-ma è yɔ̀: Dapàǹn òcɔ̰́ǹ pú hɔ̰́ n'wɛhi-nà o dakpɛ̰́ǹn. Kà nìpa n dià náńkú, kà nɛ́ n'yá̰á̰ è yɔ̀ pà mɛ̀ɛ té kó kù nɛ diá-ma. Kà pà tṵ̀na n wɛmá, pà mɛ̀ɛ té kó tṵṵ̀na-á-ma nɛ kpɛ́ɛmá. ²¹ P'àá kó nɛ pa̰á̰ mii kú wɛnnì, nà mmí kú yèdi kpɛ́mú-dà, mìì tee-sá pà pú yá̰á̰ mɛ̀ǹǹ n tɔn-kó-ní. ²² Kà n de pú tɛ̀ni é pà wɛɛ́-nà, è yenì pà kɔ́ɔ́ sḭ̀ḭ̀ma màcɔ̰́mà. Sá̰mà-ní, pà koò kɔ́ɔ́ kɔḿmà pa sḭ̀ḭ̀ma hḭ́ǹka. ²³ Mɛ̀ǹǹ n sɛ̰ɛ̰́-ko, mɛ̀ɛ té sɛ̰ɛ̰́-ma n Báàa. ²⁴ Kà n de pú pa̰à̰ dehèna tɔɔ̀o òcɔ̰́ǹ pú pa̰á̰-na daadí yènì pa cɔhɔ̀ka, è yenì pà kɔ́ɔ́ sḭ̀ḭ̀ma màcɔ̰́mà. Sá̰mà-ní, pà dɛ́hà-á-ma dehèna n pa̰à̰-na, àá n sɛ̰ɛ̰́ é pɛ́ɛ́ nà n Báàa. ²⁵ Ye kú niì de pa̰à̰ mìì tee-sá pa kpɛ̰́ńtìnùka mɛhɛká, pà wà̰tà wɛmá è yɔ̀: Pà n sɛ̰ɛ̰́ hécí-dà.

²⁶ Yɔ́dàko n kó tɔn-kó-ní nà n Báàa yèdi, ò yòǹ Weèdi Sèdi-dà mɛ̀nì toó-di wɛbeèdi. Ò péé-nà-ní n Báàa pesá-dà. Ò kó tɛ̀ni tḭ́ń daadí, é n'cakú nìpa n yòm̀pu-dà. ²⁷ Nɛ́na mɛ̀ɛtékà, nɛ kó n'cakú-ma nìpa n yòm̀pu, mìì tee-sá nà cetáma-ní, nɛ n m'péé-nà-á-ma.