Ìsá̰à̰ 18

Sèsíì cɛ̰ɛ̰́ma

Dentá Màtíyéè 26.47-56; Mádíkì 14.43-50; Dúkì 22.47-53

¹ Sèsíì pa̰à̰-ma ye kú cɔhɔ̀mà é yɔ̀ɔ, n'ɔ̀ɔ dapàm̀ma kà pá yíí é deèta Sètìnɔ́ɔ̀ kóndafá sóìdi tɔɔ̀di. Tená yoǹku-dà de péé ye pesá, k'ó tɛ̀i é dúú ku mɛhɛká n'ɔ̀ɔ dapàm̀ma. ² Sùdásì mɛ̀ǹǹ de k'óò yɛɛ-kó há̰ de yá̰á̰-ma ye bɛ̀m̀bɛ̀nì, mìì tee-sá Sèsíì n'ɔ̀ɔ dapàm̀ma de nì kɔ́dì-í-ma è pèèku. ³ Kà Sùdásì é tɛ̀ni ye tená yɛ̀di mɛhɛká, è nɔɔ̀-nà-ní sósìpa dɔ́ɔ́di nà Weèdi hɔ̰́ɔ̰̀ta ceípa, kà dɔ̀hàka kpɛ̰́m̀ma nà Fàdísìpa tɔn-ní mɛmpa. Kà pá tɛ̀ni è toó-ní ha̰pḭ́ḭcí, nà ha̰wèhi, nà ta̰nɛǹti.

⁴ Sèsíì mɛnn há̰ de yá̰á̰-ma mìì kú wɛnnì k'óò tɛ̀ni-sá-ní tá, k'ó pà tɔ́ká-ho é pà béka è yɔ̀: Wodà nɛ pɛnti-má?

⁵ Kà p'óò tɛ̰́ná è yɔ̀: Sèsíì Nàsàdɛ́tì kóoó.

K'ó pà caka è yɔ̀: Mmí-dà mɛmà.

Kà Sùdásì mɛ̀ǹǹ k'óò yɛɛ-kó péé ye nìpa mɛhɛká. ⁶ Sèsíì pà cakáà-ma è yɔ̀ mɛnń-dà mɛmà, kà pá yɛ́ɛ́pa é dɔtìna teǹka. ⁷ K'ó tṵ́má pà béka è yɔ̀: Wodà nɛ pɛnti-má?

Kà pà yɔ̀: Sèsíì Nàsàdɛ́tì kóoó.

⁸ K'ó pà tɛ̰́ná è yɔ̀: N nɛ yɔ̀ɔ cakàpu-dà è yɔ̀ mmí-dà miì. Kà mmí-dà nɛ pɛnti-má, kà nɛ́ héé mɛmpà kà pá ka̰há. ⁹ Ma kú bookú-dà ò de wɛɛ̀-ma wɛmá de pa̰à̰-ma. Ò de cakáà o Báàa è yɔ̀: N pú fénà òcɔ̰́ǹ a n kɔ̰́ɔ̰̀-pa mɛhɛká. ¹⁰ È hɔ̰́tà Sìmɔ́-Píyɛ́ɛ̀ toó seedí, k'ó nì nɔ̀ta-ní é cɔɔ̀da dɔ̀hàka kpɛ̰́ǹn núndeho, é fiìta-ho o toheudí. Ye núndeho yèdi-dà de dɛɛ̀ Màdìkúsì. ¹¹ Kà Sèsíì é caka Píyɛ́ɛ̀ è yɔ̀: Tɛ̰́ná é nɔɔ̀na a seedí ni píìku mɛhɛká. A maàhu è tonà n pú kó dii-í-dà náńkú n Báàa hḭ́n n dii-kú?

Pà tanà Sèsíì Ànásì pesá

¹² K'yèe sósìpa nà pa dapàǹkpɛ̰́ǹn, nà Weèdi hɔ̰́ɔ̰̀ta ceípa, é cɛ̰ɛ̰́ Sèsíì óò dáká.

¹³ Kà pá cedí óò tanà Ànásì pesá. Ànásì de yòǹ Kàyífù cɛ̀ko-dà, kà Kàyífù mɛnn yòǹ ye kú benní dɔ̀hàka kpɛ̰́ǹn. ¹⁴ Kàyífù-dà há̰ de kɔ̰́ɔ̰̀ Sùwífùpa kpɛ̰́m̀ma teḿmà mɛmà: Yè tɔ̰ṵ-ṵ́-ma nìi òcɔ̰́ kpíí nìku wɛǹni kpɛ́mú.

Píyɛ́ɛ̀ nɔ̀hì è yɔ̀ ò pú yòǹ Sèsíì dapàǹn

Dentá Màtíyéè 26.69-70; Mádíkì 14.66-68; Dúkì 22.55-57

¹⁵ Sìmɔ́-Píyɛ́ɛ̀ nà Sèsíì dapàǹn tɔɔ̀ɔ òcɔ̰́ǹ, kà pà tṵ̀n Sèsíì. Ye dapàǹn tɔɔ̀ɔ, dɔ̀hàka kpɛ̰́ǹn de ò yá̰á̰-ma, ye kú kpɛ́mú k'ó pɛ́ɛ́ é dúú-nà Sèsíì o hɔ̰́ɔ̰̀ta mùǹku mɛhɛká. ¹⁶ Kà Píyɛ́ɛ̀ mɛnn é cá̰ńtá è nɛ̀hi tapaàdi ye hɔ̰́ɔ̰́tà há̰ńnùdi. Mɛmá-dà, k'yèe dapàǹn tɔɔ̀o, dɔ̀hàka kpɛ̰́ǹn yá̰á̰-ko é yɛɛ̀ni é tɛ̀ni é wɛɛ́-nà poòo mɛ̀ǹǹ de ceí-ko há̰ńnùdi, é dúùwa Píyɛ́ɛ̀. ¹⁷ K'yèe poòo mɛ̀ǹǹ ceí-ko há̰ńnùdi é béka Píyɛ́ɛ̀ è yɔ̀: Fɔ̰́ń mɛ̀ɛtékà, a pú yòǹ ye dɔɔɔ̀ o dapàm̀ma p'oòcɔ̰́?

Kà Píyɛ́ɛ̀ óò tɛ̰́ná è yɔ̀: Áà, n baà pú yòǹ o dapàǹn.

¹⁸ Sémú há̰ de péé-ma tá, k'yèe hɔ̰́ɔ̰̀ta núndehàpa nà mɛ̀m̀pà ceí-pa Weèdi hɔ̰́ɔ̰̀ta é pa̰á̰ ha̰mú è kàdi è ha̰dì. Kà Píyɛ́ɛ̀ mɛ̀ɛ té tɛ̀ni è pà kàdi-nà è ha̰dì.

Dɔ̀hàka kpɛ̰́ǹn békú Sèsíì wɛmá

Dentá Màtíyéè 26.59-66; Mádíkì 14.55-64; Dúkì 22.66-71

¹⁹ Kà dɔ̀hàka kpɛ̰́ǹn é béka Sèsíì o dapàm̀ma hḭ́ǹka, nà ò biɔhànì-sa hḭ́ǹka.

²⁰ K'óò tɛ̰́ná è yɔ̀: N wɛɛ̀-nà-á-ma nìpa wɛǹni nìku yìhìka. N biɔhanà-á-ma daàka wɛǹni Weèdi wɛmá biɔhà-nàmɔ̀ka mɛhɛká, nà Weèdi hɔ̰́ɔ̰̀ta mɛhɛká Sùwífùpa wɛǹni hɔ̰́ tíká-sa. N pú sɔ̀ɔ é wɛdá yècḭ́ḭ̀. ²¹ Badà tee k'à n békú? Béka mɛ̀m̀pà n besí-pa n pà cakáà-sa. Mɛmpa yá̰á̰-ma sukú n pà cakáà-sa.

²² Ò wɛɛ̀-ma mɛma, kà mɛ̀m̀pà ceí-pa Weèdi hɔ̰́ɔ̰̀ta p'oòcɔ̰́ mɛ̀ǹǹ d'oò hɛ́dí-nà-ko óò potá weǹfa è yɔ̀: Dɔ̀hàka kpɛ̰́ǹn-dà a tɛ̰́nì-ma mɛma?

²³ K'óò tɛ̰́ná è yɔ̀: Kà n wɛɛ̀-ma kpákpààma, k'á mà nà n caka-ní. Àmá, kà n há̰ wɛɛ̀-sa coó-dà, badà tee k'á n potá?

²⁴ Kà Ànásì é héé k'ó n'káà dásí, k'óò kɔ̰́ɔ̰́-hɔ̰ dɔ̀hàdi kpɛ̰́ǹn Kàyífù.

Píyɛ́ɛ̀ tṵ́mà nɔ̀hì Sèsíì

Dentá Màtíyéè 26.71-75; Mádíkì 14.69-72; Dúkì 22.58-62

²⁵ Ye wɔ̀ni, kà Sìmɔ́-Píyɛ́ɛ̀ baà péé ye pesá è ha̰dì ha̰mú. Kà p'óò béka è yɔ̀: Fɔ̰́ń mɛ̀ɛtékà, a pú yòǹ ye dɔɔɔ̀ o dapàm̀ma p'oòcɔ̰́? Àmá, kà Píyɛ́ɛ̀ é nɔ̀hì è yɔ̀: Áà, n baà pú yòǹ o dapàǹn.

²⁶ Kà dɔ̀hàdi kpɛ̰́ǹn núndehàpa p'oòcɔ̰́, k'ò yòǹ Píyɛ́ɛ̀ de fità-ko kú toodí yɛǹn, óò béka è yɔ̀: Fɔ̰́ń dɔ n dɛ́hà-ma-ní tená yoǹku mɛhɛká k'à ò nɔɔ̀-nà?

²⁷ Kà Píyɛ́ɛ̀ é tṵ́má é nɔ̀hì è yɔ̀ ò p'óò yá̰á̰. Ye pesá n'ɛ̀ɛ pesá, kà kóotá é kɔń.

Pà tanà Sèsíì Pìdátì pesá

Dentá Màtíyéè 27.1-2, 11-14; Mádíkì 15.1-5; Dúkì 23.1-5

²⁸ Ye kú dàhàka, ká̰ńyɛ̰̀ǹfa pìdìpìdì, kà pá deèna-ní Sèsíì Kàyífù hɔ̰́ɔ̰̀ta, óò tanà ye tempáàku yìkàǹyìdo nahàku. Àmá, kà Sùwífùpa kpɛ̰́m̀ma é yeda pà kó dúú-ma ku mɛhɛká. Pà de pú kpɛ̀i é pa̰á̰ pa cɔ̰́ɔ̰̀di yɔ̰́káma, é nɛɛ́ dii núǹtiyɛ̀ɛ̀ma kúúdi dipú. ²⁹ Mɛmá-dà de tee, kà yìkàǹyìdo Pìdátì é yɛɛ̀ni é pà pèta-nà tapaàdi é pà béka è yɔ̀: Nɛ dɛ́hà yetádi m̀mɔ́ni-dà ye dɔɔɔ̀ mɛnǹ hḭ́ǹka?

³⁰ Kà p'óò tɛ̰́ná è yɔ̀: K'ò de pú yòǹ niìkpákpàdo, è yenì ti p'óò tɛɛ̀-ní óò tàa a nɔ̀hi mɛhɛká.

³¹ Kà Pìdátì é pà caka è yɔ̀: Ò tóó-nà nɛ mɔ́mpá óò síi-nà é n'yònà nɛ kpɛ̰́ńtìnùka hḭ́mpú.

Kà pà yɔ̀: Nɛ kpɛ̰́ńtìnùka pú ti pɛ̰ḭ foóma è yɔ̀ tí deèna-ní nùdi é kɔ̀ù nìdo.

³² Ma kú bookú-dà Sèsíì de wɛɛ̀-ma wɛmá de pa̰à̰-ma, kṵ́mú ò kó kpíí-pu kú bookú hḭ́ǹka. ³³ Kà Pìdátì é tón é dúú o nahàku mɛhɛká, é yíí Sèsíì óò béka è yɔ̀: Fɔ̰́ń-dà yòǹ Sùwífùpa wódo?

³⁴ Kà Sèsíì óò tɛ̰́ná è yɔ̀: A mɔ́nń-dà mà màhaà è mà nà n békú nkɛ́ɛ̀ tɔɔpà-d'àà cakáà miya̰ n hḭ́ǹka? ³⁵ Kà Pìdátì óò tɛ̰́ná è yɔ̀: N yòǹ Sùwífù-dà-à, mmí-á̰a̰? A bookú kpɛ́ɛpá nà dɔ̀hàka kpɛ̰́m̀ma, d'àà tàà n nɔ̀hi mɛhɛká. A pa̰à̰ m̀mɔ́ya̰-dà?

³⁶ Kà Sèsíì é tɛ̰́ná è yɔ̀: N wóòti pú yòǹ tenkà mɛnkà kú kpɛ́ɛtí. Kà tì de yòǹ tenkà mɛnkà kú kpɛ́ɛtí, è yenì n dehèpa màa-á-ma n kpɛ́mú kà pà pú nà n tàà Sùwífùpa kpɛ̰́m̀ma nɔ̀hi mɛhɛká. Àmá mɛma há̰ dɔ, n wóòti pú yòǹ tenkà mɛnkà kú kpɛ́ɛtí.

³⁷ Ye wɔ̀ni, kà Pìdátì óò béka è yɔ̀: Kà mɛmá-dà, a yòǹ wódo-dà nkɛ́ɛ̀?

K'óò tɛ̰́ná è yɔ̀: A mà yɔ̀ɔ wɛdápu, n yòǹ wódo-dà. Pà n pɛdà kà n kó caka nìpa-dà wɛbeèdi. Ye kú kpɛ́mú-dà tee ká n tɛ̀ni fòùku mɛhɛká. Mɛ̀ǹǹ yòǹ-ko wɛbeèdi yaǹn-dà bekù n wɛmá.

³⁸ Kà Pìdátì óò béka è yɔ̀: Pà toò badà wɛbeèdi?

Pà dènà nùdi dèǹdèni è yɔ̀ pá kɔ̀ù sèsíì

Dentá Màtíyéè 27.15-31; Mádíkì 15.6-20; Dúkì 23.13-25

Pìdátì wɛɛ̀-ma mɛma é yɔ̀ɔ, é tón é yɛ̀dì é taá Sùwífùpa pesá é tɛ̀i é pà caka è yɔ̀: Mmí pú dɛ́hà yetádi nìcɔ̰́nì mɛ̀nì sà-nà-di tí kɔ̀ù dɔɔɔ̀ mɛnǹ. ³⁹ Àmá, nɛ bookú pa̰á̰ma mɛhɛká, yè békú núǹtiyɛ̀ɛ̀ma kúúdi wɛǹni n té nɛ wɛ́í kódekpenáku kùcɔ̰́-dà. Nɛ kpɛ̀i ń nɛ wɛ́í Sùwífùpa wódo?

⁴⁰ Ye wɔ̀ni, kà pá cemá é kpákada è yɔ̀: Ti pú kpɛ̀i á wɛ́í mɛnn. Ti kpɛ̀i á wɛ́í Bàdàbásì-dà.

Ye Bàdàbásì há̰ de yòǹ niìkɔ̀ùdo-dà.