Ìsá̰à̰ 13

Sèsíì hɛdà o dapàm̀ma tàka

¹ Núǹtiyɛ̀ɛ̀ma kúúdi-dà de hà̰n. Kà Sèsíì yá̰á̰ è yɔ̀ wɔ̀ni-dà tɛ̀i k'yè békú ó yíí pemà mɛmà kú mɛhɛká, é dìsi o Báàa pesá. Ò de dɔ́sí-ma o dapàm̀ma mɛ̀m̀pà de péé-pa pemá mɛhɛká, è pà dɔ́sí háá k'yé yó ha̰tá-ho.

² Ye daadí yohokú, mɛnń n'ɔ̀ɔ dapàm̀ma kà pá n'kaàdi è yon, è hɔ̰́tà Wɛɛ̀kupá wódo yɔ̀ɔ taàpú Sùdásì yàma mɛhɛká è yɔ̀ ó yɛda Sèsíì. Ye Sùdásì de yòǹ Sìmɔ́ɔ̀ Ìsìkàdíyɔ́tì bíitá-dà. ³ Sèsíì há̰ de yá̰á̰-ma è yɔ̀ ò péé-nà-ní Weèdi pesá è mɛ̀ɛ tóńti ni pesá, è yá̰á̰ è yɔ̀ o Báàa-dà tàà niìi wɛǹni o nɔ̀hi mɛhɛká. ⁴ Ye wɔ̀ni, k'ó yíí-ní dipú pesá, é bátá o tókedɛudí, é tódá pɛnhṵtáku é cɛ̰́ṵ́wá o kɔɔ̀ka. ⁵ K'ó pa̰á̰ nɛ́ɛmá caadí mɛhɛká, é cetá è pɔ̀kù o dapàm̀ma tàka, è kà hṵṵkú nà pɛnhṵtáku ò de cɛ̰́ṵ́-ku o kɔɔ̀ka. ⁶ K'ó tɛ̀i Sìmɔ́ɔ̀ Píyɛ́ɛ̀ pesá, k'óò caka è yɔ̀: N Teù, kà fɔ̰́ń é n hɛdá n tàka? ⁷ Kà Sèsíì óò tɛ̰́ná è yɔ̀: N pa̰kú-sà miì, a pú yá̰á̰ yè kpɛ̀i é n'yɔ̀pu sá̰mà-ní, àmá yè kó m'pení k'á yè bantá-ma. ⁸ Kà Píyɛ́ɛ̀ óò caka è yɔ̀: Fɔ́ú! N pú cédí k'á hɛdá n tàka. Kà Sèsiì óò tɛ̰́ná è yɔ̀: Kà n pú kà n'àà hɛdà, a pú kó dɛ́tá yècɛ̰́ɛ̰̀ n pesá. ⁹ Kà Sìmɔ́ɔ̀ Píyɛ́ɛ̀ óò caka è yɔ̀: Kà mɛmá-dà n Teù, yè koò pú kó n'yòǹ n tàka cɔ̰́ɔ̰̀di, pɛ́ɛ́ hɛdá n nɔ̀hi nà n yudí. ¹⁰ Kà Sèsíì óò caka è yɔ̀: Mɛ̀ǹǹ hɔ̀ɔ-kó, yè koò pú békú ó tṵ́má hɔɔ̀di o wɛǹni ye wɔ̀ni n'ɛ̀ɛ wɔ̀ni, k'yè pú yòǹ ó hɛdá o tàka cɔ̰́ɔ̰̀di mìì tee-sá ò weni-í-dà o wɛǹni. Nɛ́na, nɛ wení-dà, àmá nɛ wɛǹni há̰ pú dɛɛ. ¹¹ Ò de yɔ̀ɔ yá̰á̰pu-dà mɛ̀ǹǹ k'óò yɛda-kó, ye kú kpɛ́mú-dà tee k'ò de yɔ̀ pà pú weni pa wɛǹni.

¹² Ò pà hɛdà-ma pa tàka é yɔ̀ɔ, é tódá o tókedɛudí é bádí, é tón é kaàdi è kó dii, ye wɔ̀ni é pà béka è yɔ̀: Nɛ bantà-á-dà n nɛ pa̰à̰-sà miì-ní-i? ¹³ Nɛ n yún Dakpɛ̰́ǹn, è n yún Teó, nɛ naa-á-ma mìì tee-sá n yòm̀pu-dà. ¹⁴ Mmí yòǹ-mà Dakpɛ̰́ǹn nà Teó é nɛ hɛdá nɛ tàka, nɛ́na mɛ̀ɛtékà nɛ yònà é kà n'hɛní-ma nɛ tɔɔ̀pa. ¹⁵ N nɛ kɔ̰́ɔ̰̀ yohènamá-dà è yɔ̀ nɛ mɛ̀ɛ t'éè m'pa̰kú, é n'yònà n yè nɛ pa̰káàma. ¹⁶ Bemú-dà n nɛ cakú-ma, dapàǹn baà pú hɔ̰́ n'wɛhi-nà o dakpɛ̰́ǹn, tɔntɔndikó mɛ̀ɛ pú hɔ̰́ n'wɛhi-nà mɛ̀ǹǹ ò tɔǹ-ko. ¹⁷ Nɛ yá̰á̰-dà sá̰mà-ní ye kú pa̰á̰mà-ní. Kà nɛ mà pa̰kú, wɛ̀ɛ̀di-dà kó nɛ m'péé-nà.

¹⁸ Yè pú yòǹ nɛ wɛǹni-dà n wɛì-ma. N yá̰á̰-ma n ta̰kadà-pa. Y'àá békú pà wà̰tà-ma wɛmá Weèdi pɔ̀kàta mɛhɛká-dà é pa̰ná. Pà wà̰tà è yɔ̀: Nà mɛ̀ǹǹ ti pɛ́ɛ̀ é dii-kó n dipú-dà hḭn n wɛ̀ɛ̀do. ¹⁹ N dɛnà nɛ cakú sá̰mà-ní ye kú niì-ní k'yè mum pú tɛ̀ni, è kpɛ̀i k'yè wáńtà tɛ̀ni, kà nɛ́ bantá-ma è yɔ̀ n yòǹ mɛ̀ǹǹ péé-ko-dà. ²⁰ Bemú-dà n nɛ cakú-ma. Kà mɛ̀ǹǹ codà-ko n tɔn-kó, mmí-dà ò codà-ma. Kà nìi mɛ̀ɛ n codà, ò codà mɛ̀ǹǹ n tɔn-kó-dà-ní.

Sèsíì wɛdà è yɔ̀ Sùdásì k'óò yɛda

Dentá Màtíyéè 26.20-25; Mádíkì 14.17-21; Dúkì 22.21-23

²¹ Sèsíì wɛdà-ma mɛma é yɔ̀ɔ, k'òo yàma é cɔ̰ha dɛ́dɛ́í k'ó wɛɛ́ pópóí è yɔ̀: N nɛ cakú bemú-dà, n'ɔɔ̀cɔ̰́-dà kó n yɛda. ²² K'òo dapàm̀ma é wáń-wáńtá pa tɔɔ̀pa, pà pú bantà ò wɛì-ko. ²³ È hɔ̰́tà o dapàm̀ma p'oòcɔ̰́, ò de naanà-ko kaàdi òò pɛ̀ɛ-nà. ²⁴ Kà Sìmɔ́ɔ̀ Píyɛ́ɛ̀ óò dɛ́ńtá, è yɔ̀ ó béka Sèsíì ò wɛì-ko. ²⁵ K'yèe dapàǹn é bíkádá Sèsíì kṵmbɔ̀di hḭ́ǹka, óò béka è yɔ̀: N Teù, woò mɔ́ńn-dà? ²⁶ Kà Sèsíì óò tɛ̰́ná è yɔ̀: N kó hṵ́ṵ́ pɛ̰́ɛ̰̀ wɛ́ɛ̀ku kṵ́ǹti é kɔ̰́ɔ̰́-ko, mɛnń-dà. K'ó tódá ye wɔ̀ni pɛ̰́ɛ̰̀ wɛ́ɛ̀ku, é kù hṵ́ṵ́ kṵ́ǹti, é kɔ̰́ɔ̰́ Sùdásì, Sìmɔ́ɔ̀ Ìsìkàdíyɔ́tì bíitá. ²⁷ Sùdásì tà̰ǹtà-ma ye pɛ̰́ɛ̰̀ wɛ́ɛ̀ku, kà Wɛɛ̀kupá wódo é ceḿ dúú o mɛhɛká, kà Sèsíì óò caka è yɔ̀: A kpɛ̀i é pa̰á̰-sa, ceḿ yè pa̰á̰ fem̀ma.

²⁸ Àmá, nà mɛ̀m̀pà pà de pɛ́ɛ̀ kaàdi-pá è yon, p'oòcɔ̰́ǹ de pú bantà mìì de tee-sá k'òò wɛì mɛma. ²⁹ Pa pàcɔ̰́ de maàhu è tonà Sùdásì de púsí-ma pa dící kpɛ́mú-dà tee, Sèsíì de ò cakú-ma è yɔ̀ ó taá dontá-ní yè békú-sa wɛǹni kúúdi kpɛ́mú, yoo ó taá pa̰a̰ pɛ́íhí yècḭ́ḭ̀. ³⁰ Kà Sùdásì é ta̰ǹta ye pɛ̰́ɛ̰̀ wɛ́ɛ̀ku, é ceḿ yɛ̀ɛ̀ ye wɔ̀ni n'ɛ̀ɛ wɔ̀ni. Yè de hɔ̰́tà yèǹka-dà bókáà.

Kpɛ̰́ńtìnùdi pàni

³¹ Sùdásì yɛ̀ɛ̀-ma, kà Sèsíì yɔ̀: Sá̰mà-dà Niìfòùo bíitá wɛhimú kó fodá-ma kà nìpa é dɛ́há nà mɛnta kú pesá Weèdi kpɛ́mú sá̰pu. ³² Kà Niìfòùo bíitá bɛkáà Weèdi wɛhimú sá̰pu, Weèdi mɔ́nní mɛ̀ɛ té kó bɛka-á-ma ta kpɛ́mú nìpa, nì mɛ̀ɛ pú kó yóka éè pa̰ná. ³³ N bííhí-nà, n káà nɛ péé-nà wɔ̀ni cɛ̰́masí-dà. Nɛ kó n pɛha-á-ma é n mɔ́ńka. N cakáà-sa Sùwífùpa tɔɔ̀pa, mií-dà n nɛ cakú-ma sá̰mà-ní. Nɛ pú kó nɛɛ́ taá n kɔ́dí-sa. ³⁴ N nɛ kɔ̰́nì kpɛ̰́ńtìnùdi pàni-dà. Nɛ́ n'dɔ́sí nɛ tɔɔ̀pa. É n'yònà n nɛ dɔ́káàma kú bookú, nɛ yònà é n'dɔ́sí ma kú bookú-dà nɛ tɔɔ̀pa. ³⁵ Kà nɛ dɔ́sí nɛ tɔɔ̀pa, nìpa wɛǹni kó bantá-ma ye wɔ̀ni è yɔ̀ nɛ yòǹ n dapàm̀ma.

Sèsíì cakú è yɔ̀ Píyɛ́ɛ̀ kó nɔ̀hi è yɔ̀ ò p'óò yá̰á̰

Dentá Màtíyéè 26.31-35; Mádíkì 14.27-31; Dúkì 22.31-34

³⁶ Kà Sìmɔ́-Píyɛ́ɛ̀ óò béka è yɔ̀: N Teù, a kɔ́dí ya? Kà Sèsíì óò tɛ̰́ná è yɔ̀: A pú kó nɛɛ́ n tṵṵ̀na n kɔ́dí-sa sá̰mà-ní, àmá yè kó m'péé-ma k'á nɛɛ́ n tṵṵ̀na. ³⁷ Kà Píyɛ́ɛ̀ óò béka è yɔ̀: N Teù, baà tee kà n pú kó nɛɛ́ áa tṵṵ̀na sá̰mà-ní? N kó nɛɛ́ yɛɛ-ɛ́-ma n wɔ̰ǹni a kpɛ́mú. ³⁸ Kà Sèsíì óò tɛ̰́ná è yɔ̀: A sɔ̀do bii-í-dà tenten k'à kó yɛda a wɔ̰ǹni n kpɛ́mú? Bemú-dà m'a cakú-ma, kà kótadá é nɛɛ́ kɔń, a kó nɔ̀hì cɔ̀ku màta̰a̰-dà è yɔ̀ a pú n yá̰á̰.