Ìsá̰à̰ 4

Sèsíì pètà-nà *Sàmàdíì poòo òcɔ̰́ǹ

¹ Kà Fàdísìpa é yekà è yɔ̀ nìpa mɛ̀m̀pà tṵ̀nì-pa Sèsíì k'ò pà cómù pa dɔ́ɔ́di ha̰tà Ìsá̰-Bàtísì kpɛ́ɛpá. ² Wɛbemú hḭ́ǹka, Sèsíì mɔ́nń de pú cómù nìpa, o dapàm̀ma-dà de pà cómù. ³ Sèsíì yèkaà-ma kà pà wɛì mɛma, k'ó yídá Sùdéè tempáàku é tón Kàdìdéè kpɛ́kú mɛhɛká. ⁴ K'ó nɛɛ́ yè ta̰ntá, yè békú ó deèta-á-ma Sàmàdíì tempáàku.

⁵ K'ó tɛ̀i Sàmàdíì yɔtí tìcɔ̰́tì kà pà tì toò Sìsáà, kà tì hɛ́dí-nà *Sàkɔ́pù de pɛ̰ḭ-dí yɛ̀di o bíitá Sòsɛ́fù. ⁶ Ye pesá-dà Sàkɔ́pù bíńdadá péé-ma. Sèsíì de tɛ̀i ye pesá-dà kà cèmu òò wédà, k'ó kaàdi-ho ye bíńdadá bɛ́ɛ́kú. Yè de hɔ̰́tà wèǹku beé-nà yuùka hḭ́ǹka-dà.

⁷ Kà Sàmàdíì poòo òcɔ̰́ǹ é tɛ̀ni nɛ́ɛmá yúépu. Kà Sèsíì óò caka è yɔ̀: N pa̰a̰ nɛ́ɛmá ká n yà̰à̰. ⁸ Yè de hɔ̰́tà o dapàm̀ma tadí yɔtí mɛhɛká-dà è kó dontá-ní dimá. ⁹ K'yèe Sàmàdíì poòo óò béka è yɔ̀: Ntɛ́ yè hḭmà fɔ̰́ń Sùwífù, k'à n cɔ̀hu nɛ́ɛmá mmí Sàmàdíì kóoó è kó yà̰à̰? (Ò de hḭ́n mɛma, mìì tee-sá Sùwífùpa de pú tɔ́kànì Sàmàdíì yam̀ma.) ¹⁰ Kà Sèsíì óò tɛ̰́ná è yɔ̀: K'à de yá̰á̰ Weèdi pɔ̰n-sá, nà mɛ̀ǹǹ toò-ko: N pa̰a̰ nɛ́ɛmá ká n yà̰à̰, fɔ̰́ń-dà múńtà de kó mà n'ɔ̀ɔ̀ cɔ̀hà é yà̰à̰, k'óa pa̰a̰ nɛ́ɛmá mɛ̀mà kɔ̰́nì-ma fòùmu.

¹¹ K'yèe poòo óò tɛ̰́ná è yɔ̀: Dakpɛ̰́ǹn, a pú káá dɔ̀kɔ̀waǹni, kà bíńdadá tṵ́mà cṵmpu. Ntɛ́ a kó hḭmà é nɛǹta nɛ́ɛmá mɛ̀mà kɔ̰́nì-ma fòùmu? ¹² Ti yàdo Sàkɔ́pù-dà ti pɛ̰ḭ ye bíńdadà. O mɔ́nń niì-í-ma ta nɛ́ɛmá, n'ɔ̀ɔ bííhí, n'ɔ̀ɔ nɔtí. A maàhu è tonà a ò wɛhinà-á-dà?

¹³ K'óò tɛ̰́ná è yɔ̀: Nìdo mɛ̀ǹǹ kú wɛnnì kó yà̰à̰-ko ye nɛ́ɛ́mà mɛ̀mà, nɛ́yà̰hakú kó tṵ́má óò cɛ̰ɛ̰́-ma. ¹⁴ Àmá mɛ̀ǹǹ kó yà̰à̰-ko nɛ́ɛmá n k'óò kɔ̰́ɔ̰́-ma, nɛ́yà̰hakú koò pú k'óò cɛ̰ɛ̰́ daadí yènì, múńdìkaà nɛ́ɛmá n k'óò kɔ̰́ɔ̰́-ma kó kpáńtá bíńdadá-dà o mɛhɛká kà fòùmu mɛ̀mù bá yɔ̀ɔ-pú éè n'wudì-ní. ¹⁵ K'yèe poòo óò caka è yɔ̀: Dakpɛ̰́ǹn, n pa̰a̰-ní ye kú nɛ́ɛmá k'yé teha kà nɛ́yà̰hakú koò dá n cɛ̰dí, kà n mɛ̀ɛ koò dá n'kɔ́dì-ní miì nɛ́ɛmá yúépu.

¹⁶ Kà Sèsíì óò caka è yɔ̀: Taá é yíí-ní a dɔɔ̀o kà nɛ́ tɛ̀ni. ¹⁷ K'yèe poòo óò tɛ̰́ná è yɔ̀: N pú káá dɔɔ̀o. Kà Sèsíì óò caka è yɔ̀: A hḭ́n-mà a pú káá dɔù, a naa-á-ma, ¹⁸ mìì tee-sá, a kádà daapá pànùm̀-dà. Dɔɔ̀ɔ a péé-nà-kò sá̰mà pú yòǹ a dɔù. Mɔ́ma-dà a cakáà-ma.

¹⁹ Ye wɔ̀ni, k'yèe poòo óò caka è yɔ̀: Dakpɛ̰́ǹn, n dɛ́hà é n'hɔ̰́tà a yòǹ Weèdi wɛtɛ̰́náko-dà. ²⁰ Ti yààpa Sàmàdíìpa dɔwáà Weèdi ta̰a̰dì mɛnì kú hḭ́ǹka-dà, àmá nɛ́na Sùwífùpa, kà nɛ yɔ̀ Sèdìsàdɛ́m̀-dà ti yònà é n'dɔń-ma Weèdi. ²¹ Kà Sèsíì óò tɛ̰́ná è yɔ̀: Teha n wɛmà mɛmà: Wɔ̀ni pení-ma-ní kà nɛ koò pú kó n'dɔń Báàa Weèdi ta̰a̰dì mɛnì kú hḭ́ǹka yoo Sèdìsàdɛ́m̀. ²² Nɛ́na Sàmàdíìpa, nɛ pú yá̰á̰ Weèdi nɛ dɔń-di. Tḭ́ńti Sùwífùpa, ti yá̰á̰-ma Weèdi ti dɔń-di, mìì tee-sá fḭ́hìnamá yɛɛ̀hu-ní Sùwífùpa pesá-dà. ²³ Àmá wɔ̀ni pení-ma-ní, nì mɛ̀ɛ yɔ̀ɔ tɛ̀mpú-dà-ní, kà Weèdi Sèdi kó n'tempú-nà weèdɔɔ̀pa mɔ́mpá, kà pá n'dɔń Báàa Weèdi yè békú p'óò n'dɔnkúma, mìì tee-sá ye kú weèdɔɔ̀pà kú bookù-dà Weèdi pɛnti-má. ²⁴ Weèdi yòǹ sèdi-dà. Yè békú mɛ̀m̀pà nì dɔń-pa ní nì n'dɔń nà wɛbeèdi-dà nà Weèdi sèdi. ²⁵ K'yèe poòo óò caka è yɔ̀: N yá̰á̰-ma è yɔ̀ *Mɛ̀síì pà toò-ko Kídísì pení. Ò kó tɛ̀ni tḭ́ń daadí é ti wekàna-á-ma niìi wɛǹni. ²⁶ Kà Sèsíì óò tɛ̰́ná è yɔ̀: Mmí-d'òò héé, mmí mɛ̀ǹǹ à wɛì-kò.

²⁷ Ye wɔ̀ni k'òo dapàm̀ma tɔɔ̀-ní é tɛ̀ni óò dɛ́há k'ò wɛì-nà poòo, k'yé pà dii.

Àmá, p'oòcɔ̰́ǹ pú nɛɛ̀ óò béka ò békú-sa kú hḭ́ǹka ye poòo, yoo òò wɛì-nà-sa kú hḭ́ǹka.

²⁸ Ye wɔ̀ni, k'yèe poòo é hédá-ho o cɔ̀ta ye pesá é tón yɔtí mɛhɛká é tɛ̀i é caka nìpa è yɔ̀: ²⁹ Ya̰n'à-ní é dɛ́há nìdo mɛ̀ǹǹ n cakáà-ko n pa̰à̰-sa wɛǹni. Mɛnn pú kó n'héé Kídísì? ³⁰ Kà pá wiìda-ní ye yɔtí mɛhɛká é tɛ̀ni Sèsíì pesá.

³¹ Ye wɔ̀ni, è hɔ̰́tà o dapàm̀ma ò sɛ́úkú è tonà: Dakpɛ̰́ǹn, dii yècɛ̰́ɛ̰̀! ³² Àmá, k'ó pà tɛ̰́ná è yɔ̀: N káá dipú-dà è kó dii kà nɛ pú mù yá̰á̰. ³³ Ye wɔ̀ni, k'òo dapàm̀ma békú pa tɔɔ̀pa è tonà: Òcɔ̰́ǹ dá ò n'tɛɛ̀-ní dipú k'ó dii?

³⁴ K'ó pà tɛ̰́ná è yɔ̀: N dipú héé ń pa̰á̰ mɛ̀ǹǹ tɔn-kó-ní yàma kpɛ̀i-sá-dà, é yɔ̀ɔ tɔmú ò n kɔ̰́ɔ̰̀-pu è yɔ̀ ń mù pa̰ná. ³⁵ Nɛ́na pú tonà yè kaá weèka kànàhì kà dití kó bii? Mmí há̰ nɛ cakú è yɔ̀ nɛ́ yoòda nɛ nɔ̀ǹci é wáńtá yɛ̀ka, ka dití bii-í-ma è sà kɔ̰ṵpú. ³⁶ Mɛ̀ǹǹ kɔ̰ṵ-ko cem̀ dɛ́hù o bootí-dà, è tíkánì dití fòùmu mɛ̀mù pú yɔɔ̀hu-pú kpɛ́mú. Ye wɔ̀ni, mɛ̀ǹǹ bɔdì-ko nà mɛ̀ǹǹ kɔ̰ṵ-kó pà péé wɛ̀ɛ̀di nìcɔ̰́ mɛhɛká-dà. ³⁷ Ye kú kpɛ́mú-dà tee kpɛ̰́nwɛmà mɛmà cakú-ma bemú. Mà yɔ̀: Nìdo-dà hɔ̰́ bɔdí kà tɔɔ̀ɔ é kɔ̰ṵ. ³⁸ N nɛ tɔn è yɔ̀ nɛ́ tíkáná dití yɛ̀di nɛ pú deháà-di kú mɛhɛká-dà. Tɔɔ̀pa-dà deháà ni mɛhɛká é wédá, kà nɛ́na yon pa wìku tɔmú.

³⁹ K'yèe yɔtí yam̀ma Sàmàdíìpa, pa dɔ́ɔ́di é taàa pa dandaní Sèsíì hḭ́ǹka, mìì tee-sá ye poòo de pà cakáà è yɔ̀: Ò n cakáà n pa̰à̰-sa wɛǹni-dà. ⁴⁰ Mɛmá-dà tee kà pà de é tɛ̀ni, óò sɛ́úka è yɔ̀ ó cá̰ńtá é pà m'péé-nà. K'ó teha é cá̰ńtá, é pa̰á̰ daàa kàdɛ́ɛ́. ⁴¹ Kà nìpa é tṵ́má taàa pa dandaní o hḭ́ǹka n'ɔ̀ɔ wɛmá pà de yeèkaà-ma kpɛ́mú, kà pa dɔ́ɔ́di wɛhi sàma. ⁴² Kà pá caka ye poòo è yɔ̀: Yè koò pú yòǹ a ti cakáà-sa cɔ̰́ɔ̰̀di kpɛ́mú-dà tee kà ti dań, àmá ti yeèkaà-á-ma o mɔ́nń k'ò wɛì, kà tí yá̰dá è yɔ̀ mɔ́ma ò yòǹ fòùku fḭ́hìnakó-dà.

Sèsíì kpekànà wódo nahàku tɔntɔnsào òcɔ̰́ǹ kú bíitá

⁴³ Sèsíì pa̰à̰-ma ye pesá daàa kàdɛ́ɛ́, é yídá taá Kàdìdéè, ⁴⁴ è yá̰á̰ o mɔ́nń de wɛdà-á-ma è yɔ̀: Pà pú cunì Weèdi wɛtɛ̰́náko o yɔtí mɔ́ntí mɛhɛká. ⁴⁵ Ò tɛ̀i-má Kàdìdéè, k'yèe tempáàku yam̀ma óò codá sukú. Pa mɔ́mpá mɛ̀ɛ té de taá-ma núǹtiyɛ̀ɛ̀ma kúúdi Sèdìsàdɛ́m̀, é dɛ́há ò de pa̰à̰-sa wɛǹni ye kúúdi daàka mɛhɛká.

⁴⁶ K'ó yídá é tón Kànáà, Kàdìdéè tempáàku mɛhɛká ò de cehènà-sa nɛ́ɛmá kà má hḭn naàma. Yè de hɔ̰́tà wódo nahàku tɔntɔnsào òcɔ̰́ǹ-dà péé Kàpɛ̀ɛ̀nàúm̀ yɔtí k'òo bíitá mɔn. ⁴⁷ Ò yèkaà-ma è yɔ̀ Sèsíì yíì-ní Sùdéè tempáàku é tɛ̀ni Kàdìdéè kpɛ́kú mɛhɛká, k'ó taá óò dɛ́há, óò sɛ́uka è yɔ̀ ó taá Kàpɛ̀ɛ̀nàúm̀ é tɛ̀i é kpekàna o bíitá kà tà mɔ̀dì-nà kṵ́mú. ⁴⁸ K'óò tɛ̰́ná è yɔ̀: Kà nɛ pú dɛ́hà pɔ́ńtápa̰á̰ma ma bodú bodú nɛ pú kó n'dań nkɛ́ɛ̀? ⁴⁹ K'yèe wódo nahàku tɔntɔnsào óò tɛ̰́ná è yɔ̀: Dakpɛ̰́ǹn, ya̰ní n hɔ̰́ɔ̰̀ta kà n bíitá é nɛɛ́ kpíí. ⁵⁰ K'óò tɛ̰́ná è yɔ̀: Tɔɔ̀ta é kòǹ, a bíitá kpekáà-á-ma.

K'yèe dɔɔ̀o é taàa dandaní wɛmá Sèsíì d'oò cakáà-ma hḭ́ǹka é tɔɔ̀ta é kòǹ. ⁵¹ Ò de káà sá̰á̰ cɔ̀ku-dà è kṵnti-ní k'òo dehèpa é tɛ̀ni o peètanàpu óò caka è yɔ̀: A bíitá kpekáà-á-ma. ⁵² K'ó pà béka wɔ̀ni yè de tà tɔ̰káà-di. Kà p'óò tɛ̰́ná è yɔ̀: Wèǹku wɔ̀ni màcɔ̰́ mɛhɛká-dà o mɛ́ti wontà yɔ̀ɔ-má. ⁵³ K'yèe bíitá báàa é cɔ́dí é n'hɔ̰́tà ye kú wɔ̀ni-dà Sèsíì wont'òò cakáà-ma è yɔ̀ o bíitá kpekáà-á-ma. Ye wɔ̀ni, mɛnń n'ɔ̀ɔ hɔ̰́ɔ̰́tà kpɛ́ɛpá wɛǹni kà pá taàa pa dandaní Sèsíì hḭ́ǹka. ⁵⁴ Pɔ́ńtápa̰á̰ma dɛ́ɛ̀ma Sèsíì de pa̰à̰-ma-dà ye pesà-ní, ò yídà-ma-ní Sùdéè tempáàku é tóní Kàdìdéè kpɛ́kú mɛhɛká.