Ìsá̰à̰ 7

Sèsíì ya̰nhí p'óò dań.

¹ Ye kú dàhàka, kà Sèsíì é cèn Kàdìdéè tempáàku wɛǹni. Ò de pú kpɛ̀i é cèn Sùdéè tempáàku mìì tee-sá, Sùwífùpa wóópa-dà de pɛnti pà kó hḭmpú óò kɔ̀ù. ² Yè de hɔ̰́tà Sùwífùpa kúúdi pà toò-di *fḭ́ḭká kúúdi-dà de hɛ́tà-ní, ³ kà Sèsíì ya̰nhí óò caka è yɔ̀: Yídá bɛ̀m̀bɛ̀nì mɛnì, é taá Sùdéè teǹka mɛhɛká, k'yé teha k'àa dapàm̀ma mɛ̀ɛ té dɛ́há dehèna a pa̰kú-na. ⁴ Òcɔ̰́ǹ pú hɔ̰́ n'kpɛ̀i p'óò yá̰dá, é m'pa̰kú yècɛ̰́ɛ̰̀ è sɔ̀tì sɔ̀tì. A pa̰kú niìi sàsa-dà, hédá kà nìpa wɛǹni áa dɛ́há. ⁵ Bá Sèsíì ya̰nhí mɛ̀ɛ té de pú káá dandaní o hḭ́ǹka. ⁶ K'ó pà tɛ̰́ná è yɔ̀: Wɔ̀ni n yònà éè taá-di mum pú tɛ̀ni. Àmá nɛ́na, Wɔ̀ka wɛǹni foó-ma. ⁷ Nìpa pú kó nɛɛ́ nɛ sɛ̰dá, àmá mmí pà n sɛ̰ɛ̰́-ma, mìì tee-sá n cakú è yɔ̀ pa pa̰á̰ma pú coó. ⁸ Nɛ́na, ka̰há-nà kúúdi. Mmí pú nì kɔ́dí, mìì tee-sá n wɔ̀ni mum pú tɛ̀ni. ⁹ Ò pà cakáà-ma mɛma é yɔ̀ɔ, é cá̰ńtá Kàdìdéè mɛhɛká.

Sèsíì taá fḭ́ḭká kúúdi é tɛ̀i è biɔhɔ̀nì.

¹⁰ O ya̰nhí ka̰hà-ma ye kúúdi pesá, k'òo mɔ́nń nɛ́údá è mɛ̀ɛ té nì tadí, é tɛ̀i ò pú teháà é bɛka o cɔ̰́ɔ̰̀di nìpa mɛhɛká. ¹¹ Kà Sùwífùpa kpɛ̰́m̀ma ò pɛnti ye kúúdi mɛhɛká è békú pà tɔɔ̀pa è toò: Ò péé-yà-dà? ¹² Ye nìku mɛhɛká, kà nìpa é tóó nɔ̀nɔ̀hicí sàma o hḭ́ǹka. Kà pàcɔ̰́ tonà: Niìsudó-dà, kà tɔɔ̀pa tonà: Ṵ́ṵ̀, ò yehènì nìpa-dà. ¹³ P'oòcɔ̰́ǹ há̰ de pú teháà è mà wɛì nìpa wɛǹni yìhìka, mìì tee-sá pa de wani Sùwífùpa kpɛ̰́m̀ma-dà.

¹⁴ K'yé m'beé-nà k'yèe kúúdi daàka yàhakú ka̰hà, kà Sèsíì é taá Weèdi hɔ̰́ɔ̰̀ta mɛhɛká é tɛ̀i è biɔhɔ̀nì. ¹⁵ K'yé dii Sùwífùpa kpɛ̰́m̀ma n'ɔ̀ɔ̀ de biɔhànì-ma kú bookú kà pà toò: Ntɛ́ yè hḭmà k'ò yá̰á̰ Weèdi wɛmá pɔ̀kàta mɛma kú bookú è pú tà biɔháà?

¹⁶ Kà Sèsíì é pà tɛ̰́ná è yɔ̀: Biɔhɔ̀namá n biɔhɔnì-ma pú péé-nà-ní n pesá, àmá mà péé-nà-ní mɛ̀ǹǹ n tɔn-dí-ní kú pesá-dà. ¹⁷ Kà nìi kpɛ̀i é pa̰á̰ Weèdi dɔ́kàma, ye yaǹn kó bantá-ma k'yèe biɔhɔ̀namà yòǹ Weèdi kpɛ́ɛmá-dà yoo kà n wɛì n mɔ́nń kú wɛmá-dà. ¹⁸ Mɛ̀ǹǹ wɛì-ko n'ɔ̀ɔ cɔ̰́ɔ̰̀di kú yèdi, ye yaǹn pɛnti o mɔ́nń kú wɛkànamá-dà. Mɛ̀ǹǹ há̰ wɛì-ko è kpɛ̀i é wɛkàna mɛ̀ǹǹ ò tɔn-kó-ní kú yèdi, ye yaǹn-dà cakú wɛbeèdi, nuǹhetí mɛ̀ɛ kɔ́ɔ́ o nùdi mɛhɛká. ¹⁹ Mɔ̀yísì pú nɛ kɔ̰́ɔ̰̀ kpɛ̰́ńtìnùka dò? N'ɔɔ̀cɔ̰́ǹ há̰ pú kà tṵ̀n-ḭḭ̀! Badà tee kà nɛ pɛnti è kó n kɔ̀ù? ²⁰ K'yèe nìku óò tɛ̰́ná è yɔ̀: Wɛɛ̀ko-dà péé a mɛhɛká! Wodà kpɛ̀i áa kɔ̀ù?

²¹ K'ó pà tɛ̰́ná è yɔ̀: N pa̰à̰ pɔ́ńtápa̰á̰ma màcɔ̰́-dà, k'yé nɛ dii nɛ wɛǹni! ²² Mɔ̀yísì-dà nɛ kɔ̰́ɔ̰̀ kpɛ̰́ńtìnùdi è yɔ̀ nɛ n'ca̰mù nɛ bíidahí, kà nɛ mɛ̀ɛ té teha é ca̰ntá nìdo bá damuhipàdi daadí. (Mɛnn há̰ de pú cetà ca̰ntáma, àmá nɛ yààpa cecepá-dà mà cetà.) ²³ Kà nɛ kó nɛɛ́ ca̰ntá bíidatá damuhipàdi daadí è pú n'yetà-nà kpɛ̰́ńtìnùdi Mɔ̀yísì nɛ kɔ̰́ɔ̰̀-di, badà há̰ tee kà fɔ̰́di nɛ káá n hḭ́ǹka nà n kpekànà-ma nìdo o wɛn-wɛǹni damuhipàdi daadí? ²⁴ Nɛ té dá síi nìpa nɛ mádí kà pà pa̰kú-sa hḭ́ǹka, àmá nɛ té pà síi cóńcodí.

Nìpa békú pa cɔ̰́ɔ̰̀di kà Sèsíì yòǹ Weèdi ta̰kadáko

²⁵ Kà Sèdìsàdɛ́m̀ yam̀ma pàcɔ̰́ békú pa cɔ̰́ɔ̰̀di è toò: Dɔɔò mɛnǹ dɔ pà pɛnti é kɔ̀ù-ma? ²⁶ Ǹtoò-nà k'ò wɛì nìku wɛǹni yìhìka bá òcɔ̰́ǹ p'óò wɛì-nà màcɔ̰́mà. Ti wóópà dá m'bantà-á-ma nà mɔ́ma è yɔ̀ ò yòǹ Kídísì? ²⁷ Dɔɔò mɛnǹ há̰kà, ti yá̰á̰-ma ò yɛ̀ni-sá-ní. Àmá Kídísì kó tɛ̀ni tíń daadí, òcɔ̰́ǹ pú kó n'yá̰á̰ ò yɛ̀ni-sá-ní.

²⁸ Ye wɔ̀ni, è hɔ̰́tà Sèsíì biɔhɔ̀nì Weèdi hɔ̰́ɔ̰̀ta mɛhɛká. K'ó wɛdá kpeéma è yɔ̀: Nɛ maàhu è tonà nɛ n yá̰á̰-dà dɛ́dɛ́í, è yá̰á̰ nà n yɛɛ̀ni-sá-ní nkɛ́ɛ̀? N pú tɛ̀ni nà n cɔ̰́ɔ̰̀di. Mɛ̀ǹǹ n tɔn-kó-ní yòǹ wɛbemú yaǹn-dà, nɛ mɛ̀ɛ p'óò yá̰á̰. ²⁹ Mmí, n ò yá̰á̰-ma, mìì tee-sá o pesá-dà n yɛɛ̀ni-má-ní. Mɛnń-dà mɛ̀ɛ n tɔn-ní.

³⁰ Ye wɔ̀ni, kà pá n'kpɛ̀i óò cɛ̰dí, àmá òcɔ̰́ǹ há̰ pú nɛɛ̀ é cɔ̰ná nɔ̀ku o hḭ́ǹka, mìì tee-sá o wɔ̀ni de mum pú tɛ̀ni. ³¹ Ye nìku mɛhɛká, kà nìpa dɔ́ɔ́di é taàa pa dandaní o hḭ́ǹka è wɛì è tonà: Kídísì kó tɛ̀ni tḭ́ń daadí é pa̰á̰-dà pɔ́ńtápa̰á̰ma kà má ha̰tá-nà mɛnǹ pa̰kú-mà?

Yɔtí kpɛ̰́m̀ma tɔn sósìpa è yɔ̀ pá cɛ̰ɛ̰́ Sèsíì.

³² Kà Fàdísìpa pàcɔ̰́ é yekà nìpa de wɛ́-wɛ́hàta-sá ye nìku mɛhɛká Sèsíì hḭ́ǹka. Ye wɔ̀ni, kà dɔ̀hàka yam̀ma kpɛ̰́m̀ma, nà Fàdísìpa é tɔn sósìpa è yɔ̀ p'óò cɛ̰ɛ̰́-ní. ³³ Kà Sèsíì é pà caka è yɔ̀: N káà nɛ péé-nà daàka cɛ̰́ma-dà, ye kú dàhàka ká n tón mɛ̀ǹǹ n tɔn-kó-ní pesá. ³⁴ Nɛ kó n pɛha-á-ma, nɛ bá n dɛ́há, mìì tee-sá nɛ pú kó nɛɛ́ tadí n kó m'péé-sa.

³⁵ Ye wɔ̀ni, kà Sùwífùpa kpɛ̰́m̀ma é m'békú pa tɔɔ̀pa è toò: Ò kɔ́dí ya-dà, kà ti pú kó nɛɛ́ óò dɛ́há? Ò kó taá Sùwífùpa mɛ̀m̀pà ya-yahí-pa Kɛ̀dɛ́kìpa kú teǹka mɛhɛká-dà é tɛ̀i é caka Weèdi wɛmá Kɛ̀dɛ́kìpa? ³⁶ Ò wɛɛ̀-mà wɛmà è yɔ̀: Nɛ kó n pɛha-á-ma nɛ bá n dɛ́há, n mɛ̀ɛ kó m'péé-sa, nɛ pú kó nɛɛ́ yè tadí, mà kpɛ̀i é n'yɔ̀ badà?

Nɛ́ɛmá mɛ̀mà kɔ̰́nì-ma fòùmu.

³⁷ Ye kúúdi dadèǹdèni daadí-dà, de hɔ̰́ n'yòǹ dasàdi mɔ́nní. Ye daadí, kà Sèsíì é yídá é nɛɛ̀hi nìku yìhìka é wɛdá kpeéma è yɔ̀: Kà nɛ́yà̰hakú káá-ko, k'ó ya̰ní n pesá é yà̰à̰. ³⁸ Mɛ̀ǹǹ n dań-ko, nɛ́ɛmá mɛ̀mà kɔ̰́nì-ma fòùmu kó n'wudì-í-ma o mɛhɛká k'yé n'yònà Weèdi wɛmá mà hḭ́mpú. ³⁹ Sèsíì de wɛì Weèdi Sèdi wɛmá-dà, mɛ̀m̀pà de taà-pa dandaní o hḭ́ǹka de kó dɛ́tá-di. Yè de hɔ̰́tà ye wɔ̀ni, Weèdi de mum pú kɔ̰́ɔ̰̀-ní ni Sèdi, mìì tee-sá nì de mum pú dikànà Sèsíì hḭ́ǹka óò wɛkàna^a.

Nìpa nɔhù Sèsíì kpɛ́mú

⁴⁰ Nìpa mɛ̀m̀pà de péé-pa ye pesá yeèkaà-ma k'ò yɔ̀ mɛma, kà pàcɔ̰́ yɔ̀: Ye dɔɔò mɛnǹ yòǹ Weèdi wɛtɛ̰́náko ti ceí-ko-dà nà bemú. ⁴¹ Kà tɔɔ̀pa yɔ̀: Weèdi ta̰kadáko-dà! Kà tɔɔ̀pa tonà: Kídísì há̰ kó nɛɛ́ yɛɛ̀ni-dà-ní nà Kàdìdéè? ⁴² Weèdi wɛmá pú hḭ́n Kídísì kó n'yòǹ wódo Dàfítì yaàbíidí dò? Mà pú hḭ́n ò kó yɛɛ̀ni-nà-ní Bɛ̀tìdɛ̀ɛ́m̀, Dàfítì yɔtí? ⁴³ Mɛmá-dà, k'yèe nìku é totá nà Sèsíì kpɛ́mú. ⁴⁴ Pa mɛhɛká, kà pàcɔ̰́ é n'kpɛ̀i óò cɛ̰ɛ̰́, p'oòcɔ̰́ǹ há̰ pú nɛdà é cɔ̰ná o nɔ̀ku o hḭ́ǹka.

Sùwífùpa kpɛ̰́m̀ma dandankɔ́ɔ̀ti

⁴⁵ K'yèe sósìpa é tóní dɔ̀hàka yam̀ma kpɛ̰́m̀ma nà Fàdísìpa pesá, é tɛ̀ni kà pá pà béka è yɔ̀: Badà tee kà nɛ pú cɛ̰ɛ̰́-ní Sèsíì? ⁴⁶ Kà pá pà tɛ̰́ná è yɔ̀: Òcɔ̰́ǹ mum pú wɛdà daadí yèni è yònà dɔɔò mɛnǹ. ⁴⁷ Ye wɔ̀ni, kà Fàdísìpa é pà béka è yɔ̀: Nɛ́na, nɛ mɛ̀ɛ té héè k'ó nɛ yehèna-á-ma? ⁴⁸ Nɛ mum yeèkaà-á-dà daadí yènì kà pà yɔ̀ ti kpɛ̰́ǹn òcɔ̰́ǹ, yoo Fàdísìpa òcɔ̰́ǹ tàà dandaní o hḭ́ǹka? ⁴⁹ Nìpa mɛ̀m̀pà ò dań-pa yòǹ weǹkɔ̀ucí-dà. Pà pú yá̰á̰ Mɔ̀yísì kpɛ̰́ńtìnùka.

⁵⁰ Yè de hɔ̰́tà Nìkòdɛ́m̀, k'ò yòǹ ye Fàdísìpa p'oòcɔ̰́, yè péé. Mɛnń-dà de tɛ̀i-ho yèǹka kàcɔ̰́kà é dɛ́há Sèsíì. K'ó pà béka è yɔ̀: ⁵¹ Ti kpɛ̰́ńtìnùka ti pɛ̰ḭ-ḭ́-dà nùdi è yɔ̀ tí té kɔ̰́ɔ̰́ nìdo yetádi, è mum p'óò besí é yekà ò pa̰à̰-sa? ⁵² Kà p'óò tɛ̰́ná è yɔ̀: Fɔ̰́ń, a mɛ̀ɛ té dá n'yòǹ Kàdìdéè kóoó? Fedá Weèdi wɛmá sukú, a kó yá̰dá-ma è yɔ̀ Weèdi wɛtɛ̰́náko òcɔ̰́ǹ pú kó nɛɛ́ é yɛɛ̀ni nà Kàdìdéè. [\v 53 Ye kú dàhàka, kà bá mɛ̀ǹǹ dɛ̀ɛ̀-ko é kòǹ o hɔ̰́ɔ̰̀ta.