Ìsá̰à̰ 8

Poòo mɛ̀ǹǹ cɔ̰háà-ko dɔɔdí

¹ Kà Sèsíì mɛnn é dìsi òdìfùna ta̰à̰di hḭ́ǹka. ² K'yé weka ká̰ńyɛ̰̀ǹfa pìdìpìdì, k'ó tón Weèdi hɔ̰́ɔ̰̀ta mɛhɛká kà nìpa wɛǹni é peèta o pesá. K'ó kaàdi è pà biɔhɔ̀nì. ³ Kà Weèdi kpɛ̰́ǹtìnùka biɔhànapá nà Fàdísìpa óò tɛɛ̀ní poòo òcɔ̰́ǹ, kà p'òò cɛ̰dí k'ò cɔ̰hú dɔɔdí. Kà pá tɛ̀ni óò nɛ̀hìna-ho nìku wɛǹni yìhìka, ⁴ é caka Sèsíì è yɔ̀: Dakpɛ̰́ǹn, pooò mɛnǹ p'òò cɛ̰ɛ̰́-ní k'ò cɔ̰hú dɔɔdí-dà. ⁵ Kpɛ̰́ǹtinùka mɛhɛká, Mɔ̀yísì ti kɔ̰́ɔ̰̀ nùdi è yɔ̀ ti té ká̰mu ye kú poopà bookù tá̰à̰ka-dà é pà kɔ̀ù. Fɔ̰́ń tá, a hḭ́n ba ye hḭ́ǹka?

⁶ Pà de wɛì mɛma è kpɛ̀i óò díhìna wɛmá-dà k'ó yetá, kà pá dɛ́tá o pṵ́ṵ́-sa. Kà Sèsíì é tṵḿ é n'wa̰à̰hu teǹka n'ɔ̀ɔ há̰ḿbíifá. ⁷ Pà há̰ de sɔ̰ncí-ma òò békú tá, k'ó yíkàna-ní o cɔ̰́ɔ̰̀di é pà caka è yɔ̀: Nɛ mɛhɛkà, mɛ̀ǹǹ pú pa̰à̰-ko sḭ̀ḭ̀ma n'ɔ̀ɔ̀ péé-ma, k'yèe yaǹn é cedí óò ká̰ńtá tá̰à̰di.

⁸ Ye wɔ̀ni, k'ó tṵ́má tṵḿ é n'wa̰à̰hu teǹka. ⁹ Pà yèkaà-ma mɛma, kà pá n'nɔdì òcɔ̰́ òcɔ̰́ è ka̰hù, é cetá nà kpɛ̰́m̀ma háá é deǹta-nà sìm̀mɔ́m̀ma. K'yé sɔ̰́ńtá Sèsíì cɔ̰́ɔ̰̀di n'ɛ̀ɛ poòo k'ò káà nɛ̀hi pà de ò nɛ̀hìnà-sa. ¹⁰ Ye wɔ̀ni, k'ó yíkàna o cɔ̰́ɔ̰̀di é béka ye poòo è yɔ̀: Ntɛ́ ye nìpa? Òcɔ̰́ǹ pú kaá è k'áa kɔ̰́ɔ̰́ yetád'aa? ¹¹ K'yèe poòo óò tɛ̰́ná è yɔ̀: Òcɔ̰́ǹ pú kaá n Teù. Kà Sèsíì óò caka è yɔ̀: Mmi mɛ̀ɛ té p'áa kɔ̰́nì yetádi. Ka̰há, àmá a koò dá pa̰á̰ sḭ̀ḭ̀ma.]

Sèsíì-dà yòǹ wenkú mɛ̀ǹkù tìi-kú nìpa

¹² Kà Sèsíì é tṵ́má caka nìku è yɔ̀: Mmí, n yòǹ wenkú-dà mɛ̀ǹkù tìi-kú nìpa. Kà nìi n tṵ̀n, ò koò pú kó n'centì yḭ́ḭ̀pu mɛhɛká, àmá ò kó m'péé wenkú mɛ̀ǹkù kɔ̰́nì-ku fòùmu mɛhɛká-dà.

¹³ Kà Fàdísìpa óò caka è yɔ̀: A wɛì a mɔ́nń kú kpɛ́mú-dà. A mɛ̀ɛ wɛì-sà pú yòǹ bemú.

¹⁴ K'ó pà tɛ̰́ná è yɔ̀: Bá kà n wɛì-nà n mɔ́nń kú kpɛ́mú-dà, n wɛì-sa há̰ yòǹ bemú-dà, mìì tee-sá n yá̰á̰-ma n yɛɛ̀ni-sá-ní, è yá̰á̰ n kɔ́ɔ́-sa. Nɛ́na mɛ̀ɛkà, nɛ pú yá̰á̰ n yɛɛ̀ni-sá-ní, nɛ mɛ̀ɛ pú yá̰á̰ n kɔ́ɔ́-sa. ¹⁵ Nɛ́na, nɛ sídí nìpa sídí-ma kú bookú-dà. Mmí mɛ̀ɛkà, n pú sídí òcɔ̰́ǹ. ¹⁶ K'yè mɛ̀ɛ yoò tɛ̀ni kà n kó sída, n sídàma hɔ̰́ n'yòǹ bemú-dà, mìì tee-sá n pú hɔ̰́ n'yòǹ n cɔ̰́ɔ̰̀di ma mɛhɛká. N Báàa mɛ̀ǹǹ n tɔn-kó-ní hɔ̰́ nà n m'péé-nà-á-ma. ¹⁷ Nɛ kpɛ̰́ǹtìnùka mɛhɛká, pà wà̰tà è yɔ̀: Kà nìi pàdɛ́ɛ́ cakàma yòǹ màcɔ̰́ pà dɛ́hà-sa kú hḭ́ǹka, ye kú cakàmà yòǹ bemú-dà^a. ¹⁸ Mmí, n wɛì n mɔ́nń kú kpɛ́mú-dà, kà n Báàa mɛ̀ǹǹ tɔn-kó-ní mɛ̀ɛ té wɛì n kpɛ́mú.

¹⁹ Kà p'óò béka è yɔ̀: A báàa péé ya? K'ó pà tɛ̰́ná è yɔ̀: Nɛ pú n yá̰á̰, nɛ mɛ̀ɛ pú yá̰á̰ n Báàa. Kà nɛ de n yá̰á̰ dɛ́dɛ́í, è yenì nɛ yá̰á̰-ma n Báàa. ²⁰ Sèsíì de cakú ye wɛmà, è péé Weèdi hɔ̰́ɔ̰̀ta mɛhɛká-dà. Ò de péé bɛ̀m̀bɛ̀ni pà de hḭ́nà-sa-dà dící taàa-sá è biɔhɔ̀nì. Òcɔ̰́ǹ pú teháà óò cɛ̰dí, mìì tee-sá o wɔ̀ni de mum pú tɛ̀ni.

Sèsíì cakú è yɔ̀ ò kɔ́dí o Báàa pesá

²¹ Kà Sèsíì é tṵ́má pà caka è yɔ̀: N kɛ̰hɛdi-í-ma, kà nɛ kó n pɛha, àmá nɛ kó kpíí-ma nɛ sḭ̀ḭ̀ma mɛhɛká. Nɛ pú kó nɛɛ́ tadí n kɔ́ɔ́-sa.

²² Ye wɔ̀ni, kà Sùwífùpa é m'békú pa tɔɔ̀pa è toò: Ò kó kɔ̀ù o cɔ̰́ɔ̰̀di-da-à? Ò yɔ̀ ti pú kó nɛɛ́ taá ò kɔ́ɔ́-se-è! ²³ K'ó pà caka è yɔ̀: Nɛ́na, nɛ yòǹ teǹka kpɛ́ɛpá-dà, mmí mɛ̀ɛ yòǹ hḭ́ǹka kóoó-dà. Nɛ yòǹ fòùkù mɛnkù kú nìpa-dà, mmí mɛ̀ɛ pú yòǹ fòùku mɛnkù kú nìdo. ²⁴ Mɛmá-dà tee ká n nɛ caka è yɔ̀ nɛ kó kpíí-ma nɛ sḭ̀ḭ̀ma mɛhɛká. Kà nɛ pú dań è yɔ̀ n yòǹ mɛ̀ǹǹ péé-kó^b, nɛ kó kpíí-ma nɛ sḭ̀ḭ̀ma mɛhɛká. ²⁵ Kà p'óò béka è yɔ̀: Fɔ̰́ń yòǹ wodà? K'ó pà tɛ̰́ná è yɔ̀: N nɛ cakáà è yɔ̀ n yòǹ-ko nà cetáma-ní. ²⁶ N káá-ma niìya̰ dɔ́ɔ́di è kó nɛɛ́ wɛdá nɛ hḭ́ǹka, é nɛɛ́ nɛ síi-nà, n há̰ pú k'éè wɛdá. Mɛ̀ǹǹ n tɔn-kó-ní yòǹ wɛbemú yaǹn-dà. N mɛ̀ɛ yeèkaà-sa o pesá, mií-dà n cakú-ma nìpa.

²⁷ Pà de pú bantà è yɔ̀ ò pà cakú Báàa hḭ́ńkà kóoó wɛmá-dà. ²⁸ Ye wɔ̀ni, kà Sèsíì é pà caka è yɔ̀: Nɛ kó yohòna tḭ́ń daadí mmí Niìfòùo bíitá hḭ́ǹka^c, ye daadí-dà nɛ kó bantá-ma è yɔ̀ n yòǹ n nɛ cakáà è yɔ̀ n yòǹ-ko. Nɛ kó bantá-ma è yɔ̀ n pú pa̰kú yècɛ̰́ɛ̰̀ nà n cɔ̰́ɔ̰̀di, àmá n cakú n Báàa n biɔhɔ̀nà-sa-dà sá̰à̰di. ²⁹ Mɛ̀ǹǹ n tɔn-kó-ní n péé-nà-á-ma. Ò pú n hédà n cɔ̰́ɔ̰̀di mìì tee-sá n pa̰kú wɔ̀ka wɛǹni ò kpɛ̀i-sá-dà. ³⁰ Sèsíì de wɛɛ̀-ma mɛma, kà nìpa dɔ́ɔ́di é taàa pa dandaní o hḭ́ǹka.

Núm̀ma nà mɛ̀m̀pà tee-pá pa cɔ̰́ɔ̰̀di

³¹ Ye wɔ̀ni, kà Sèsíì é caka Sùwífùpa mɛ̀m̀pà de taà-pa pa dandaní o hḭ́ǹka è yɔ̀: Kà nɛ tṵ̀n n wɛmá hḭ́mpú, nɛ kó n'yòǹ n dapàm̀ma mɔ́mpá-dà. ³² Nɛ kó yá̰dá-ma wɛbeèdi, kà wɛbeèdi é nɛ deèna núǹti mɛhɛká.

³³ Kà p'óò tɛ̰́ná è yɔ̀: Ti yòǹ Àbààhám̀ yaàbíiká-dà, ti mɛ̀ɛ pú hḭn òcɔ̰́ǹ kú núm̀ma daadí yènì. Ntɛ́ a kó hḭmà è yɔ̀ ti kó yɛ̀ɛ̀ núǹti mɛhɛká?

³⁴ K'ó pà caka è yɔ̀: Bemú-dà n nɛ cakú-ma, mɛ̀ǹǹ kú wɛnnì pa̰kú-ko sḭ̀ḭ̀ma, ò yòǹ sḭ̀ḭ̀ma núǹn-dà. ³⁵ Núǹn pú hɔ̰́ hḭn o dakpɛ̰́ǹn hɔ̰́ɔ̰́tà kóoó k'yé n'kɔ́ɔ́ yɔ̀ɔmá. Àmá hɔ̰́ɔ̰́tà bíitá-dà hɔ̰́ mà n'yòǹ k'yé n'kɔ́ɔ́ yɔ̀ɔmá. ³⁶ Kà Weèdi bíitá nɛ fḭ́hìnà, nɛ kó n'tee-é-ma nɛ cɔ̰́ɔ̰̀di dɛ́dɛ́í. ³⁷ N yá̰á̰-ma è yɔ̀ nɛ yòǹ Àbààhám̀ yaàbíiká. Àmá nɛ kpɛ̀i é n kɔ̀ù-ú-ma, mìì tee-sá nɛ pú teháà n wɛmá. ³⁸ Mmí, n wɛì n dɛ́hà-sa-dà-ní n Báàa pesá. Nɛ́na mɛ̀ɛkà, nɛ pa̰kú nɛ báàa nɛ cakáà-sa-dà.

³⁹ Kà p'óò tɛ̰́ná è yɔ̀: Àbààhám̀-dà yòǹ ti báàa. K'ó pà caka è yɔ̀: Kà nɛ de yòǹ Àbààhám̀ bííhí-dà, è yenì nɛ pa̰kú ò de pa̰à̰-sa-dà. ⁴⁰ Mmí, n nɛ cakáà wɛbeèdi n yeèkaà-di-dà-ní Weèdi pesá, nà mɛma kà nɛ pɛnti è kó n kɔ̀ù. Àbààhám̀ pú pa̰à̰ ye kú pa̰á̰mà-ní daadí yènì. ⁴¹ Nɛ́na, nɛ pa̰kú nɛ báàa pa̰kú-sa-dà. Kà p'óò tɛ̰́ná è yɔ̀: Ti pú yòǹ makáńdóobíiká. Ti káá Báàa òcɔ̰́-dà, Weèdi-dà mɛ̀ɛ dɛɛ̀.

⁴² Kà Sèsíì é pà caka è yɔ̀: Kà Weèdi de héé nɛ Báàa nà mɔ́ma, è yenì nɛ n dɔ́sí-ma, mìì tee-sá n yɛɛ̀ni-nà-ní ni pesá-dà. N pú tɛ̀ni nà n cɔ̰́ɔ̰̀di kú tɛ̀mmá-ní, àmá mɛní-dà n tɔn-ní. ⁴³ Badà tee kà nɛ pú kpɛ̀i é yekà n nɛ cakú è tonàpu? Yè yòm̀pu kpɛ́mú-dà nɛ pú kpɛ̀i é besí n wɛmá. ⁴⁴ Nɛ báàa-dà héé Wɛɛ̀kupá wódo, nɛ mɛ̀ɛ kpɛ̀i é pa̰á̰ nɛ báàa kpɛ̀i-sá-dà. Mɛnn yòǹ niìkɔ̀ùdo-dà nà cetáma-ní. O cììti-dà wɛbeèdi, mìì tee-sá ò nì kɔ́ɔ́ o mɛhɛká. K'ò cakú tḭ́ń wɔ̀ni nuǹhetí, ò cakú o wɛmɔ́ma-dà, mìì tee-sá ò yòǹ nuǹhetí yaǹn-dà. Mɛnń-dà mɛ̀ɛ yòǹ nuǹhetí báàa. ⁴⁵ Mmí há̰ cakú wɛbeèdi-dà, mɛmá-dà tee kà nɛ yení n wɛmá. ⁴⁶ Nɛ mɛhɛkà, woò mɔ́nn-dà kó nɛɛ́ bɛka sḭ̀ḭ̀ma n pa̰à̰-ma? Kà n há̰ cakú wɛbeèdi-dà, badà tee kà nɛ yení n wɛmá? ⁴⁷ Mɛ̀ǹǹ yòǹ-ko Weèdi kóoó hɔ̰́ m'bekù-ú-ma Weèdi wɛmá. Nɛ́na há̰ pú yòǹ Weèdi kpɛ́ɛpá, mɛmá-dà tee nɛ pú bekù-ma n wɛmá.

Sèsíì nà Àbààhám̀ pa mɛ̀ǹǹ cedí é m'péé-ko

⁴⁸ Kà Sùwífùpa óò caka è yɔ̀: Ti hḭ́n-mà a yòǹ Sàmàdíì tempáàku kóoó-dà, kà wɛɛ̀ko péé a mɛhɛká, ti naa-á-dà fá? ⁴⁹ K'ó pà tɛ̰́ná è yɔ̀: Wɛɛ̀ko òcɔ̰́ǹ kɔ́ɔ́ n mɛhɛká. N cuunì n Báàa-dà, àmá kà nɛ́na há̰ yení n cuùpú. ⁵⁰ Mmí pú bɔhɔ̀ta n cɔ̰́ɔ̰̀di kú wɛhimú, mɛ̀ǹǹ bɔ̀hɔ̀ta-kó n wɛhimú péé-dà, mɛnń-dà mɛ̀ɛ sídí cóńcodí. ⁵¹ Bemú-dà n nɛ cakú-ma. Kà mɛ̀ǹǹ tṵ̀n-kó n wɛmá hḭ́mpú, ò pú kó kpíí daadí yènì.

⁵² Kà Sùwífùpa óò caka è yɔ̀: Sá̰mà-ní-ì, ti bantà-á-ma dɛ́dɛ́í è yɔ̀ wɛɛ̀ko-dà péé a mɛhɛká. Àbààhám̀ kpíi-í-ma, kà Weèdi wɛtɛ̰́nápa mɛ̀ɛ té kpíí, kà fɔ̰́ń há̰ yɔ̀ kà mɛ̀ǹǹ tṵ̀nà-ko a wɛmá hḭ́mpú, ye yaǹn pú kó kpíí daadí yènì. ⁵³ A maàhu è yɔ̀ a ha̰tà-á-dà ti yàdo Àbààhám̀ mɛ̀ǹǹ kpíi-kó nkɛ́ɛ̀? Weèdi wɛtɛ̰́nápa mɛ̀ɛ té kpíi-í-dà. A tóńkú a cɔ̰́ɔ̰̀di wodà?

⁵⁴ Kà Sèsíì é pà tɛ̰́ná è yɔ̀: Kà n de wɛkànì n cɔ̰́ɔ̰̀di-dà, n wɛhimú pú kó n'yòǹ yècɛ̰́ɛ̰̀. N Báàa-dà há̰ n wɛkànì, nɛ hḭ́n mɛ̀ǹǹ yòǹ-ko nɛ Weèdi, ⁵⁵ n'aá p'óò yá̰á̰. Mmí, n ò yá̰á̰-ma. Kà n de hḭ́n n p'óò yá̰á̰, n de kó n'yòǹ nuǹhetí yaǹn-dà, é n'yònà nɛ́na. Àmá, n ò yá̰á̰-ma è tṵ̀n o wɛmá. ⁵⁶ Yè de naa-á-ma dɛ́dɛ́í nɛ yàdo Àbààhám̀, ò de maàhu-má è tonà ò kó dɛ́há-ma n tɛ̀mmá-ní daadí. K'ò mɛ̀ɛ de nì dɛ́há k'yóò naaka sàma.

⁵⁷ Kà Sùwífùpa óò béka è yɔ̀: Fɔ̰́ń mɛ̀ǹǹ mum pú káá-kò beeká púnùm̀, ntɛ́ a kó hḭmà è yɔ̀ a dɛ́hà Àbààhám̀?

⁵⁸ K'ó pà tɛ̰́ná è yɔ̀: Bemú-dà n nɛ cakú-ma, kà pá nɛɛ́ pɛdá Àbààhám̀, mmí de péé-ma.

⁵⁹ Ye wɔ̀ni, kà pá ta̰nka tá̰à̰ka è k'óò ká̰mu. Àmá, k'ó sɔ̀di é yɛ̀dì ye Weèdi hɔ̰́ɔ̰̀ta mɛhɛká.