Abheeghi bha bhuröngö
2
Amare mo‑riibhagha re bharööti,
꞉mbaarweriire abharööti bha bhuröngö ghate e Abhiisiraeri,
kinya bhuno abheeghi bha bhuröngö bhaakubha ghate yaanyu.
Abhaato bhayo mbaghusöhi kwo bhobhe ameeghi gha korumeeri abhaato,
na mbakomwanga Omutëmi Yesu,
uno abhatingwiri.
Gho ghuköra hangʼu mbakwirëëtëra ghosireekerera koobho abheene kwo bhwango.
2 Wiiki abhaato bhaaru mbaghutambana amangʼana ghaabho gha chaasoni.
Gho ghiri yaabho,
anchëra e bhuhëënë neghotoku.
3 Kwo miigha ghaabho amabhe gha kubhöna obhwëra koru ghokoonyu,
mbaakubha bharabhabhoorera amaghano gha bhuröngö.
Amare korwera kare,
Eryobha ndiisëëmiri kobhatenera ekiina na retaamara ryebhu kobhasireekereri!
4 Hano bhamarayika bhaköriri amasari,
Eryobha retabharoochiire changori,
amare ꞉ndeebharëkiire nyaari,
a hano bhabhöhuru ne eminyörörö.
Iyo mo‑kengʼuuri ke nyaari mbaghughanya orosiko ruure ro ghoteneru ekiina.
5 Wiiki Eryobha retabharoochiire changori abhaato bha kare bhano bhataresookiri,
꞉ndiirëëtiri ghwichoreru kwo manche mo‑se,
abhaato bhaaghaku.
Amare rekamotoori Nuhu uno araghiini amangʼana gha bhuhëënë,
haghirohamu na abhaato abhande mohungate.b
6 Wiiki Eryobha ꞉ndeesirekeriiri emeghya ghe Sotoma na Ghomora kwo mororo,
na abhaato bhano ꞉bhaare‑mu.
Reghaköra bhabhe eghetuubhaani mo‑bhaato bhano bhataakoresooka.
7 Amare,
Eryobha rekamotoori Rooti,
omooto omuhëënë,
uno omukörö waache okuure gho chatëëmö cheebho chambe che chaasoni.c
8 Omooto uyo omuhëënë naare amanyiri ghate yaabho gho chaasiko chaaru,
koru omukörö waache ꞉nookuure gho kooghu na korighi amabhe ghaabho.
9 Gho ghayo,
Omutëmi Waryobha neeche kinya akobhatoori mo‑masaki abhaato bhano bhakomosooka.
Wiiki neeche kebhuno akobharööna abhaköri bha masari mo‑rosiko ruure ro kobhatenera ekiina,
10 ahanene mo‑bhano bhaghutambana amiigha amabhe gha mobhere na ghutaraaha obhotoro bho Ryobha.
Abhaato bhayo mbaanyi na atëëmö e rihakaana no obhwihachi,
koru bhataaghotiina ghotoka bhamarayika.
11 Nangabha bhamarayika bhaghëndi bhaabho bhaanyi na changuru no obhotoro bhwaru,
amare bhataakobhasëma na kobhatoka bhayo ambërë e Mutëmi Waryobha.
12 Amare abhaato bhayo mbaghotoka kino bhateeche.
Mbatuubhiine na chatyenyi chino chetaanyi no obhumënyi na chino cheghukangatu na amiigha gha mebhere.
Nchekwibhoru,
kubha chighöötu na ghosinchu!
Hangʼu nibhu bhaghosireekerera,
abheeghi bhayo bha bhuröngö.
13 Wiiki mbakorehu anyaako kinya ino bhabhaköriire abhaato abhande.
Mbahaachömëru ghwighomba ghuköra amangʼana ghaabho amabhe haheero.
Koru hano bhakuraaghëra haghirohamu na niinyu,
mbahaachömëru kobhangʼiina.d
14 Amiisho ghaabho ngiichwire obhutaari no obhwighombi bhoobho bho ghuköra amasari bhotaanyi na antenero.
Mbaghotebhitebhi abhaato bhano bhataamara bhaköngʼëri mo‑bhokumi kwo mangʼana bhaghöötë amaköri ghaabho amabhe.
Emetema gheebho nginariri ghwighomba obhwame.
Abhaato bhayo mbiihiimuru!
15 Mbatighiri anchëra angöröröku,
mbabhoriri na ghutambana anchëra e Bharaamu,
mwërëëti o Bhewoori.
Iwe ꞉naasiighiri ghosongʼaana amareho gho nchëra e ghuköra amabhe.
16 Kurëngʼaana na atëëmö iyo,
atikere ekamoshaangʼi Bharaamu.
Atikere n‑atyenyi amare ꞉neesiikiire kwo riiraka re mooto kubha emurëki omurööti uyo,
atighe ghuköra amangʼana gha kiraghaanu.e
17 Abhaato bhayo n‑kinya ebhesima bhino bhyomiri,
n‑kinya amashaaro ghano ghakohiru no obhukama.
Ahaghiro hano haanyi ne ekengʼuuri ghe kuruu hatindekuru gho ghiri yaabho.
18 Mbaghosiikëra amangʼana gha bhwihachi na ghano ghataanyi ne ekebhune,
na gho ghutambana amiigha ghaabho amabhe gha mobhere mbahaatëgha abhaato bhano bhakumiri kwo riibhagha ighuhe,
na ghutaana na abhaato bhano bhikareriire obhobhiihi.
19 Ibho mbakuragha abhaato kubha mbakubhöna obhohuuru,
amare abheene nibho abhasësë bha bhobhe bhuno bhokobhasari.
Nehaabha hangʼu gho kubha omooto woose nahaabha omusësë o ghyokyose kino kemokindiri.
20 Abhaato bhano bhamariri kungʼösa obhoghonchu bho se ino,
bhakamënya bhoheene Omutëmi no Omotoori wiito Yesu Kirisito,
bharaghöötu wiiki na ghokindu no obhoghonchu,
antenero e riimanya reebho ndeekubha ibhe chwee ghokera e rimbërë.
21 Nengabheere ngʼoni ghokoobho aribha bhatangamënyiri inkongʼorimu emeghiro ghino ghekwërëkërëri kino Eryobha rekwënda,
ghokera bhaghimënyë,
bharamara bhaghetighe emeghiro emitööbhiyu ghino bhahaabhuru.
22 Nkeenyi‑ho ekirëngi ke hëënë kino ghekobhugha kubha,
“Aseese nehaagharukera amaroki ghaache ayeene,”
f wiiki nkeenyi‑ho ekende kino ghekobhugha kubha,
“Ambeechi ino bhayishaabhiri,
nehaagharukera ghwigharaghara wiiki mo‑matoto.”
Hangʼu nibhu ekubha ghokoobho.