Ìsá̰à̰ 1

Sèsíì wɛnaamá Ìsá̰à̰ wà̰haà-ma

Pà toò-ko Wɛmá-dà kɔ̰́nì Wenikú nà fòùmu nìpa.

¹ Nà cetáma, Wɛmá de yɔ̀ɔ péépu-dà. Ye Wɛmá de péé-nà Weèdi-dà è yòǹ Weèdi. ² Mà de péé-nà Weèdi-dà nà cetáma. ³ Weèdi de héè kà mɛmá-dà é pa̰á̰ niìi wɛǹni. Yècɛ̰́ɛ̰̀ kɔ́ɔ́ mìì péé-sà wɛnnì kà p'èè pa̰à̰ kà mà kɔ́ɔ́. ⁴ Ma mɛhɛká-dà fòùmu de péé-ma, k'yèe fòùmu mɛ̀ɛ kɔ̰́nì nìpa wenikú. ⁵ K'yèe wenikú tìi fa̰ṵ yḭ́ḭ̀pu mɛhɛká, yḭ́ḭ̀pu mɛ̀ɛ pú nɛɛ̀ é kù kɔ̀ù.

⁶ Kà Weèdi é tɔn-ní nìdo kà p'òò toò *Ìsá̰à̰. ⁷ K'ó tɛ̀ni è yòǹ pṵ́táko è kó caka wenikú wɛmá k'yé teha kà nìpa wɛǹni é n'dań ku hḭ́ǹka n'ɔ̀ɔ̀ de cakú-sa kpɛ́mú. ⁸ O mɔ́nń de pú yòǹ wenikú, àmá ò de tɛ̀ni è kó caka wenikú wɛmá-dà. ⁹ Ye kú wenikú-dà de yòǹ wenikú mɔ́nkú, mɛ̀ǹkù tɛ̀ni-kú-ní fòùku mɛhɛká è kó wekàna nìpa wɛǹni.

¹⁰ Ye Wɛmá mɛ̀mà de yòǹ-ma nìdo de péé-ma fòùku mɛhɛká. Weèdi pa̰à̰ fòùku nà mɛmá-dà, nà mɛma nìpa pú mà bantà. ¹¹ Kà má tɛ̀ni ma kpɛ́ɛpá pesá, ma kpɛ́ɛpá pú mà tà̰ǹtà. ¹² Àmá, kà pàcɔ̰́ é mà tà̰ǹta, è mà dań, kà má pà kɔ̰́ɔ̰́ nɔɔ̀ti kà pá hḭn Weèdi bííhí. ¹³ Pà pú hḭn Weèdi bííhí é n'yònà nìdo hɔ̰́ hḭmpú é pɛdá bííhí kà hí n'yòǹ o bííhí, àmá Weèdi-dà héè kà pá hḭn ni bííhí.

¹⁴ K'yèe Wɛmá hḭn nìdo é de tɛ̀ni è péé ti cɔhɔ̀ka è káá pa̰á̰suumá sàma, è toó wɛbeèdi. Ti dɛ́hà-á-ma wɛhimú Weèdi kɔ̰́ɔ̰̀-mu ni bínàcɔ̰́. ¹⁵ Ìsá̰à̰ de wɛdà-á-ma o wɛmá, ò de dedí kpeéma è yɔ̀: N de nɛ wɛì-ko kú wɛmá, n de tònà tḭ́ń wɔ̀ni: Mɛ̀ǹǹ pení-ko-ní n dàhàka n ha̰tà-á-ma, mìì tee-sá, ò de yɔ̀ɔ péé-pu-dà kà pá nɛɛ́ n pɛdá. ¹⁶ O kú pesá-dà pa̰á̰suumá wɛǹni tṵnì-ma-ní ma tɔɔ̀ma è yɛ̀hu-ní, kà ti mà dɛ́ɛ́kú. ¹⁷ Weèdi ti kɔ̰́ɔ̰̀-ní ni kpɛ̰́ńtìnùka nà Mɔ̀yísí-dà, àmá ni pa̰á̰suumá nà ni wɛbeèdi, Sèsí-Kídísì-d'èè ti tɛɛ̀ní. ¹⁸ Òcɔ̰́ǹ pú dɛ́hà Weèdi daadí yènì. Àmá ni bínàcɔ̰́ mɛ̀ǹǹ yòǹ-ko Weèdi, è péé-ní Báàa pesá-dà nì ti bahìnà.

Ìsá̰-Bàtísì cakáà-sa Sèsíì hḭ́ǹka

Dentá Màtíyéè 3.1-12; Mádíkì 1.1-8; Dúkì 3.1-18

¹⁹ Kà Sùwífùpa kpɛ̰́m̀ma é tɔn-ní nà Sèdìsàdɛ́m̀, Dɔ̀hàka yam̀ma nà *Dèfítìpa è yɔ̀ pá tɛ̀ni é béka Ìsá̰à̰ ò yòǹ-ko. Ǹtɛ ò de pà tɛ̰́ńkáàma: ²⁰ Ò de pú pà sɔ̀nà yècɛ̰́ɛ̰̀, àmá ò de pà cakáà-á-ma pópóí è yɔ̀: N pú yòǹ Kídísì. ²¹ Kà p'óò béka è yɔ̀: Aá yòǹ wodà? A yòǹ Èdíì-dà? K'ó pà tɛ̰́ná è yɔ̀: Ṵ́ṵ̀, n pú yòǹ Èdíì. Kà pà yɔ̀: A yòǹ *Weèdi wɛtɛ̰́náko ti ceí-ko-dà? K'ò yɔ̀: Ṵ́ṵ̀. ²² Ye wɔ̀ni kà pà yɔ̀: Aá yòǹ wodà? Ti caka-ní kà tí taá é dɛ́há ti kó caka-sá mɛ̀m̀pà ti tɔn-pá-ní. Fɔ̰́ń tonà a yòǹ wodà? ²³ K'ó pà tɛ̰́ná è yɔ̀: N kú wɛmá-dà Weèdi wɛtɛ̰́náko Èsàyíì de wɛdà-ma è yɔ̀: N yòǹ mɛ̀ǹǹ bekanì-ko-dà càwenkú mɛhɛká è tonà: Dɔ̀hà-nà cɔ̀ku kà kú n'cɔ́dí sukú Bateó kpɛ́mú.

²⁴ Pà de tɔn-pá-ní Ìsá̰à̰ pesá, pa mɛhɛká Fàdísìpa de péé-ma^a. ²⁵ Kà p'óò béka è yɔ̀: K'à pú yòǹ Kídísì, yoo Èdíì, yoo Weèdi wɛtɛ̰́náko ti ceí-ko, badà há̰ tee k'à *cómù nìpa? ²⁶ Kà Ìsá̰à̰ é pà tɛ̰́ná è yɔ̀: Mmí n nɛ cómù nà nɛ́ɛmá-dà. Àmá, òcɔ̰́ǹ péé-ma nɛ cɔhɔ̀kà kà nɛ mum p'óò yá̰á̰. ²⁷ Ò pení-ma-ní n dàhàka, bá n pú sànà n kó dákádá-ma o nɛ̀ùti nawɔ̰̀ǹci. ²⁸ Mii kú wɛnnì de pa̰kú *Bètàníì^b yɔtí-dà, Sùùtɛ̰́ɛ̰̀ kónsóìdi tɔɔ̀di Ìsá̰à̰ de cómù-sa nìpa.

Sèsíì, Weèdi hɔ̰ɔ̰̀bíidí

²⁹ K'yé weka, kà Ìsá̰à̰ é dɛ́há Sèsíì k'ò pení. K'ò yɔ̀: Ǹtɛ Weèdi *hɔ̰ɔ̰̀bíidí mɛ̀nì dèù-di nìku sḭ̀ḭ̀ma. ³⁰ Mɛnń kú wɛmá-dà n de wɛdà-ma è yɔ̀: Nìdo òcɔ̰́ǹ pení n dàhàka è n ha̰tà, mìì tee-sá ò de yɔ̀ɔ péé-pu-dà kà pá nɛɛ́ é n pɛdá. ³¹ N mɔ́nń de p'óò yá̰á̰, àmá n tɛ̀ni è cómù nìpa nà nɛ́ɛmá è kpɛ̀i óò bahìna Ìsìdàyɛ́dì nìku-dà.

³² K'ó tṵ́má wɛdá o hḭ́ǹka è yɔ̀: N dɛ́hà kà Weèdi Sèdi-dà é cútá-ní nà hḭ́ǹka è yònà pàǹdɔ̀di é tɛ̀ni é cɔ̰mú o hḭ́ǹka. ³³ Mmí, n de p'óò yá̰á̰, àmá mɛ̀ǹǹ n tɔn-kó-ní è yɔ̀ n ní n'cómù nìpa nà nɛ́ɛmá n cakáà è yɔ̀: A kó dɛ́há kà Weèdi Sèdi é cútá-ní é tɛ̀ni é cɔ̰mú-ko kú hḭ́ǹka, mɛnń-dà kó cóńtá nìpa nà Weèdi Sèdi^c. ³⁴ N dɛ́hà-sa-dà nà n nɔ̀ǹci è mɛ̀ɛ nɛ cakú è yɔ̀ ò yòǹ Weèdi bíitá-dà.

Sèsíì dapàm̀ma cecepá.

³⁵ K'yé weka, kà Ìsá̰à̰ é tṵ́má tóní ò wontà péé-sa è nɔɔ̀-nà o dapàm̀ma pàdɛ́ɛ́. ³⁶ K'ó dɛ́há Sèsíì k'ò kɛ̰hɛdi, k'ò yɔ̀: Ǹtɛ Weèdi hɔ̰ɔ̰̀bíidí. ³⁷ Y'oo dapàm̀ma pa dɛ́ɛ̀ka yeèkaà-ma k'ò yɔ̀ mɛma, kà pá yídá é tṵṵ̀na Sèsíì. ³⁸ Kà Sèsíì é fitá-ní é n'hɔ̰́tà p'òò tṵ̀n, k'ó pà béka è yɔ̀: Nɛ pɛnti ba? Kà p'óò tɛ̰́ná è yɔ̀: A hɔ̰́ɔ̰̀ta péé ya Hàdábí? (Ye yèdì kpɛ̀i é n'yɔ̀ dakpɛ̰́ǹn-dà.) ³⁹ K'ó pà tɛ̰́ná è yɔ̀: Ya̰ní-nà-ní é dɛ́há. Kà pá ka̰há é tɛ̀i é dɛ́há o hɔ̰́ɔ̰̀ta, é cá̰ńtá o pesá é dehà weǹtṵ́ṵní. Yè de hɔ̰́tà wɔ̀ni mànàhì kpɛ́ɛmá-dà podì yohokú.

⁴⁰ Ye nìi pàdɛ́ɛ́ mɛ̀m̀pà de yeèkaà-pa Ìsá̰à̰ wɛmá é tṵṵ̀na Sèsíì, p'oòcɔ̰́ kú yèdi-dà de dɛɛ̀ À̰ǹtìdéè, Sìmɔ́ɔ̀ Píyɛ́ɛ̀ kúcàa. ⁴¹ À̰ǹtìdéè de cedí é peèta-nà o kúcàa Sìmɔ́ɔ̀-dà óò caka è yɔ̀: Ti dɛ́hà-á-ma *Mɛ̀síì. (Ye yèdì kpɛ̀i é n'yɔ̀ Weèdi ta̰kadáko-dà, ni cɔ̰́ɔ̰̀di-dà nà Kídísì). ⁴² K'óò tanà Sèsíì pesá é tɛ̀i kà Sèsíì óò wáńtá è yɔ̀: A yèdi-dà Sìmɔ́ɔ̀, Ìsá̰à̰^d bíitá. Pà kó nà n'yún sá̰mà-ní *Sèfásì-dà. (Ye yèdì, mɛní-dà tṵ́mà dɛ̀ɛ̀ Píyɛ́ɛ̀ nà bookú tɔkú. Ka dɛ́ɛ̀di kpɛ̀i é n'yɔ̀ tá̰à̰di-dà).

Sèsíì yíí Fìdípù nà Nàtànàyɛ́dì.

⁴³ K'yé weka, kà Sèsíì é n'kpɛ̀i é taá Kàdìdéè tempáàku mɛhɛká é peèta-nà Fìdípù, óò caka è yɔ̀: N tṵṵ̀na-ní! ⁴⁴ Fìdípù de yòǹ Bɛ̀tìsàìdáà yɔtí kóoó-dà é n'yònà À̰ǹtìdéè nà Píyɛ́ɛ̀. ⁴⁵ Ye kú dàhàka, kà Fìdípù é peèta-nà Nàtànàyɛ́dì, óò caka è yɔ̀: Ti dɛ́hà-á-ma Mɔ̀yísì de wɛdà-ko kú wɛmá kpɛ̰́ńtìnùka pɔ̀kàta mɛhɛká, kà Weèdi wɛtɛ̰́nápa mɛ̀ɛ té de wɛdá o wɛmá pa pɔ̀kàhi mɛhɛká. Mɛnń-dà Sèsíì Nàsàdɛ́tì kóoó, Sòsɛ́fù bíitá. ⁴⁶ Kà Nàtànàyɛ́dì óò béka è yɔ̀: Suusá yècɛ̰́ɛ̰̀ kó nɛɛ́-dà é yɛɛ̀ní nà Nàsàdɛ́tì? Kà Fìdípù óò tɛ̰́ná è yɔ̀: Ya̰ní é dɛ́há.

⁴⁷ Kà Sèsíì é dɛ́há kà Nàtànàyɛ́dì pení o pesá, k'ó wɛdá o wɛmá è yɔ̀: Ǹtɛ Ìsìdàyɛ́dì bíitá mɔ́ntá kà nuǹhetí kɔ́ɔ́ ta mɛhɛká. ⁴⁸ Kà Nàtànàyɛ́dì óò béka è yɔ̀: Ntɛ́ a hḭmà è n yá̰á̰? Kà Sèsíì óò tɛ̰́ná è yɔ̀: M'a dɛ́hà-á-ma k'à kàdi *ka̰nka̰mú fɔ̰̀di kà Fìdípù é nɛɛ́ áa yíí. ⁴⁹ Kà Nàtànàyɛ́dì óò caka è yɔ̀: Dakpɛ̰́ǹn, a yòǹ Weèdi bíitá-dà, Ìsìdàyɛ́dìpa wódo. ⁵⁰ Kà Sèsíì óò tɛ̰́ná è yɔ̀: M'a cakáà-pu kpɛ́mú è yɔ̀ m'a dɛ́hà ka̰nka̰mú fɔ̰̀di, dà tee k'à dań nkɛ́ɛ̀? A kó dɛ́há-ma niìya̰ sàsa k'yè wɛhinà miì.

⁵¹ K'ò tṵ́mà yɔ̀: N nɛ cakú bemú-dà, nɛ kó dɛ́há-ma kà hḭ́ǹka é kpetá, kà Weèdi tɔntɔndipá dikù è cúúkú-ní *Niìfòùo bíitá hḭ́ǹka^e.