Ìsá̰à̰ 16

¹ N nɛ cakáà miya̰ è kpɛ̀i nɛ dandaní-dà dá fédí. ² Pà kó nɛ bɔhà-á-ma Weèdi wɛmá biɔhà-nàmɔ̀ka mɛhɛká. Wɔ̀ni múńtà pení-ma-ní kà mɛ̀m̀pà kú wɛnnì kó nɛ kɔ̀ù-pa kó m'maàhu è tonà pà pa̰kú Weèdi tɔmú-dà ma kú bookú. ³ Pà kó pa̰á̰ miya̰, mìì tee-sá pà pú yá̰á̰ n Báàa, pà mɛ̀ɛ pú yá̰á̰ n mɔ́nń. ⁴ N há̰ yè nɛ cakáà, è kpɛ̀i k'yèe wɔ̀ni-dà wáńtà tɛ̀ni, kà nɛ́ deǹta è yɔ̀ n de yè nɛ cakáà-ho.

Weèdi Sèdi tɔná

N p'éè nɛ cakáà-ní nà cetáma, mìì tee-sá n de pɛ́ɛ̀ nɛ péé-nà-á-ma. ⁵ Sá̰mà-ní, n kɛ̰hɛdi mɛ̀ǹǹ n tɔn-kó-ní pesá-dà. N'ɔɔ̀cɔ̰́ǹ há̰ pú n békú è tonà: Aá kɔ́dí ya? ⁶ N há̰ nɛ wɛɛ̀-nà-mà mɛma, ye kú kpɛ́mú-dà tee kà nɛ yàma é cɔ̰ha dɛ́dɛ́í. ⁷ N mɛ̀ɛ nɛ cakú-sà yòǹ bemú-dà. Kà n ka̰hà, yè kó nɛ n'tɔ̰ṵ-nà-á-ma, mìì tee-sá kà n pú ka̰hà, Yɔ́dàko pú kó tɛ̀ni nɛ pesá. Kà n há̰ ka̰hà, n k'óò nɛ kɔ̰́ɔ̰́-ma-ní. ⁸ Ò kó tɛ̀ni tḭ́ń daadí, ò kó héé-ma kà fòùku nìpa é bantá mìì yòǹ-sa sḭ̀ḭ̀ma, mìì yòǹ-sa coóma, nà mìì yòǹ-sa Weèdi sídàma. ⁹ Ò kó héé-ma kà pá bantá mìì yòǹ-sa sḭ̀ḭ̀ma, mìì tee-sá pà pú n dań, ¹⁰ é héé kà pá bantá mìì yòǹ-sa coóma, mìì tee-sá n kɛ̰hɛdi Báàa pesá kà nɛ koò pú kó n dɛ́há, ¹¹ é héé kà pá bantá mìì yòǹ-sa sídàma, mìì tee-sá Weèdi yɔ̀ɔ sídàpu-dà fòùkù mɛnkù kú wódo.

¹² N tṵ́mà káá-ma niìya̰ dɔ́ɔ́di è de kó nɛɛ́ éè nɛ caka, àmá nɛ mum pú kó nɛɛ́ éè yèkà sá̰mà-ní. ¹³ Weèdi Sèdi mɛ̀nì toó-di wɛbeèdi kó tɛ̀ni tḭ́ń daadí, nì kó nɛ túdí-ma wɛbeèdi wɛǹni mɛhɛká. Nì pú kó tɛ̀ni é n'wɛì nà ni cɔ̰́ɔ̰̀di kú nɔɔ̀ti, àmá nì kó wɛdá nì yèkaà-sa wɛǹni-dà, é nɛ caka mìì kó tɛ̀ni-sá-ní. ¹⁴ Nì kó tɛ̀ni é wɛkàna n yèdi-dà, mìì tee-sá nì kó nɛ n'cakú nì yèkaà-ma-dà n pesá. ¹⁵ N Báàa káá-sa wɛǹni, yòǹ n kpɛ́ɛsá-dà. Ye kú kpɛ́mú-dà tee, kà n yɔ̀ nì kó tódá nì yèkaà-ma-dà n pesá é mà nɛ caka.

Nɛ yaǹcɔ̰hɔ̰̀ma kó wáńtá é peǹta é hḭn yaǹnaakú

¹⁶ Daàka cɛ̰́ma mɛhɛká, nɛ koò pú kó n dɛ́há. Ka kú dàhàka, kà nɛ́ tṵ́má n dɛ́há [è yá̰á̰ n kɔ́dí n Báàa pesá-dà].

¹⁷ Ye wɔ̀ni, k'òo dapàm̀ma pàcɔ̰́ é m'békú pa tɔɔ̀pa è tonà: Ò yɔ̀, daàka cɛ̰́ma mɛhɛká ti koò pú k'óò dɛ́há, ka kú dàhàka kà tí tṵ́m'ɔ́ɔ̀ dɛ́há, è tṵ́mà yɔ̀, ò kɔ́dí o Báàa pesá-dà. Ye kú wɛmà kpɛ̀i é n'yɔ̀ badà? ¹⁸ Kà pà tṵ́mà yɔ̀: Ye daàka cɛ̰́ma ò wɛì-kà kú wɛmà kpɛ̀i é n'yɔ̀ badà? Ti pú yá̰á̰ ò wɛì-sa kú hḭ́ǹka.

¹⁹ Kà Sèsíì é bantá è yɔ̀ pà de kpɛ̀i óò béka, k'ó pà caka è yɔ̀: Nɛ békú nɛ tɔɔ̀pa-dè n kpɛ̀i é n'yɔ̀pu n hḭ́n-má è yɔ̀ daàka cɛ̰́má mɛhɛká, nɛ koò pú kó n dɛ́há, ka kú dàhàka kà nɛ́ tṵ́má n dɛ́hé-è? ²⁰ Mɔ́ma-dà n nɛ cakú-ma. Nɛ kó wáńtá n'hódì-í-ma è híkápú-nà, k'yè naa fòùkù mɛnkù kú nìpa. Nɛ kó wáńtá é m'péé yaǹcɔ̰hàma mɛhɛká-dà, àmá nɛ yaǹcɔ̰hàma kó peǹta-á-ma é hḭn yaǹnaakú. ²¹ Kà poòo kó pɛdá, o yàma hɔ̰́ cɔ̰ha-á-ma, mìì tee-sá o náńkú wɔ̀ni-dà tɛ̀ni. Àmá kà bíitá yɔ̀ɔ dɔɔpú-ní, k'yè té ò naaka, k'ò dúí o náńkú, mìì tee-sá ò pɛdà nìdo fòùku mɛhɛká. ²² Nɛ́na mɛ̀ɛtékà, nɛ yàma cɔ̰háà-á-ma sá̰mà-ní, àmá n kó tṵ́má nɛ dɛ́há-ma, ye wɔ̀ni kà nɛ yàma é naaka. Òcɔ̰́ǹ mɛ̀ɛ koò pú kó nɛ deèda ye kú yaǹnaakú.

²³ Ye kú daadí kó tɛ̀ni tíń daadí, nɛ koò pú kó n béka yècɛ̰́ɛ̰̀ kú hḭ́ǹka. Mɔ́ma-dà n nɛ cakú-ma, nɛ kó cɔhà-sa n Báàa nà n yèdi, ò k'éè nɛ kɔ̰́ɔ̰́-ma. ²⁴ Háá sá̰mà, nɛ mum pú cɔɔ̀haà yècɛ̰́ɛ̰̀ nà n yèdi. Cɔhà-nà, nɛ kó dɛ́há-ma k'yé teha kà nɛ yaǹnaakú é cɛ̰ɛ̰̀na.

Sèsíì nɛdà fòùku

²⁵ N nɛ cakáà mii kú wɛnnì nà wɛbemú yohènamá-dà. Àmá, wɔ̀ni pení-ma-ní, kà n koò pú kó nɛ wɛɛ́-nà ma kú bookú. N kó nɛ wɛɛ́-nà pópóí-dà mìì nɔɔ̀-nà-sa n Báàa wɛmá. ²⁶ Ye kú daadí, nɛ té kó cɔhà yècḭ́ḭ̀ n Báàa nà n yèdi-dà. N há̰ pú hḭ́n n k'óò cɔ̀hà nɛ kpɛ́mú, ²⁷ mìì tee-sá, n Báàa mɔ́nń nɛ dɔ́sí-ma. Ò nɛ dɔ́sí è yɔ̀pu kpɛ́mú-dà nɛ n dɔ́sí è dań è yɔ̀ n yɛɛ̀ni-nà-ní o pesá. ²⁸ N yɛɛ̀ni nà n Báàa pesá-dà é tɛ̀ni fòùku mɛhɛká. Sá̰mà-ní, è kó yídá fòùkù é tón n Báàa pesá.

²⁹ Ye wɔ̀ni, k'òo dapàm̀ma óò caka è yɔ̀: Ǹtɛ sá̰mà-ní, k'à wɛì pópóí-ì è koò pú ti wɛì-nà wɛbemú yohènam'ɛ́ɛ̀. ³⁰ Ti yá̰á̰-ma sá̰mà-ní è yɔ̀ a yá̰á̰ niìya̰ wɛǹni. A pú hɔ̰́ n'ceí nìd'áa béka ò màhu-sá kú hḭ́ǹka k'á nɛɛ́ óò tɛ̰́ná. Mɛmá-dà tee ti dań-ma è yɔ̀ a yɛɛ̀ni-nà-ní Weèdi pesá-dà.

³¹ Kà Sèsíì é pà béka è yɔ̀: Nɛ dań-dà sá̰mà máḿmáḿ? ³² Wɔ̀ni pení-ma-ní, nì mɛ̀ɛ yɔ̀ɔ tɛ̀mpú-dà-ní, kà nɛ kó wiìda nɛ bɛ́kà bɛ́kà, bá mɛ̀ǹǹ dɛ̀ɛ̀-ko, k'ó kòǹ o hɔ̰́ɔ̰̀ta é n héé n cɔ̰́ɔ̰̀di. N há̰ pú yòǹ n cɔ̰́ɔ̰̀di, mìì tee-sá n Báàa n m'péé-nà-á-ma. ³³ N nɛ cakáà miya̰ è kpɛ̀i nɛ́ n'káá wɛ̀ɛ̀di-dà ti múnáma mɛhɛká. Nɛ kó dii náńkú-dà fòùku mɛhɛká, àmá nɛ́ n'káá kṵnnɔ̀ǹci, n nɛdà-á-ma fòùku.