Ìsá̰à̰ 5

Sèsíì kpekànà hɔ̀ùta

¹ Ye kú dàhàka, kà Sùwífùpa é n'ya̰ǹku pa kúúdi nìcɔ̰́nì Sèdìsàdɛ́m̀ mɛhɛká, kà Sèsíì é póńtá-ní ye pesá. ² Bínhɔɔ̀dí nìcɔ̰́nì-dà pà há̰ de maá-ma Sèdìsàdɛ́m̀ mɛhɛká, kà hà̰ǹhà̰ka kànùm̀ nì yéńtà, kà Hèbùdéèpa nì yún è tonà Bɛ̀tìsàtáà, kà nì hɛ́dí-nà hɔ̰̀ci há̰ńnùdi^a. ³ Ye hà̰ǹhà̰ka mɛhɛká, kà mɔkàpa dɔ́ɔ́di dɔ-dɔɔ́: Yɔ̀m̀ma, nà mɛ̀m̀pà cèǹtìpa tàdi, nà hɔ̀ùhi. [Pà de ceí nɛ́ɛmá nampàma-dà, ⁴ è yá̰á̰ Weèdi tɔntɔndikó-dà de hɔ̰́ cútá-ní wɔ̀ni nà wɔ̀ni ye bínhɔɔ̀dí mɛhɛká é tɛ̀ni é nampa ye nɛ́ɛmá. Ye wɔ̀ni, kà mɔ̀ǹǹ cedí è cútà-ko ma mɛhɛká ò hɔ̰́ kpeká-ma bá k'òo dɔnkú yòm̀pu.] ⁵ Ye pesá è hɔ̰́tà dɔɔ̀o òcɔ̰́ǹ yè péé è mɔn, k'yè yɔ̀ɔ beeká púta̰di nà kànìì ⁶ Sèsíì ò dɛ́hà-ma k'ò dɔɔ́, k'ó bantá è yɔ̀ n'ɔ̀ɔ̀ mɔn-má yè yókáà-á-ma sàma. K'óò béka è yɔ̀: A kpɛ̀i é kpeka-a?

⁷ K'yèe mɔko óò tɛ̰́ná è yɔ̀: Dakpɛ̰́ǹn, n pú káá mɛ̀ǹǹ kó n taàa-kó bínhɔɔ̀dí mɛhɛká nɛ́ɛmá hɔ̰́ nampa tḭ́ń wɔ̀ni. Kà mà nampáà kà n kó dúú, tɔɔ̀ɔ-dà hɔ̰́ n foi é cútá.

⁸ Kà Sèsíì óò caka è yɔ̀: Yídá é tódá a mɛ̀ku é cèn. ⁹ Ye pesá n'ɛ̀ɛ pesá k'yèe dɔɔ̀o é kpeka. K'ó yídá tódá o mɛ̀ku é cetá cèmu.

Ye kú niyà̰ há̰ de pa̰à̰-ma damuhipàdi daadí tá, ¹⁰ kà Sùwífùpa kpɛ̰́m̀ma é caka ye dɔɔ̀o mɛ̀ǹǹ de kpekáà-ko è yɔ̀: Damuhipàdi-dà yenì, ti kpɛ̰́ńtìnùka p'áa pɛ̰ḭ nùdi è yɔ̀ á n'toó a mɛ̀ku. ¹¹ K'ó pà tɛ̰́ná è yɔ̀: Mɛ̀ǹǹ n kpekanà-ko-dà n cakáà è yɔ̀ ń tódá n mɛ̀ku é cèn.

¹² Kà p'óò béka è yɔ̀: Wod'àà caka è yɔ̀ á tódá a mɛ̀ku é cèn? ¹³ Há̰kà ye dɔɔ̀o mɛ̀ǹǹ de kpekáà-ko de p'óò yá̰á̰, mìì tee-sá Sèsíì de fée-ma-hɔ̰ nìku mɛ̀ǹkù de péé-ku ye pesá ku mɛhɛká.

¹⁴ Ye kú dàhàka, kà Sèsíì óò pèta-nà Weèdi hɔ̰́ɔ̰̀ta mùǹku mɛhɛká óò caka è yɔ̀: A dɛ́hà a kpekáà-m'ɛɛ̀, á yentá sḭ̀ḭ̀ma k'yé teha kà niìi tɔɔ̀sa yècḭ́ḭ̀ d'áa tɛ̀ni è ha̰tà miì. ¹⁵ K'yèe dɔɔ̀o é ka̰há é tɛ̀i é caka Sùwífùpa kpɛ̰́m̀ma è yɔ̀ Sèsíì-d'òò kpekanà. ¹⁶ Mií-dà de tee kà pà kɔ̰ǹti-nà Sèsíì n'ɔ̀ɔ̀ pa̰à̰-ma ye kú pa̰á̰mà damuhipàdi daadí. ¹⁷ Kà Sèsíì é pà tɛ̰́ná è yɔ̀: N Báàa púsí-ma tɔmú háá nà sá̰mà, kà n mɛ̀ɛ té mù púsí. ¹⁸ N'ɛ̀ɛ kú wɛmá kpɛ́mú, kà Sùwífùpa kpɛ̰́m̀ma é dɔ̀hà è pɛnti pà kó hḭmpú óò kɔ̀ù. Yè pú yònà ò de pa̰à̰-ma mìì cií-sa damuhipàdi daadí kpɛ́mú cɔ̰́ɔ̰̀di-dà tee kà pà kpɛ̀i óò kɔ̀ù, àmá ò de tṵ́mà tonà Weèdi yòǹ o báàa pɛdáko-dà, è behú-nà ma kú bookú o cɔ̰́ɔ̰̀di Weèdi.

Weèdi kɔ̰́ɔ̰̀ ni Bíitá nɔɔ̀ti

¹⁹ Kà Sèsíì é pà caka è yɔ̀: Bemú-dà n nɛ cakú-ma, Weèdi bíitá pú kó nɛɛ́ é pa̰á̰ yècɛ̰́ɛ̰̀ nà ta cɔ̰́ɔ̰̀di kú nɔɔ̀ti. Tà dɛ́hà kà ta Báàa pa̰kú-sa mií-dà tà pa̰kú-ma. Báàa pa̰kú-sa wɛǹni, o Bíitá mɛ̀ɛ té pa̰kú-sa-dà. ²⁰ Báàa dɔ́sí-ma o Bíitá, mií-ì tee k'ò tà bɛkú ò pa̰kú-sa wɛǹni. Ò kó tṵ́má tà bɛka-á-ma pa̰á̰ma mɛ̀mà ha̰tà-ma mɛmà-ní kà tá mà pa̰ná, k'yé nɛ dii. ²¹ K'yé n'yònà Báàa hɔ̰́ yá̰hìna-má kpíípa é pà pa̰a̰ fòùmu, ma kú bookú-dà o Bíitá pɔ̰n-má fòùmu tà mù kpɛ̀i-nà-ko. ²² Báàa pú sídí-nà òcɔ̰́ǹ, àmá o Bíitá-dà ò kɔ̰́ɔ̰̀-ma nɔɔ̀ti wɛǹni è yɔ̀ tá síi-nà nìpa. ²³ Ò hḭn mɛma, è kpɛ̀i nìpa wɛǹni-dà é tà n'cùnì é n'yònà p'òò cùǹkumá. Mɛ̀ǹǹ pú cunì-ko o Bíitá, ò pú cunì Báàa-dà mɛ̀ǹǹ tà tɔn-kó-ní. ²⁴ N nɛ cakú bemú-dà, mɛ̀ǹǹ bekù-ko n wɛmá, è dań mɛ̀ǹǹ n tɔn-kó-ní ye yaǹn káá-ma fòùmu mɛ̀mù bá yɔ̀ɔ-pú. Ò koò kɔ́ɔ́ sídàma mɛhɛká, àmá ò yɛ̀ɛ̀ kṵ́mú mɛhɛká-dà, é dúú fòùmu mɛhɛká. ²⁵ N nɛ cakú bemú-dà, wɔ̀ni-dà pení nì mɛ̀ɛ yɔ̀ɔ tɛ̀mpú-dà-ní, kà kpíípa kó yekà Weèdi bíitá boòku. Mɛ̀m̀pà mɛ̀ɛ kó kù yèkà-pa, kó dɛ́tá-ma fòùmu. ²⁶ K'yé n'yònà Báàa yòǹ-ma fòùmu yudí, ma kú bookú-dà ò kɔ̰́ɔ̰̀-ma o Bíitá kà tà yòǹ fòùmu yudí. ²⁷ Ò mɛ̀ɛ tà kɔ̰́ɔ̰̀-ɔ̰́-ma nɔɔ̀ti è yɔ̀ tá síi-nà nìpa, mìì tee-sá tà yòǹ Niìfòùo bíitá-dà. ²⁸ Yè dá nɛ dii n kó wɛɛ́-sà miì kú hḭ́ǹka: Wɔ̀ni-dà pení kà kpíípa kó yekà ta boòku, ²⁹ é yɛɛ̀ni pa híùka mɛhɛká. Ye wɔ̀ni mɛ̀m̀pà pa̰à̰-pa suumá, kó yá̰ńtá-ma-ní kà pá pà dúùwa fòùmu mɛhɛká, mɛ̀m̀pà pa̰à̰-pa sḭ̀ḭ̀ma, kà pá yá̰ńtá-ní kà pá pà kɔ̰́ɔ̰́ yetádi é yɔ̰́ń pa toòka. ³⁰ Mmí, n pú kó nɛɛ́ é pa̰á̰ yècɛ̰́ɛ̰̀ nà n cɔ̰́ɔ̰̀di kú nɔɔ̀ti. N Báàa n hḭ́mpú, mɛma kú bookú-dà n síí-nà-ma nìpa. N sídàma mɛ̀ɛ coó-ma, mìì tee-sá n pú pɛnti é pa̰á̰ n cɔ̰́ɔ̰̀di kú kpɛ̀imá, n kpɛ̀i é pa̰á̰ mɛ̀ǹǹ n tɔn-kó-ní kú kpɛ́ɛmá-dà.

³¹ Kà mmí mɔ́nń-dà cakú n yòm̀pu, nɛ kó n'yɔ̀ n cakàma pú yṵhù. ³² Tɔɔ̀ɔ-dà há̰ cakú n yòm̀pu, n mɛ̀ɛ yá̰á̰-ma è yɔ̀ ò cakú-sa n hḭ́ǹka yòǹ mɔ́ma-dà. ³³ Nɛ tɔn-ń-ma tɔntɔndipá Ìsá̰-Bàtísì pesá, k'ò mɛ̀ɛ nɛ caka wɛbeèdi n hḭ́ǹka. ³⁴ Mmí n pú békú nìi é caka n yòm̀pu, àmá n wɛì miya̰ è kpɛ̀i Weèdi-dà é nɛ fḭ́hìna sá̰à̰di. ³⁵ Ìsá̰-Bàtísì de yònà ha̰wèta mɛ̀ǹtà cɔ́hí-ta-dà è weni póí, kà nɛ mɛ̀ɛ teha é dii wɛ̀ɛ̀di wɔ̀ni cɛ̰́masí o wenkú mɛhɛká. ³⁶ Mmí, n káá-ma niìya̰ mìì bɛkú-sa n yòm̀pu é ha̰tà-nà Ìsá̰à̰ wɛɛ̀-sa n hḭ́ǹka. Tɔná n Báàa n kɔ̰́ɔ̰̀-na kà n nà pa̰kú, mɛná-dà cakú n yòm̀pu, è tṵ́mà bɛkú è yɔ̀ mɛnń-dà n tɔn-ní. ³⁷ Báàa mɛ̀ǹǹ n tɔn-kó-ní, mɛ̀ɛ té cakú-ma n yòm̀pu. Nɛ mum pú yekaà daadí yènì o boòku, nɛ mɛ̀ɛ mum pú dɛ́hà daadí yènì o yìhìka. ³⁸ Nɛ pú púsí o wɛmá nɛ yàma mɛhɛká, ye kú kpɛ́mú-dà tee nɛ pú dań-ma ò tɔn-kó-ní. ³⁹ Nɛ biɔhú-ma Weèdi wɛmá pɔ̀kàta è tà fehú dɛ́dɛ́í, mìì tee-sá nɛ maàhu è tonà mɛntá kú mɛhɛká-dà nɛ kó dɛ́tá-ma fòùmu mɛ̀mù bá yɔ̀ɔ-pú. Ye Weèdi wɛmá pɔ̀kàtà-dà há̰ cakú n yòm̀pu. ⁴⁰ Nà mɛma, nɛ pú kpɛ̀i é tɛ̀ni n pesá é dɛ́tá fòùmu mɔ́mmú.

⁴¹ N pú bɔhɔ̀ta nìpa cuùmá. ⁴² Múńdìkaà n nɛ yá̰á̰-ma. N yá̰á̰-ma è yɔ̀ nɛ yàma mɛhɛká nɛ pú dɔ́sí Weèdi. ⁴³ N tɛ̀ni nà n Báàa kú yèdi-dà, nɛ mɛ̀ɛ pú teháà é n codá. Àmá kà tɔɔ̀ɔ òcɔ̰́ǹ há̰ tɛ̀ni n'ɔ̀ɔ mɔ́nń kú yèdi, nɛ k'óò codá-ma. ⁴⁴ Ntɛ́ nɛ kó hḭmà é nà n dań, nɛ́na mɛ̀m̀pà dɔ́sí-pa nɛ tɔɔ̀pa cuùmá, àá pú pɛnti nɛ kó hḭmpú kà Weèdi mɛ̀nì yòǹ-di ni cɔ̰́ɔ̰̀di, é nɛ n'cuunì? ⁴⁵ Nɛ há̰ dá m'maàhu è tonà mmí-dà kó wáńtá nɛ pṵ́á̰ n Báàa yìhìka. Mɔ̀yísì nɛ taàa-ko kú hḭ́ǹka nɛ dandaní, mɛnń-dà kó wáńtá nɛ pṵ́á̰. ⁴⁶ Kà nɛ de dań beḿ-bemú Mɔ̀yísì wà̰haà-sa, è yenì nɛ mɛ̀ɛ té n dań-ma, mìì tee-sá n kú wɛmá-dà ò wà̰haà-ma. ⁴⁷ N'aá pú dań-mà ò wà̰haà-sa, ntɛ́ nɛ kó hḭmà é n'dań wɛmá n nɛ cakú-ma?