Ìsá̰à̰ 21

Sèsíì fodà o dapàm̀ma pàyehì

¹ K'yé pa̰á̰ daàka cɛ̰́masí, kà Sèsíì é tṵ́má bɛka o cɔ̰́ɔ̰̀di o dapàm̀ma kà pà péé Tìbèdìyátì yɔtí baàdi nùdi. Ǹtɛ o de pà bɛkáàma kú bookú o cɔ̰́ɔ̰̀di: ² Kà Sìmɔ́-Píyɛ́ɛ̀, nà Tòmáà pà tṵ́mà toò-ko kpɛ́kàta, nà Nàtànàyɛ́dì Kànáà yɔtí kóoó, k'yèe yɔtí péé Kàdìdéè tempáàku mɛhɛká, nà Sèbèdéè bííhí hìdɛ́ɛ́, nà Sèsíì dapàm̀ma tɔɔ̀pa pàdɛ́ɛ́, pa wɛǹni kà pà pɛ́ɛ̀ è péé. ³ Kà Sìmɔ́-Píyɛ́ɛ̀ é pà caka è yɔ̀: N kɔ́dí mɛ́nápu-dà. Kà p'óò tɛ̰́ná è yɔ̀: Tḭ́ńti mɛ̀ɛtékà, ti k'áa nɛǹta-á-ma.

Kà pá yídá é taá dìsi hà̰à̰pu é ka̰há, àmá ye yèǹka ka wɛǹni pà pú cɛ̰ɛ̰́ yècɛ̰́ɛ̰̀. ⁴ K'yé n'wekàta-ní, kà Sèsíì é tɛ̀ni é nɛɛ̀hi ye baàdi nùdi, àmá o dapàm̀ma pú bantà è yɔ̀ mɛnń-dà. ⁵ K'ó pà béka è yɔ̀: N bííhí-nà, nɛ pú káá num̀bíitá?

Kà p'óò tɛ̰́ná è yɔ̀: Á̰à̰, ti pú káá.

⁶ K'ó pà caka è yɔ̀: Ká̰ńtá-nà ká̰ńcḭ̀mu nɛ heùma, nɛ kó cɛ̰ɛ̰́-ma. Kà pá mù ká̰ńtá, é cɛ̰ɛ̰́ num̀bííhí sàma mɔ́ma, é hɛ̰ka pà kó mù dèna-má-ní nɛ́ɛmá mɛhɛká. ⁷ Ye wɔ̀ni, kà Sèsíì dapàǹn ò de dɔ́sí-ko é caka Píyɛ́ɛ̀ è yɔ̀: Ti Teó-dà.

Sìmɔ́-Píyɛ́ɛ̀ yèkaà-ma mɛma, é tṵ́má bádí o tókesàdi ò de bátà-di è kó mɛ́ná, ye wɔ̀ni é fékádá é cɛɛ̀da nɛ́ɛmá mɛhɛká. ⁸ K'yèe dapàm̀ma tɔɔ̀pa é tóní n'ɛ̀ɛ hà̰à̰pu baàdi nùdi, è yɔ̰́ǹ-ní ye ká̰ńcḭ̀mu, kà mù sṵ́nà num̀bííhí, mìì tee-sá pà de pú nátà-nà ni nùdi sàma. Ye ta̰nta̰ǹni de yòǹ mɛ́tídìdìpa kɔ̀ta kpɛ́ɛmá-dà. ⁹ Kà pá cútá-ní teǹka, é dɛ́há ye pesá pɛ̰́ɛ̰̀, nà ha̰mú kà num̀bíitá cɔ̰mú mu hḭ́ǹka. ¹⁰ Kà Sèsíì é pà caka è yɔ̀: Deèe-nà-ní num̀bííhí nɛ cɛ̰ɛ̰́-hi kú mɛhɛká.

¹¹ Kà Sìmɔ́-Píyɛ́ɛ̀ é dìsi ye hà̰à̰pu mɛhɛká é yɔ̰́ń ye ká̰ńcḭ̀mu é mù dèna-ní kpeèdi, kà num̀bíisàhi kɔ̀ta nà púnùm̀ nà hìta̰a̰ péé mu mɛhɛká. Nà mù de sṵ́nà-mà kú bookù, mù de pú cɛ́tà. ¹² Kà Sèsíì é pà caka è yɔ̀: Ya̰ní é dii-nà! O dapàm̀ma, p'oòcɔ̰́ǹ de pú cḭnà kṵnnɔ̀ǹfa óò béka mɛnn héé-ko, mìì tee-sá pà de bantà-á-ma è yɔ̀ Teó-dà. ¹³ Ye wɔ̀ni, k'ó hɛ́tá é tóó pɛ̰́ɛ̰̀ óò pà totá, é yíí tóó num̀bíitá è mɛ̀ɛ té tà pà totá. ¹⁴ Ta̰á̰ma-dà de dɛɛ̀ Sèsíì de bɛkú-ma o cɔ̰́ɔ̰̀di o dapàm̀ma, n'ɔ̀ɔ̀ yá̰ńtà-ma-ní kpíípa mɛhɛká.

Sèsíì nà Píyɛ́ɛ̀.

¹⁵ Pà dii-má é yɔ̀ɔ, kà Sèsíì é béka Sìmɔ́-Píyɛ́ɛ̀ è yɔ̀: Sìmɔ́ɔ̀, Ìsá̰à̰ bidà, a n dɔ́sí-dà é ha̰tá-nà tɔɔpà mɛmpà?

Kà Píyɛ́ɛ̀ óò tɛ̰́ná è yɔ̀: À̰à̰ n Teù, a yá̰á̰-ma è yɔ̀ m'a dɔ́sí.

K'óò caka è yɔ̀: Ní n'wisí n hɔ̰ɔ̰̀bíiká!

¹⁶ K'ó tṵ́m'ɔ́ɔ̀ béka dɛ́ɛ̀ma è yɔ̀: Sìmɔ́ɔ̀, Ìsá̰à̰ bidà, a n dɔ́sí-dà?

Kà Píyɛ́ɛ̀ óò tɛ̰́ná è yɔ̀: À̰à̰ n Teù, a yá̰á̰-ma è yɔ̀ m'a dɔ́sí.

Kà Sèsíì óò caka è yɔ̀: Ní n'wisí n hɔ̰̀ci!

¹⁷ K'óò béka ta̰á̰ma è yɔ̀: Píyɛ́ɛ̀, Ìsá̰à̰ bidà, a n dɔ́sí-dà? Kà Píyɛ́ɛ̀ yàma é cɔ̰ha n'ɔ̀ɔ̀ de tṵ́m'ɔ̀ɔ̀ békú-ma ta̰á̰ma k'òò dɔ́sí.

K'óò tɛ̰́ná è yɔ̀: N Teù, a yá̰á̰-ma niìi wɛǹni, è yá̰á̰ è yɔ̀ m'a dɔ́sí.

K'óò caka è yɔ̀: Ní n'wisí n hɔ̰̀ci! ¹⁸ Bemú-dà m'a cakú-ma, a de yòǹ tḭ́ń wɔ̀ni dapàǹn è té cɛ̰́ṵ́wá̰ a cɔ̰́ɔ̰̀di-dà a nawɔ̰̀ǹfa é taá a kpɛ̀i-ká bɛ́ka. Àmá, a kó kpɛ̰́ń tḭ́ń daadí, a kó yoòda-á-ma a nɔ̀hi kà tɔɔ̀ɔ òcɔ̰́ǹ é fà n'àà cɛ̰́ṵ́wá̰, áa tanà a pú kpɛ̀i-ká bɛ́ka. ¹⁹ Ò de wɛɛ̀ mɛma, è kpɛ̀i é bɛka Píyɛ́ɛ̀ kó kpíí-pu kṵ́mú kú bookú-dà é wɛkàna Weèdi yèdi. Ye kú dàhàka, k'ó caka Píyɛ́ɛ̀ è yɔ̀: N tṵṵ̀na!

Sèsíì n'ɔ̀ɔ dapàǹn ò de dɔ́sí-ko

²⁰ Kà Píyɛ́ɛ̀ é fitá é dɛ́há Sèsíì dapàǹn ò de dɔ́sí-ko k'ò tṵ̀n-ní pa dàhàka. Mɛnń-dà de bíkádà o cɔ̰́ɔ̰̀di Sèsíì bɛ́ka pà yon tḭ́ń daadí óò béka è yɔ̀: Ti Teù, woò k'áa yɛda? ²¹ Píyɛ́ɛ̀ ò dɛ́hà-ma, é béka Sèsíì è yɔ̀: Mɛnǹ mɛnn tá n Teù, baà k'óò tɛ̀ni?

²² K'óò tɛ̰́ná è yɔ̀: Kà n dɔ́sí ó n'fòù háá ká n yó tóní bad'àà dɛ́hà? Fɔ̰́ń, ní nà n tṵ̀n! ²³ K'yèe wɛmá é cemá pidá mɛ̀m̀pà de dań-pa Sèsíì cɔhɔ̀ka, kà pà tonà ye kú dapàǹǹ pú kó kpíí. Sèsíì há̰ de pú hḭ́n: Ò pú kó kpíí. Àmá, ò de yɔ̀: Kà n dɔ́sí ó n'fòù háá ká n yó tóní bad'àà dɛ́hà?

²⁴ Ye dapàǹn mɔ́nń-dà há̰ cakú ye wɛmà, mɛnń-dà mɛ̀ɛ tṵ́mà mà wà̰haà. T'aá yá̰á̰-ma è yɔ̀ ò cakú-sa yòǹ bemú-dà.

Wɛmá kɔ̀ùdi

²⁵ Sèsíì de tṵ́mà pa̰à̰-á-ma niìi tɔɔ̀sa dɔ́ɔ́di. Kà pà de k'éè wà̰hà yècɔ̰́ yècɔ̰́, n maàhaà fòùkù wɛnnì de bá nɛɛ́ é toó ye pɔ̀kàhi.