Ìsá̰à̰ 3

Sèsíì nà Nìkòdɛ́m̀ wɛkɔ̰̀ku

¹ Dɔɔ̀ɔ òcɔ̰́ǹ-dà de péé Fàdísìpa mɛhɛká è yòǹ Sùwífùpa kpɛ̰́ǹn òcɔ̰́, kà p'òò toò Nìkòdɛ́m̀. ² K'ó tɛ̀ni Sèsíì pesá yèǹka kàcɔ̰́kà óò caka è yɔ̀: Dakpɛ̰́ǹn, ti yá̰á̰-ma è yɔ̀ Weèdi a tɔn-ní è yɔ̀ á ti biɔhàna, mìì tee-sá, òcɔ̰́ǹ pú kó nɛɛ́ pa̰á̰ yḭḭ́pà a pa̰kú-pà kà pà yon nìpa kà Weèdi p'óò péé-nà. ³ Kà Sèsíì óò tɛ̰́ná è yɔ̀: Wɛbemú-dà m'a cakú-ma, òcɔ̰́ǹ pú kó nɛɛ́ é dɛ́há Weèdi wóòti kà pà p'óò pɛdà pààma. ⁴ Kà Nìkòdɛ́m̀ óò béka è yɔ̀: Ntɛ́ pà kó hḭmà é tṵ́má pɛdá nìdo mɛ̀ǹǹ kpɛ̰́ń-ko? Ò kó nɛɛ́ é tṵ́má tón-ń-dà o màà pɛutí mɛhɛká k'óò pɛdá dɛ́ɛ̀ma?

⁵ Kà Sèsíì óò tɛ̰́ná è yɔ̀: Wɛbemú-dà m'a cakú-ma, kà pà pú pɛdà nìdo nà nɛ́ɛmá nà Weèdi Sèdi, ò pú kó nɛɛ́ é dúú Weèdi wóòti mɛhɛká. ⁶ Nìdo pɛdà-ko yòǹ nìi-dà, Weèdi Sèdi mɛ̀ɛ pɛdà-ko yòǹ Weèdi Sèdi kóoó-dà. ⁷ Yè d'áa dii nà m'a cakáà-ma è yɔ̀ nɛ yònà pá nɛ pɛdá pààma-dà. ⁸ Yakú heu kù kpɛ̀i-ká bɛ́ka-dà. A hɔ̰́ n'you ku nampàta-dà, a há̰ pú yá̰á̰ kù yɛ̀ni-sá-ní yoo kù yòǹ-kà bɛ́ka. Ma cɔ̰́ɔ̰̀di-dà nà nìpa pà pɛdà-pa nà Weèdi Sèdi.

⁹ Ye wɔ̀ni, kà Nìkòdɛ́m̀ óò béka è yɔ̀: Ntɛ́ ye kú niì kó nɛɛ́ hḭmà é pa̰ná? ¹⁰ Kà Sèsíì óò tɛ̰́ná è yɔ̀: Fɔ̰́ń-dà baà yòǹ Weèdi kpɛ̰́ńtìnùka biɔhànakó kpɛ̰́ǹn kà p'àà yá̰á̰ Ìsìdàyɛ́dì nìku mɛhɛká, k'àá pú yá̰á̰ ye kú niyà̰? ¹¹ Wɛbemú-dà m'a cakú-ma, ti wɛì ti yá̰á̰-sa-dà, è nɛ cakú ti dɛ́hà-sa. Àmá nɛ pú kpɛ̀i é teha ti wɛmá. ¹² Kà n nɛ wɛì-nà tenkà mɛnkà kú pa̰á̰ma wɛmá kà nɛ pú n dań, ntɛ́ nɛ kó hḭmà é nà n dań, n kó nɛ wɛɛ́-nà tḭ́ń wɔ̀ni hḭ́ǹka kú pa̰á̰ma wɛmá? ¹³ Òcɔ̰́ǹ pú dìsi hḭ́ǹka daadí yènì, Niìfòùo Bíitá bààsí mɛ̀ǹtà cútà-ta-ní nà hḭ́ǹka. ¹⁴ Mɔ̀yísì de kpɛ̰́káàma kú bookú máàhṵɛ̰tí wàfa dɔkú hḭ́ǹka càwenkú mɛhɛká é fà cɔ́á, ma kú bookú-dà pà kó hḭmá Niìfòùo bíitá é tà cɔ́á, ¹⁵ k'yé teha kà mɛ̀ǹǹ kú wɛnnì tà dań-ko é dɛ́tá fòùmu mɛ̀mù bá yɔ̀ɔ-pú. ¹⁶ Weèdi dɔ́káà fòùku sàma-dà é kɔ̰́ɔ̰́-ní ni bínàǹcɔ̰́, k'yé teha kà mɛ̀ǹǹ nì dań-ko dá sèǹ, àmá k'ó dɛ́tá fòùmu mɛ̀mù bá yɔ̀ɔ-pú. ¹⁷ Weèdi pú tɔn-ní ni bíitá fòùku mɛhɛká è yɔ̀ tá kɔ̰́ɔ̰́ yetádi nìku, àmá nì tà tɔn-ní è yɔ̀ tá kù fḭ́hìna-á-ma. ¹⁸ Mɛ̀ǹǹ tà dań-ko Weèdi pú k'óò kɔ̰́ɔ̰́ yetádi, àmá mɛ̀ǹǹ pú tà dań-ko Weèdi ò yɔ̀ɔ kɔ̰́ɔ̰́-pu-dà yetádi, mìì tee-sá ò pú dań Weèdi bínàcɔ̰́. ¹⁹ Ǹtɛ ye yetáma yɛɛ̀ni-sá-ní: Wenikú tɛ̀ni fòùku mɛhɛká, kà nìpa é kù yeda, é dɔ́ka yḭ́ḭ̀pu, mìì tee-sá pa pa̰á̰ma pú coó. ²⁰ Mɛ̀ǹǹ kú wɛnnì pa̰kú-ko sḭ̀ḭ̀ma hɔ̰́ n'sɛ̰ɛ̰́-ma wenikú, ò mɛ̀ɛ pú pení ku mɛhɛká mìì tee-sá, ò wani o pa̰á̰kpákpààma kó fodá-ma-dà. ²¹ Àmá, mɛ̀ǹǹ fòù-ko wɛbeèdi mɛhɛká, ò hɔ̰́ tɛ̀ni-í-ma-ní wenikú mɛhɛká k'yé teha kà pá dɛ́há é n'hɔ̰́tà o pa̰á̰ma bòn-nà Weèdi kpɛ̀kaàma.

Ìsá̰à̰ cakú è yɔ̀ Sèsíì ò wɛhi-nà

²² Ye kú dàhàka, kà Sèsíì é tadí Sùdéè tempáàku mɛhɛká n'ɔ̀ɔ dapàm̀ma. K'ó pa̰á̰ daàka cɛ̰́ma ye pesá nà mɛmpá, k'ò cómù nìpa. ²³ Kà Ìsá̰à̰ mɛ̀ɛ té péé Ènɔ́ɔ̀ è cómù nìpa è hɛ́dí-nà Sàdím̀ mìì tee-sá nɛ́ɛmá-dà de wɛhi ye pesá kà nìpa kɔ́dì-ní k'ò pà cómù. ²⁴ Yè de hɔ̰́tà pà mum p'óò kpenà.

²⁵ Daadí yènì, kà Ìsá̰à̰ dapàm̀ma pàcɔ̰́ é cetá nɔ̀nɔ̀hicí nà Sùwífù òcɔ̰́ǹ wekànamá kákámú hḭ́ǹka. ²⁶ Kà pá tadí Ìsá̰à̰ pesá é tɛ̀i óò béka è yɔ̀: Dakpɛ̰́ǹn, a káà dèn dɔɔ̀o mɛ̀ǹǹ d'aa péé-nà-ko Sùùtɛ̰́ɛ̰̀ súéhèdi tɔɔ̀di, a de ti cakáà-ko kú wɛmá? Sá̰mà, ò cómù-ú-ma, kà nìpa wɛǹni kɔ́dì o pesá.

²⁷ Kà Ìsá̰à̰ é pà tɛ̰́ná è yɔ̀: Òcɔ̰́ǹ pú kó nɛɛ́ é n'káá yècḭ́ḭ̀ kà Weèdi p'éè n'ɔ̀ɔ̀ kɔ̰́ɔ̰̀. ²⁸ Nɛ mɔ́mpá, nɛ kó nɛɛ́ caka-á-ma pópóí è yɔ̀ n yɔ̀: N pú yòǹ Kídísì, àmá pà n nihìnà-ní è yɔ̀ ń wɛdá o kpɛ́mú-dà. ²⁹ Nìdo mɛ̀ǹǹ tóńkú-ko poòo-dà héé podɔɔ̀o, podɔɔ̀o dópo há̰ hɔ̰́ n'nɛɛ̀hi o fɔ̰̀di-dà òò besí, k'yè t'óò n'nadi n'ɔ̀ɔ̀ you-má o boòku. Ye kú yaǹnaakù-dà mɛ̀ɛ té n hɔdà dɛ́dɛ́í. ³⁰ Yè békú mɛnń-dà é wɛhika kà mmí é yakàda.

Mɛ̀ǹǹ yɛ̀ni-kó-ní nà hḭ́ǹka

³¹ Mɛ̀ǹǹ péé-ko-ní nà hḭ́ǹka, mɛnń-dà wɛhinà niìya̰ wɛǹni. Mɛ̀ǹǹ péé-ko teǹka ò yòǹ tenkà kóoó-dà, ò mɛ̀ɛ hɔ̰́ n'wɛì tenkà kpɛ́ɛsá wɛmá-dà. Mɛ̀ǹǹ péé-ko-ní nà hḭ́ǹka, mɛnń-dà wɛhinà niìya̰ wɛǹni. ³² Mɛnn cakú ò yèkaà-sa-dà n'ɔ̀ɔ̀ dɛ́hà-sa-ní Weèdi pesá, òcɔ̰́ǹ há̰ pú bekù ò cakú-sa. ³³ Mɛ̀ǹǹ teháà-ko ò cakú-sa, ye yaǹn-dà bantà è yɔ̀ Weèdi cakú wɛbemú. ³⁴ Weèdi tɔn-kó-ní-dà cakú ni wɛmá mìì tee-sá, Weèdi-d'òò sṵ́nà ni Sèdi pɛ́pɛ́dí. ³⁵ Báàa dɔ́sí-ma o bíitá é tà kɔ̰́ɔ̰́ nɔɔ̀ti niìya̰ wɛǹni hḭ́ǹka. ³⁶ Mɛ̀ǹǹ dań-ko Weèdi bíitá, ò káá-ma fòùmu mɛ̀mù bá yɔ̀ɔ-pú. Mɛ̀ǹǹ mɛ̀ɛ pú tà you-nà-ko toòka, ò pú kó dɛ́tá ye fòùmù, Weèdi fɔ̰́di mɛ̀ɛ kó m'péé-ma o hḭ́ǹka.