Ìsá̰à̰ 2

Sèsíì cèhènà nɛ́ɛmá kà má hḭn naàma potóóma daadí.

¹ Data̰á̰di daadí, kà pá m'pa̰kú potóóma Kànáà yɔtí Kàdìdéè tempáàku mɛhɛká, kà Sèsíì màa yè péé. ² Kà pà mɛ̀ɛ té yíí Sèsíì n'ɔ̀ɔ dapàm̀ma ye potóóma. ³ K'yé m'pení pení, kà naàma^a é dóńtá, kà Sèsíì màa óò caka è yɔ̀: Pà koò pú kaá-nà naàma. ⁴ K'óò tɛ̰́ná è yɔ̀: N màà, fɔ̰́ń-dà kó n caka n kó pa̰á̰-sa? N wɔ̀ni mum pú tɛ̀i. ⁵ Ye wɔ̀ni, k'òo màa é caka ye potóóma dehèpa è yɔ̀: Pa̰á̰-nà ò kó nɛ caka-sá wɛǹni.

⁶ È hɔ̰́tà tá̰à̰ka yúùka kàkɔ̀dì péé ye pesá. Ka kú mɛhɛká-dà Sùwífùpa de hɔ̰́ pa̰á̰-ma nɛ́ɛmá é m'pa̰kú-nà pa wekànamá kákamú. Yúúdi bá mɛ̀nì dɛ̀ɛ̀-di de kó nɛɛ́ ta̰ǹta-á-ma dítídìpa kɔ̀ta kpɛ́ɛmá. ⁷ Kà Sèsíì é caka ye dehèpa è yɔ̀: Sṵ́ná-nà ye yúùkà nɛ́ɛmá. Kà pá kà sṵ́ná háá nà ka nùka. ⁸ K'ó pà caka è yɔ̀: Ya̰ntá-nà sá̰mà ye nɛ́ɛ́mà cɛ̰́ma é taá kɔ̰́ɔ̰́ potóóma dehèpa kpɛ̰́ǹn k'ó dɛmpa. Kà pá mà ya̰ntá é taá ò kɔ̰́ɔ̰́. ⁹ K'ó dɛmpa ye nɛ́ɛmá é n'hɔ̰́tà mà cèhènà é hḭn naàma. Ò de pú yá̰á̰ ye kú naàma yɛ̀ni-sá-ní, àmá dehèpa mɛ̀m̀pà de yúéí-pa ye nɛ́ɛmá, mɛmpa de yá̰á̰-ma mà yɛ̀ni-sá-ní. K'ó yíí ye podɔɔ̀o, ¹⁰ óò caka è yɔ̀: Nìi wɛǹni hɔ̰́ dɛnà é kɔ̰́ɔ̰́ cà̰m̀ma naànaamá-dà. Kà pà nìì tḭ́ń wɔ̀ni è dɛǹ, k'òá nɛɛ́ deèna-ní mɛ̀mà pú naa-má. Kà fɔ̰́ń há̰ hḭ́ná naànaamá háá wɔ̀nì mɛnì!

¹¹ Ye kú pɔ́ńtápa̰á̰mà-dà Sèsíì de pa̰à̰-ma Kànáà yɔtí, Kàdìdéè tempáàku mɛhɛká, kà mà yòǹ o yḭdó cecedó. Ò de ò pa̰nà è kó bɛka o wɛhimú sá̰pu-dà, k'òo dapàm̀ma é taàa pa dandaní o hḭ́ǹka. ¹² Ye kú dàhàka, k'ó sḭ́ńtá Kàpɛ̀ɛ̀nàúmù yɔtí n'ɔ̀ɔ màa, n'ɔ̀ɔ kúcàpa é pɛ́ɛ́-n'ɔ̀ɔ dapàm̀ma, kà pá tɛ̀i é pa̰á̰ ye pesá daàka cɛ̰́ma.

Sèsíì bɔ̀haà tantam̀ma Weèdi hɔ̰́ɔ̰̀ta mɛhɛká.

Dentá Màtíyéè 21.12-13; Mádíkì 11.15-17; Dúkì 19. 45-46

¹³ Sùwífùpa kúúdi pà toò-di *núǹtiyɛ̀ɛ̀ma kúúdi, dà de tɔ́sí, kà Sèsíì é póńtá Sèdìsàdɛ́m̀. ¹⁴ K'ó tɛ̀i é dúú Weèdi hɔ̰́ɔ̰̀ta mùǹku mɛhɛká, é dɛ́há nìpa kà pà yɛdí nɛ̀ci, nà hɔ̰̀ci, nà pàǹdɔ̀ka. K'ó múńtá dɛ́há-nà díiceèdapá kà pà kàdi pa tábúdìpa pesá. ¹⁵ Ye wɔ̀ni k'ó pa̰á̰ dáàfa nà wɛ̰̀ci, é pà bɔ̀hà pa wɛǹni, é pà dèna ye Weèdi hɔ̰́ɔ̰̀ta mɛhɛká, nà pa hɔ̰̀ci nà pa nɛ̀ci. K'ó wétá wétá díiceèdapá tábúdìpa, kà pa dící é ya-yahí teǹka. ¹⁶ K'ó yídá caka pàǹdɔ̀yɛdàpa è yɔ̀: Tóó-nà miì kú wɛnnì éè dèna. Nɛ dá kpáhìna n Báà hɔ̰́ɔ̰̀ta kààdi. ¹⁷ K'òo dapàm̀ma é deǹta-ní wɛmá pà wà̰tà-ma Weèdi pɔ̀kàta mɛhɛká è yɔ̀: Dɔ́kàma n káá-ma a hɔ̰́ɔ̰̀ta hḭ́ǹka-dà n hɔdà.

¹⁸ Ye wɔ̀ni, kà Sùwífùpa kpɛ̰́m̀ma óò béka è yɔ̀: Yḭdó wodà a kó pa̰á̰-ma é ti bɛka è yɔ̀ p'àà pɛ̰ḭ-ḭ́-dà nùdi è yɔ̀ á m'pa̰kú a pa̰à̰-sà? ¹⁹ Kà Sèsíì é pà tɛ̰́ná è yɔ̀: Pɔ́dá-nà Weèdi hɔ̰́ɔ̰́tà mɛntà, daàa kàta̰a̰ mɛhɛká, n kó tà maá-ma. ²⁰ Kà p'óò tɛ̰́ná è yɔ̀: Beeká púnàhì nà kàkɔ̀ɔ̀-dà pà pa̰à̰-ma é nɛɛ́ madí ye Weedì hɔ̰́ɔ̰́tà mɛntà, kà fɔ̰́ń há̰ kó pa̰á̰ daàa kàta̰a̰ é tà madí?

²¹ Ò há̰ de wɛì-ta Weèdi hɔ̰́ɔ̰̀ta de héé o wɔ̰̀ǹku-dà. ²² Sèsíì yá̰ńtáma dàhàka, k'òo dapàm̀ma é deǹta-ní è yɔ̀ ò de yè wɛdà-ho. Ye wɔ̀ni, kà pá taàa dandaní pà wà̰tà-sa Weèdi pɔ̀kàta mɛhɛká, nà wɛmá ò de wɛdà-ma.

Sèsíì yá̰á̰-ma mìì péé-sa nìdo yàma mɛhɛká.

²³ Sèsíì de péé Sèdìsàdɛ́m̀-dà ye núǹtiyɛ̀ɛ̀ma kúúdi daàka mɛhɛká. Kà nìpa dɔ́ɔ́di é dɛ́há pɔ́ńtápa̰á̰ma ò de pa̰kú-ma é taàa pa dandaní o hḭ́ǹka. ²⁴ Àmá Sèsíì de pú pà dań, mìì tee-sá ò de yá̰á̰-ma dɛ́dɛ́í pa wɛǹni yòm̀pu. ²⁵ Ò de pú békú p'óò caka yècɛ̰́ɛ̰̀ nìpa hḭ́ǹka, mìì tee-sá o mɔ́nń de yá̰á̰-ma mìì péé-sa nìdo yàma mɛhɛká.