Ghugharuka kwo Mutëmi
3
Abhasiighani bhaane,
anyaarubha ino n‑e kabhere ino ˆnekabhaandëkëra.
Mo‑chanyaarubha choose ibhere ꞉niiköngʼiri kobhooki amiihëëbhö ghaanyu amachömu,
gho nchëra e kobhahiiti.
2 Nekwënda mohiite amangʼana ghano ꞉ghaaghamburu kare na abharööti abhatööbhiyu,
no omoghiro o Mutëmi no Omotoori uno abhatomu bhaache ꞉bhaabharëëtiire.
3 Nekwëndëru singa mumënyë kubha,
chaasiko che ntenero mbakorwera abhaato abhachebhori,
bhano bhaghutambana amiighombo ghaabho amabhe.
Mbakobhachebhora
4 bharabhugha kubha,
“Kirisito ꞉naaraghiri kubha naghugharuka!
Ibheere hayi anyi?
Korwera bhasookoro bhiito bhaku,
amangʼana m‑bhuure bhuure ghaanyi kinya bhuno ꞉ghaare korwera simoka e se!”
5 Abhaato bhayo,
mbaghwiköri kinya ꞉mbeebhuru kubha hayo kare Eryobha ꞉ndeebhughiri angʼana ayeene,
erishaaro na ase bheghatëëmu.
Reghatëëma ase koru mo‑manche na gho nchëra e manche.
6 Kwo manche ghayo ase e riibhagha riire ꞉neesirekeriiru.
7 Wiiki kwo ngʼana iyo iyo Eryobha ꞉ndeetindekiri erishaaro na ase ino,
bhiiche bhyekibhu no omororo.
꞉Ndeebhetooriri gho ghiri e rosiko ruure abhaato bhano bhataakoresooka Eryobha bhaghoteneru ekiina na ghosireekereru.
8 Amare,
abhasiighani bhaane,
moteebhu angʼana ino kubha,
kwo Mutëmi Waryobha,
orosiko rumu n‑kinya emeeka egheku kimu,
ne emeeka egheku kimu ghokooche n‑kinya orosiko rumu.a
9 Abhaato abhande mbaghwituuri kubha Omutëmi Waryobha naghukëëchëra kohikeerani ghaare ꞉araghiri,
amare taaghukëëchëra.
Amare iwe naghwiköngʼëërëri gho ghiri yaanyu,
gho kubha taakwënda kubha,
omooto koru umu ache abhore.
Kino akwënda n‑kubha bhoose bhatuukuunere amasari ghaabho.
10 Orosiko ro Mutëmi ndokuucha kinya omwibhi.
Orosiko ruyo,
eriighoro ndeghusënu gho kerighito ghekoro,
ebheghiro bhino bheenyi‑mu mbeghosireekereru kwo mororo,
na ase yoose neghosireekerera haghirohamu ne ebheghiro bhyose bhino bheenyi‑mu.
11 Mbe,
gho kubha ebheghiro bhyose mbeghosireekereru gho nchëra iyo,
inyu mokwëndëru kumanya imanya ke mo‑se ino?
Mokwëndëru kumanya eriimanya eritööbhiyu na re koresooka Eryobha.
12 Mubhe moraghanya orosiko ruure ro Ryobha na koruköra ruuche bhwango.
Gho ghiri e rosiko ruyo,
eriighoro ndeghweku kwo mororo na ghosireekerera,
ne ebheghiro bhino bheenyi‑mu mbekuyaaya kwo bhotuuku bhuhaari chwee.
13 Amare itu ntoghughanya erishaaro eriihë na ase ahë kinya bhuno ꞉reeturaghiri,
ahaghiro hano hiichwire obhuhëënë.
14 Gho ghayo abhasiighani bhaane,
eriibhagha moghughanya orosiko ruure,
mukörë ghwiköngʼi araacha kuucha abhönë moonyi no omukörö mwero motaanyi ne eriisari ambërë e Ryobha,
na mubhe no omurëmbë.
15 Mumënyë kubha Omutëmi nakobhaghumereri kubha mubhönë omweya o ghotooribhu.
Hangʼu nibhu omohiiri wiito Bhawuro omosiighani ꞉abhaandëkiire gho kuhökëri mangʼiini ghano Eryobha ꞉reemoheere.
16 Mo‑chanyaarubha cheeche choose naghosiikërëra amangʼana ghayo.
Ngaanyi‑ho amangʼana aghande ghano ghaanyi maköngʼu ghoghamënya mo‑chanyaarubha cheeche chiyo.
Amangʼana ghayo,
abhaato bhano bhataanyi no obhumënyi na bhano bhataamara bhaköngʼëri mo‑bhokumi,
mbahaaghasari,
kinya bhuno bhahaasari Amandëkö Amatööbhiyu aghande.
Gho nchëra iyo mbakwirëëtëra ghosireekerera koobho abheene.
Amangʼana gha kuragha
17 Mbe,
inyu abhasiighani bhaane,
mumariri kumënya amangʼana gha bheeghi bhayo abharöngö.
Ibheere mwikabhaahe kubha motangʼiinu na amasari gha bhaato bhayo abhiigharori,
na bhabharumeeri na ghotigha omurëmbë o bhokumi bhoonyu.
18 Amare mwëndërërë ghokora mo‑ghareeya na gho komumënya Omutëmi no Omotoori wiito Yesu Kirisito.
Aghongibhu,
ibheere ne emiishe ghyose!
Hawubhaabha.