Ìsá̰à̰ 20

Sèsíì yá̰ńtáma

Dentá Màtíyéè 28.1-10; Mádíkì 16.1-8; Dúkì 24.1-12

¹ Yà̰di ká̰ńyɛ̰̀ǹfa pìdìpìdì, kà Màdíì Màkìtàdáà yɔtí kóoó é yɔ́dá é taá ye híúdi pesá. K'ó tɛ̀i è hɔ̰́tà tá̰à̰di mɛ̀nì de hḭ̀ḭ-dí ye híúdi nùdi hḭtà. ² K'ó cocí é taá dɛ́há Sìmɔ́-Píyɛ́ɛ̀ nà Sèsíì dapàǹn tɔɔ̀ɔ ò de dɔ́sí-ko, é pà caka è yɔ̀: Pà dèdà ti Teó wɔ̰̀ǹku híúdi mɛhɛká, ti mɛ̀ɛ pú yá̰á̰ pà kù tàà-yà.

³ Píyɛ́ɛ̀ n'ɛ̀ɛ Sèsíì dapàǹn tɔɔ̀ɔ, kà pá yɛɛ̀ni é taá ye híúdi pesá. ⁴ Pa dɛ́ɛ̀di, Kà pá n'cokù è kɛ̰hɛdi, k'yèe Sèsíì dapàǹn tɔɔ̀ɔ é ha̰nci Píyɛ́ɛ̀ é ta̰ntá ni pesá. ⁵ K'ó tɛ̀i boí é dentá ye híúdi mɛhɛká, é dɛ́há pɛ́ńcí kà cì dɔɔ́ teǹka, w'àá pú dúú. ⁶ Kà Sìmɔ́-Píyɛ́ɛ̀ óò n'tṵ̀n-ní, é tɛ̀ni dúú-ho ye híúdi mɛhɛká, é dɛ́há ye pɛ́ńcí kà cì dɔɔ́ teǹka, ⁷ nà kùdáapɛ́íta pà de pɔ̰ɔ̰̀-ta o yudí kà tà pɔ̰-pɔ̰ṵ́ è dɔɔ́ ta kú bɛ́kà. ⁸ Ye wɔ̀ni-dà ye Sèsíì dapàǹn mɛ̀ǹǹ de cedí ta̰ntá-ko-ní híúdi pesá, mɛ̀ɛ té dúú-ma. K'ó dɛ́há mìì de pa̰à̰-sa, é taàa o dandaní è yɔ̀ ò yá̰ńtà. ⁹ Sèsíì dapàm̀ma de mum pú bantà wɛmá pà wà̰tà-ma Weèdi pɔ̀kàta mɛhɛká è yɔ̀ ò yònà é yá̰ńtá-ma kpíípa mɛhɛká. ¹⁰ Ye kú dàhàka, kà pá fitá pa dɛ́ɛ̀di é kòǹ.

Sèsíì fodà Màdíì Màkìtàdáà yɔtí kóoó

Dentá Màtíyéè 28.9-10; Mádíkì 16.9-11

¹¹ Kà Màdíì Màkìtàdáà yɔtí kóoó mɛnn é cá̰ńtá è nɛ̀hi è hɛ́dí-nà ye híúdi è kɔǹ. K'ó n'kɔǹ, é boí é dentá ni mɛhɛká, ¹² é dɛ́há Weèdi tɔntɔndipá pàdɛ́ɛ́ kà pà báá nɛmpɛ́íti è kàdi Sèsíì wɔ̰̀ǹku de dɔɔ́-sa. Òcɔ̰́ o yudí de dɔɔ́-sa, tɔɔ̀ɔ o tàka bɛ́ka. ¹³ Kà p'óò béka è yɔ̀: Pooò fɔ̰́ń, baà tee k'à kɔǹ? K'ó pà tɛ̰́ná è yɔ̀: Pà dèdà n Teó wɔ̰̀ǹku-dà híúdi mɛhɛká, n mɛ̀ɛ pú yá̰á̰ pà kù tàà-yà.

¹⁴ Ò wɛɛ̀-ma mɛma é yɔ̀ɔ, é fitá é dɛ́há Sèsíì k'ò nɛ̀hi, w'àá p'óò bantà. ¹⁵ Kà Sèsíì óò béka è yɔ̀: Pooò fɔ̰́ń, baà tee k'à kɔǹ? A pɛnti wodà?

Ye poòo mɛnn de maàhu è tonà mɛ̀ǹǹ púsí-ko-dà ye tená yɛ̀di, ye kú kpɛ́mú-dà tee k'óò caka è yɔ̀: Dakpɛ̰́ǹn, kà fɔ̰́ń-dà tódà o wɔ̰̀ǹku, k'á n caka a kù hḭ́nà-sa ká n taá kù tóó-ní. ¹⁶ Kà Sèsíì óò yíí è yɔ̀: Màdíì! K'ó fitá Sèsíì bɛ́ka óò wɛɛ́-nà Hèbùdéèdi è yɔ̀: Dàbùníì, mìì kpɛ̀i é n'yɔ̀-sa n Dakpɛ̰́ǹn.

¹⁷ Kà Sèsíì óò caka è yɔ̀: Dá n pḭ́ń, mìì tee-sá n mum pú dìsi n Báàa pesá. Àmá, tɔɔ̀ta é taá caka n kúcàpa è yɔ̀: N dikìdì n Báàa bɛ́ka-dà mɛ̀ǹǹ mɛ̀ɛ té yòǹ-ko nɛ Báàa, n Weèdi bɛ́ka mɛ̀nì mɛ̀ɛ té yòǹ-di nɛ Weèdi.

¹⁸ Ye wɔ̀ni, k'yèe Màdíì Màkìtàdáà yɔtí kóoó é taá caka Sèsíì dapàm̀ma ye wɛmá è yɔ̀: N dɛ́hà-á-ma ti Teó. K'ó pà caka òò cakáà-sa-ní.

Sèsíì fodà o dapàm̀ma

Dentá Màtíyéè 28.16-20; Mádíkì 16.14-18; Dúkì 24.36-49

¹⁹ Ye yà̰di yookú è hɔ̰́tà o dapàm̀ma tíkà hɔ̰́ɔ̰̀ta tàcɔ̰́tà kú mɛhɛká kà cɔ̀ùka dásí, mìì tee-sá pà de wani Sùwífùpa kpɛ̰́m̀ma-dà. Kà Sèsíì é tɛ̀ni nɛɛ̀hi pa cɔhɔ̀ka é pà dɔwa è yɔ̀: Wɛ̀ɛ̀di é nɛ m'péé-nà!

²⁰ Ò pà dɔwáà-ma mɛma é yɔ̀ɔ é pà bɛka o nɔ̀hi n'ɔ̀ɔ pḭ̀ǹdikú. K'yé pà naaka dɛ́dɛ́í nà pà dɛ́hà-ma kpɛ́mú Teó. ²¹ Kà Sèsíì é tṵ́má pà dɔwa è yɔ̀: Wɛ̀ɛ̀di é nɛ m'péé-nà! É n'yònà n Báàa n tɔnkáàma-ní, ma kú bookú-dà n mɛ̀ɛ té nɛ tɔnti-má. ²² Ò wɛɛ̀-ma mɛma é yɔ̀ɔ, é fuùda yamú pa hḭ́ǹka é pà caka è yɔ̀: Ta̰ǹta-nà Weèdi Sèdi! ²³ Nɛ kó bútá-pa kú sḭ̀ḭ̀ma dàhàka, Weèdi kó mà pà dèda-á-ma. Kà nɛ mɛ̀ɛ yeé-pa kú sḭ̀ḭ̀ma dàhàka bútáma, nì pú kó mà pà dèda.

Sèsíì kɛ̰̀ḭ-nà Tòmáà o dandankɔ́ɔ̀ti hḭ́ǹka

²⁴ Yè de hɔ̰́tà Sèsíì tɔtɔndipá p'oòcɔ̰́, Tòmáà, pà toò-ko kpɛ́kàta de pú péé-nà o tɔɔ̀pa Sèsíì de pà foò tḭ́ń wɔ̀ni. ²⁵ K'òo tɔɔ̀pa óò caka è yɔ̀: Ti dɛ́hà-á-ma ti Teó.

K'ó pà tɛ̰́ná è yɔ̀: Kà mmí pú dɛ́hà pɔ̰́ńtìpa bòka o nɔ̀hi é taàa n há̰ḿbíifá ka mɛhɛká, é dɛ́há o pḭ̀ǹdikú bòdi, é taàa n nɔ̀ku ni mɛhɛká, n pú kó n'dań è yɔ̀ ò yá̰ńtà.

²⁶ Kàyeèho òcɔ̰́ kú dàhàka, kà Sèsíì tɔntɔndipá é tṵ́má tíká ye hɔ̰́ɔ̰̀ta mɛhɛká kà Tòmáà yè péé ye kú daadí. Kà Sèsíì é tɛ̀ni nɛɛ̀hi-hɔ̰ pa cɔhɔ̀ka k'yèe hɔ̰́ɔ̰̀ta cɔ̀ka dá-dásí nà pencí, k'ó pà dɔwa è yɔ̀: Wɛ̀ɛ̀di é nɛ m'péé-nà! ²⁷ Ye kú dàhàka, k'ó caka Tòmáà è yɔ̀: Cɔ́dí n nɔ̀hi. Baá a há̰ḿbíifá hi bòka mɛhɛká. Dɛɛ̀ɛ-ní a nɔ̀ku. Baá n pḭ̀ǹdikú bòdi. A koò dá n'yòǹ dandankɔ́ɔ̀ti yaǹn, ní n'dań.

²⁸ Kà Tòmáà óò tɛ̰́ná è yɔ̀: N Teù, n Weèdi!

²⁹ Kà Sèsíì óò caka è yɔ̀: A n dɛ́hà-pu kpɛ́mú-dà tee k'à dań è yɔ̀ n yá̰ńtè-è? Yé n'nadi mɛ̀m̀pà dań-pa è pú n dɛ́hà!

Mìì tee-sá kà pá wa̰hà pɔ̀kàtà mɛntà

³⁰ Sèsíì de tṵ́mà pa̰à̰-á̰-ma pɔ́ńtápa̰á̰ma tɔɔ̀ma dɔ́ɔ́di o dapàm̀ma yìhìka, àmá pà pú mà wà̰haà pɔ̀kàtà mɛntà kú mɛhɛká. ³¹ Wɛmà mɛ̀mà péé-mà ta mɛhɛkà, pà mà wà̰haà è kpɛ̀i nɛ́ bantá-ma è yɔ̀ Sèsíì-dà yòǹ Kídísì, Weèdi bíitá. Kà nɛ taà nɛ dandaní o hḭ́ǹka nɛ kó dɛ́tá-ma fòùmu n'ɔ̀ɔ yèdi.