Anyaarubha e kabhere e
Bheetero
Amakëërani
1
Anyaarubha ino neyandëkiri eni Simiyooni Bheetero,
omutamishi no omotomu o Yesu Kirisito.
ˆNekabhaandëkëra inyu bhano mobhwine obhokumi bhuno bho riighori ikoro,
kinya bhuno itu bhoose ꞉toobhwine gho kohetera obhuhëënë bho Ryobha no Omotoori wiito Yesu Kirisito.
2 Eryobha rëbhëëngërëërëri aghareeya no omurëmbë,
gho nchëra e korimënya iryo na Yesu Omutëmi wiito.
Mobherekiiru na kwahoru ne Eryobha
3 Eryobha kohetera mo‑bhotoro bhooche,
ndetoheere amangʼana ghoose ghano tookwënda,
kubha tubhe no obhuhöru,
na tukörë ghano ghakwëndëru ambërë yaache.
Ndetoheere ghayo gho nchëra e korimënya rino atobherekiire gho ghiri e bhokumi obhokoro no obhuhöriicho bhooche eryene.
4 Gho nchëra iyo,
ndetoheere ebhihaano ebhekoro na bhe riighori,
bhino ꞉reeturaghiire.
Ebhihaano bhiyo,
mbeghototoori koru mo‑bhobhe bho ghusari abhaato bhuno bhoonyi mo‑se,
gho ghiri e miighombo amabhe.
Wiiki mbeghototoori tubhe no obhughöötani bho simoka e Ryobha.
5 Gho ghayo,
mubhe moriiköngʼi kubha obhokumi bhoonyu bhwëngëru obhuchömu,
no obhuchömu bhuyo bhwëngëru obhumënyi.
6 Wiiki obhumënyi bhuyo bhwëngëru ghwikangata,
na ghwikangata kuyo kwëngëru obhoghumereri,
no obhoghumereri bhuyo bhwëngëru ghuköra ghano ghakwëndëru ambërë e Ryobha.
7 Na ghuköra hangʼu,
kwëngërëërëru ghosiighana gho kehiiri,
na ghosiighana gho kehiiri kuyo kwëngërëërëru no obhosiighi kwo bhoose.
8 Aribha chatëëmö chiyo cheriyëngëra ghokoonyu,
nchekobhaköra momumënyë Omutëmi wiito Yesu Kirisito,
kubha motabha kinya emete ghino ghetaaghusönga amakorobhese.
9 Amare omooto uno ataanyi na chatëëmö chiyo,
iwe n‑kinya omohuku,
taakorighi bhoheene,
gho kubha neebhuru kubha Eryobha niryo ꞉reemomusiri amasari ghaache gha kare.
10 Mbe,
abhahiiri bhaane,
mwiköngʼi chwee kwërëki kubha Eryobha ndebhabherekiire na kobhaahura.
Aribha eriimanya reenyu hangʼu reenyi,
motaakobhora naabha.
11 Gho ghuköra hangʼu,
moghughënëhu bhoheene mo‑bhutëmi bho miishe ghyose bho Mutëmi no Omotoori wiito Yesu Kirisito.
12 Gho ghayo,
nekwëndërëra kobhahiiti amangʼana ghayo kimu,
nangabha mumariri ghoghamënya na muköngʼiiri mo‑bhuhëënë bhuno mweghiri.
13 Nerooche kubha,
n‑kumangi nibhe nerabhahiiti ighoro e amangʼana ghayo,
eriibhagha ryose rino nekumanya mo‑se.
14 Neghosiikëra hangʼu gho kubha Omutëmi wiito Yesu Kirisito ꞉naahunyuriire kubha neekoru hano mo‑se,
na neeni nerighi kubha eriibhagha riyo ˆreghatingʼi.
15 Kiyo nikyo gheghughëri neghwiköngʼi kobhabhoorera ghayo,
kubha eriibhagha neekubha nekuure mubhe morahiita amangʼana ghaane ghayo.
Abhiibhateri bha bhokumi bho Kirisito
16 Eriibhagha toore toreeghi kinya bhuno akuucha kwo bhotoro bhooche,
Omutëmi wiito Yesu Kirisito,
totiitëngʼiire amaghano gha kare ghano ghaandëkuru kwo bhongʼiiningʼiini.
Amare ꞉ntoobhorooche obhokumi bhooche obhokoro kwo miisho ghiito itu abheene.
17 Itu ntoore‑ho eriibhagha ahaabhuru asooko no obhokumi obhokoro koru o‑Taata Waryobha.
Eriibhagha riyo,
eriiraka rekaru kwo Waryobha uno anyi Obhokumi Obhokoro,
rerabhugha,
“Uno n‑Omoona waane omosiighani,
uno neghuchömëru nawe.”
18 Wiiki itu abheene ntooghwire eriiraka riyo koru Mwishaaro,
hano toore haghirohamu na Yesu ighoro e gheghoro kiire eghitööbhiyu.a
19 Wiiki amangʼana gha bharööti,
ngakuhëënëhi ghokwito angʼana iyo,
inyu moghuköra bhoheene aribha moraghaghööta.
Amangʼana ghayo n‑kinya oromore runo rokurëngaari mo‑kengʼuuri,
mbagha eriibhagha re moomake,
na anchöta e tabhoori ino ekobharemokera mo‑metema gheenyu.
20 Amare,
ghokera ghayo,
mohiite kubha bhotaanyi‑ho obhurööti bho Mandëkö Amatööbhiyu bhuno abharööti ꞉bhaasiikëriire kurëngʼaana na amiihëëbhö ghaabho abheene.
21 Nekobhugha hangʼu gho kubha,
ghataanyi‑ho amangʼana gha bhurööti ghano ghakorwera mo‑miigha gha mooto.
Amare abhaato ꞉mbaaruusiri obhurööti koru kwo Waryobha bharakangatu na Akörö Ahörëëru.