Ìsá̰à̰ 19

¹ Ye wɔ̀ni, kà Pìdátì é kɔ̰́ɔ̰́ nùdi è yɔ̀ pá tódá Sèsíì óò podí dáàfa. ² Kà sósìpa é dɛ̀i poòma pókàta óò yíná è yɔ̀ wóopókàta-dà, é yíí óò báná tókésàdi hṵɛ̰dí mɔ̀ì. ³ Kà pà t'óò hɛ́tá-ho è yɔ̀: Ǹnad'aà Sùwífùpa wódo, è t'óò potá weǹfa.

⁴ Kà Pìdátì é tṵ́má yɛɛ̀ni tapaàdi é caka ye nìku è yɔ̀: Besí-nà. N kó héé kà p'óò dèna-á-ma-ní miì tapaadì, k'yé teha kà nɛ́ bantá è yɔ̀ n pú dɛ́hà yetádi nìcɔ̰́nì mɛ̀nì sànà-di t'óò kɔ̀ù.

⁵ Kà Sèsíì é yɛɛ̀ni tapaàdi è yídí poòma pókàta, è bádí tókesàdi hṵɛ̰dí mɔ̀ì. Kà Pìdátì é pà caka è yɔ̀: Ǹtɛ-nà ye nìdo!

⁶ Dɔ̀hàka kpɛ̰́m̀ma nà mɛ̀m̀pà ceí-pa Weèdi hɔ̰́ɔ̰̀ta ò dɛ́hà tḭ́ń wɔ̀ni, é dedí kpeéma è yɔ̀: Ò kpɛ̰́ḭ́ kpíidɔkú hḭ́ǹka! Ò kpɛ̰́ḭ́ kpíidɔkú hḭ́ǹka! Kà Pìdátì é pà caka è yɔ̀: Ò tóó-nà nɛ mɔ́mpá óò kpɛ̰́ḭ́ kpíidɔkú hḭ́ǹka. Mmí pú dɛ́hà yetádi nìcɔ̰́nì mɛ̀nì sànà-di t'óò kɔ̀ù.

⁷ Kà Sùwífùpa óò tɛ̰́ná è yɔ̀: Ti káá kpɛ̰́ǹtìnùdi-dà, ye kpɛ̰́ńtìnùdi mɛ̀ɛkà, nì békú ó kpíí-ma, mìì tee-sá ò hḭ́n ò yòǹ Weèdi bíitá-dà.

⁸ Pìdátì yèkaà-ma ye kú wɛmá, kà wantafɔ̰̀di é dɔ̀hà óò cɛ̰ɛ̰́ dɛ́dɛ́í. ⁹ K'ó tón o nahàku mɛhɛká é tɛ̀i é béka Sèsíì è yɔ̀: A yɛɛ̀ni-nà-ní yadà? Àmá Sèsíì p'óò tɛ̰́nà màcɔ̰́mà. ¹⁰ Ye wɔ̀ni, kà Pìdátì óò béka è yɔ̀: Mmí-dà a pú kpɛ̀i é tɛ̰́ná-ma màcɔ̰́mà? A pú yá̰á̰ è yɔ̀ n káá-ma nɔɔ̀ti è kó nɛɛ́ héé kà p'áa wɛ́í-i, è káá nɔɔ̀ti è kó nɛɛ́ héé kà p'áa kpɛ̰́ḭ́ kpíidɔkú hḭ́ǹka?

¹¹ Kà Sèsíì óò tɛ̰́ná è yɔ̀: A pú káá nɔɔ̀ti tìcɔ̰́tì n hḭ́ǹka k'yè pú yòǹ Weèdi a kɔ̰́ɔ̰̀-ti-ní. Mɛmá-dà tee mɛ̀ǹǹ n tàà-ko a nɔ̀hi mɛhɛká kú sḭ̀ḭ̀ma wɛhi-nà-ma a kpɛ́ɛmá.

¹² É cɛ̰ɛ̰́-nà ye kú wɔ̀ni, kà Pìdátì é m'pɛnti cɔ̀ci ò kó hḭmpú é wɛ́í Sèsíì. Àmá, kà Sùwífùpa é dedí kpeéma è yɔ̀: Kà wɛ́i dɔɔɔ̀ mɛnǹ, a pú yòǹ Hɔ̀dɔ́m̀ wóosào dópo. Mɛ̀ǹǹ kú wɛnnì kó n'yɔ̀-ko ò yòǹ wódo, yòǹ Hɔ̀dɔ́m̀ wóosào kà̰à̰tɔ̀ɔ-dà.

¹³ Pìdátì yèkaà-ma kà pà wɛì mɛma, k'ó deèna-ní Sèsíì tapaàdi, é tɛ̀ni é kaàdi sídàko kààta, kà tà péé bɛ̀m̀bɛ̀ni nìcɔ̰́nì kà pà nì cèe nà tá̰à̰ka, kà Hèbùdéèpa nì yún Kàbàtáà. ¹⁴ Núǹtiyɛ̀ɛ̀ma kúúdi-dà de hà̰n, è hɔ̰́tà wèǹku beé-nà yuùka hḭ́ǹka, kà Pìdátì é caka Sùwífùpa è yɔ̀: Ǹtɛ-nà nɛ wódo!

¹⁵ Kà pá dedí kpeéma è yɔ̀: Ò yònà é kpíí-dà! Ò yònà é kpíí-dà! Ò kpɛ̰́ḭ́ kpíidɔkú hḭ́ǹka.

Kà Pìdátì é pà béka è yɔ̀: Ń héé kà pá kpɛ̰́ḭ́ nɛ wódo kpíídɔkú hḭ́ǹka?

Kà dɔ̀hàka kpɛ̰́m̀ma é tɛ̰́ná è yɔ̀: Ti pú káá wódo tɔɔ̀ɔ òcɔ̰́ǹ, Hɔ̀dɔ́m̀ wóosào bààsí. ¹⁶ Ye wɔ̀ni, kà Pìdátì óò tàa pa nɔ̀hi mɛhɛká, kà pà k'óò kpɛ̰́ḭ́ kpíidɔkú hḭ́ǹka.

Pà kpɛ̰́ḭ́ Sèsíì kpíidɔkú hḭ́ǹka

Dentá Màtíyéè 27.32-44; Mádíkì 15.21-32; Dúkì 23.26-43

Kà sósìpa é tóó Sèsíì óò ka̰há-nà. ¹⁷ Kà Sèsíì mɔ́nń é toó o kpíidɔkú é yɛ̀dì yɔtí mɛhɛká é ta̰ntá bɛ̀m̀bɛ̀ni pà toò-di yukókóku, kà Hèbùdéèpa nì yún Kɔ̀ɔ̀kòtáà. ¹⁸ Ye pesá-dà pà d'óò kpɛ̰́ḭ́-ma kpíidɔkú hḭ́ǹka. Pà de pɛ́ɛ̀ óò kpɛ̰́ḭ́-nà niìdaapá pàdɛ́ɛ́-dà kpíidɛcí hḭ́ǹka, òcɔ̰́ o heùma, tɔɔ̀ɔ o cà̰ǹkamá kà mɛnn sɛ́sí cɔhɔ̀ka.

¹⁹ Kà Pìdátì é kɔ̰́ɔ̰́ nùdi kà pá wa̰à̰ta wà̰a̰cí dawɛɛtá hḭ́ǹka, é tà dàna kpíidɔkú hḭ́ǹka, kà cì tonà: Sèsíì Nàsàdɛ́tì kóoó, Sùwífùpa wódo. ²⁰ Sùwífùpa dɔ́ɔ́di de kaàn-ń-ma ye wà̰a̰cí, mìì tee-sá pà de kpɛ̰́ḭ́-sa Sèsíì de pú nátà-nà yɔtí. Pà de wa̰à̰haà ye wà̰a̰cí nà Hèbùdéèdi-dà, nà Dàtɛ̰́ɛ̰̀di, nà kɛ̀dɛ̀kìdi. ²¹ Ye wɔ̀ni, kà Sùwífùpa dɔ̀hàka kpɛ̰́m̀ma é caka Pìdátì è yɔ̀: A dá wa̰à̰ta Sùwífùpa wódo. Àmá á wa̰à̰ta è yɔ̀ mɛnń-dà yɔ̀ ò yòǹ Sùwífùpa wódo.

²² Kà Pìdátì é pà tɛ̰́ná è yɔ̀: N wa̰tà-sa, n yè wà̰tà-á-dà.

²³ Sósìpa kpɛ̰́ḭ́-ma Sèsíì kpíidɔkú hḭ́ǹka é yɔ̀ɔ, é tóó o nɛǹti é tì totá cɛ̰má mànàhì bá pa mɛ̀ǹǹ dɛ̀ɛ̀ k'ó tódá màcɔ̰́. Kà pá pɛ́ɛ́ é tóó-nà o tókesàdi kà nì pú yòǹ tókekpáádi, nì de yòǹ tókedɛ̀idí-dà ni wɛn-wɛǹni. ²⁴ K'yèe sósìpa é caka pa tɔɔ̀pa è yɔ̀: Ti dá nì cɛ́tá, àmá tí nì ta̰á̰ tɛ́tɛ́ é dɛ́há mɛ̀ǹǹ kó nì dii-kó.

Ma kú bookú-dà Weèdi wɛmà mɛmà de pa̰à̰-ma: Pà totà n nɛǹti é yɔ̀ɔ é ta̰á̰ n tókedɛudí tɛ́tɛ́^a. Mɛmá-dà ye sósìpa de pa̰à̰-ma.

²⁵ Kà Sèsíì màa, n'ɔ̀ɔ màya̰ǹn, nà Màdíì Kèdòpásì poòo, nà Màdíì Màkìtàdáà kóoó, nɛɛ̀hi é hɛ́dí-nà o kpíidɔkú. ²⁶ K'ó dɛ́há o màa, k'òo dapàǹn ò de dɔ́sí-ko nɛɛ̀hi ò hɛ́dí-nà. K'ó caka o màa è yɔ̀: N màà, ǹtɛ a bíitá.

²⁷ K'ó yíí caka ye dapàǹn è yɔ̀: Ǹtɛ a màa. É cɛ̰ɛ̰́-nà ye kú daadí, k'yèe dapàǹn é tódá Màdíì óò kònà o hɔ̰́ɔ̰̀ta.

Sèsíì kṵ́mú

Dentá Màtíyéè 27.45-56; Mádíkì 15.33-41; Dúkì 23.44-49

²⁸ Ye kú dàhàka, Sèsíì há̰ de yá̰á̰-ma è yɔ̀ niìi wɛǹni cɛ̰nà-á-ma sá̰mà, k'ó wɛdá yè kó hḭmá kà Weèdi wɛmà mɛmà é pa̰ná, k'ò yɔ̀: Nɛ́yà̰a̰kú-dà n káá.

²⁹ Cɔ̀ta tàcɔ̰́tà-dà há̰ de péé ye pesá, kà dìfɛ̰́ɛ̰̀ naàkpáńkpáǹni tà sṵ́nà. Kà sósìpa é sɛ̰ɔ̰̀wa̰ cɛbùti ye dìfɛ̰́ɛ̰̀ naàkpáńkpáǹni mɛhɛká, é tì bowá tesá pà toò-sa ìsɔ́pù dɛ̀ɛkú é hɛ́hìna-hɔ̰ o nùdi. ³⁰ Ò nì dɛmpáà-ma é yɔ̀ɔ, è yɔ̀: Niìi wɛǹni cɛ̰nà-á-ma. Ye wɔ̀ni é sḭ́ná o yudí é tɔ̰ɔ̰̀ta.

Sóso kpɛ̰́ḭ́ kpa̰ǹni Sèsíì pḭ̀ǹdikú

³¹ Yè de hɔ̰́tà ye daadì-dà sɛ́sí, k'yè kó wentá damuhipàdi. Sùwífùpa kpɛ̰́m̀ma há̰ de pú kpɛ̀i pà kpɛ̰́ḭ́-pa wɔ̰̀ǹti é n'kaá kpíidɛcí hḭ́ǹka, mìì tee-sá ye kú damuhipàdì de ha̰tà-á-ma tɔɔ̀ka. Ye kú kpɛ́mú, kà pá taá é cɔhà Pìdátì è yɔ̀ ó héé kà pá bɔ́si pà kpɛ̰́ḭ́-pa kpíidɛ́cí hḭ́ǹka tàka, é nɛɛ́ cúhìna-ní pa wɔ̰̀ǹti. ³² Kà Pìdátì é pà pa̰a̰ nùdi. Ye wɔ̀ni, kà sósìpa é yíí é taá ye nìpa pà de pɛ́ɛ̀ é kpɛ̰́ḭ́-nà-pa Sèsíì kpíidɛcí hḭ́ǹka pesá, é tɛ̀i é bɔ́si cecedó tàka, é yɔ̀ɔ é hḭn mɛma dɛ́ɛ̀do kpɛ́ɛká. ³³ Pà ta̰ntà-ma Sèsíì pesá, é n'hɔ̰́tà ò cem̀ yɔ̀ɔ kpíipú. Ye kú kpɛ́mú-dà tee pà de pú bɔ́si-má o kú tàka. ³⁴ K'yèe sósìp'oòcɔ̰́ é kpɛ̰́ḭ́ Sèsíì pḭ̀ǹdikú kpa̰ǹni é duùta-ho, kà hḭ̀ma nà nɛ́ɛmá é wudí-ní ye pesá n'ɛ̀ɛ pesá. ³⁵ Mɛ̀ǹǹ dɛ́hà-ko ye pa̰á̰mà n'ɔ̀ɔ nɔ̀ǹci, mɛnń-dà mà cakú. O mɔ́nń mɛ̀ɛ yá̰á̰-ma è yɔ̀ ò cakú-sa yòǹ bemú-dà. W'èè cakú è kpɛ̀i nɛ mɛ̀ɛ té yè n'dań-ma. ³⁶ Yè pa̰à̰ mɛma kú bookú, yè kó hḭmpú-dà kà Weèdi wɛmà mɛmà é pa̰ná: Pà pú kó pɔ́dá o kɔ̰́ɔ̰́di nìcɔ̰́nì. ³⁷ Weèdi pɔ̀kàta mɛhɛká, pà tṵ́mà wà̰tà bɛ́ɛ́kú tɔkú è yɔ̀: Pà kó wáńtá-ma pà kpɛ̰́ḭ́-ko kpa̰ǹni.

Sèsíì dánáma

Dentá Màtíyéè 27.57-61; Mádíkì 15.42-47; Dúkì 23.50-56

³⁸ Ye kú dàhàka, kà Sòsɛ́fù Àdìmàtéè yɔtí kóoó é tɛ̀ni cɔhà Pìdátì nùdi è k'ó tódá Sèsíì wɔ̰̀ǹku é taá kù dáná. Ye Sòsɛ́fù de yòǹ Sèsíì dapàǹn-dà sɔ̀sɔ̀ma mɛhɛká, mìì tee-sá ò de wani-í-ma Sùwífùpa kpɛ̰́m̀ma. Kà Pìdátì é teha, k'ó kù tódá é kù ka̰hàna. ³⁹ Kà Nìkòdɛ́m̀ mɛ̀ǹǹ de taá-ko daadí yènì Sèsíì pesá yèǹka, mɛ̀ɛ té tɛ̀ni, è toó-ní tùdàakɔkadáko, kà p'òò pa̰à̰-nà tecí pà toò-ci mìíì nà àdòwɛ́sì. Ye tùdàdé yṵṵ̀humú de yɔ̀ɔ-ɔ́-ma kìdóòpa púta̰a̰ kpɛ́ɛmá. ⁴⁰ Pa dɛ́ɛ̀di, kà pá tódá Sèsíì wɔ̰̀ǹku é kù pa̰á̰ tùdàdépa, é yɔ̀ɔ é kù fḭń pɛ́ńcí é n'yònà Sùwífùpa hɔ̰́ hḭmpú é nɛɛ́ dáná kpíìo. ⁴¹ Tená yɛ̀di-dà há̰ de péé bɛ̀m̀bɛ̀ni pà de kpɛ̰́ḭ́-di Sèsíì, ni mɛhɛká kà kpíifɔ̰̀ɔ̰kú pànkú péé, kà pà mum pú kù tàà kpíìo daadí yènì. ⁴² Ku kú mɛhɛká-dà pà de taà-ma Sèsíì wɔ̰̀ǹku, mìì tee-sá kù de tɔ́sí-nà ye pesá-dà, kà damuhipàdi tṵ́mà hà̰n.