Anyaarubha e kabhere e
Bheetero
Obhukangati
Anyaarubha e kabhere e Bheetero ꞉yaandëkuru no omotomu Bheetero. ꞉Naabhaandëkiire abhakumi bhoose (1:1), anyi mo‑moghya o Ruumi, eriibhagha ighuhe akeere ghoku.
Bheetero ꞉naandëkiri anyaarubha ino kubha abhashaangʼi abhakumi ighoro e meeghi gha bhuröngö gha bhaato nyarebhe. Ameeghi ghaabho ꞉ngaahukiine no obhuhëënë bho Ngʼana Anchömu (2:1–22). Mo‑nyaarubha ino Bheetero nakweghi abhaato kinya bhuno bhaghotora kwanga ameeghi gha bhuröngö. Arabhabhoorera kubha, mbakwëndëru ghughööta ameeghi gha hëënë ghano ghaghughëri abhaato bharimënyë Eryobha no Omoona waache Yesu Kirisito (1:3–11). Ameeghi ghayo gha hëënë ngaare gheeghuru na bhaare bhamorooche Yesu Kirisito na amiisho ghaabho abheene na ghutëghëërëra ghano are areeghi (1:16–18).
Bheetero naghokumereri amangʼana ghano ghakwëndëru mo‑riimanya re Ghekirisito, ni ighoro e bhuhëënë mo‑meremo ghe Ryobha (1:3–11). Nakwanga kwo bhuhaari emeremo na chatëëmö che bhaato bhano ꞉bhaare bharasanchi ameeghi gha bhuröngö.
Antenero, Bheetero nakobhashaangʼi ighoro e bhaato bhano bhakweghi kubha Yesu taaghugharuka mo‑se mara e kabhere (3:1–18). Bheetero naghokumereri kubha, Yesu taamara agharuka gho kubha Eryobha ndeghoghumereri abhaato chwee. Eryobha ndyëndiri kwo bhosiighi ghughanya, kubha abhaato bhaaru bhamokumi na bhabhönë ghotooribhu.