Anyaarubha e Bhawuro kwo
Bhiremooni
Obhukangati
Anyaarubha ino ꞉yaandëkuru no omotomu Bhawuro kwo mooto uno are arabherekeru Bhiremooni. Nekorighibhu kubha Bhiremooni naare ariikara mo‑moghya o Korosaayi (Abhakorosaayi 4:9). Naare na abhasësë wiiki m‑mwame are. M‑Mokirisito are, na mo‑nyumba yaache nimu ꞉bhaare bhariikomana Abhakirisito (2). Bhawuro na Bhiremooni mbaare bheechiine bhoheene.
Bhawuro ꞉naandëkiri anyaarubha ino hano are mwighërëcha (13) iyo mo‑moghya o Ruumi, omooka o 62 korwera hano Yesu Kirisito ibhoriiru. ꞉Naandëkiri anyaarubha ino gho ghiri e musësë umu o Bhiremooni, uno are arabherekeru Oneesimo. Nekorighibhu kubha omusësë uyo ꞉naangʼösiri koru o‑Bhiremooni. Akamara akarighani na Bhawuro. Niho Bhawuro akamuraghaneri Angʼana Anchömu e Yesu Kirisito, Oneesimo aghatooribhu (10).
Mo‑chaasiko chiyo, omusësë wowoose arangʼösa koru mo‑mwame waache, araghöötu, naare kuröönu chwee. Ibheere Bhawuro akamotoma Oneesimo o‑Bhiremooni, haghirohamu na anyaarubha ino Bhawuro ꞉amwandëkiire Bhiremooni. Mo‑nyaarubha iyo Bhawuro ꞉naamusabhiri Bhiremooni amwishereri Oneesimo kinya omughëndi waache, wiiki kinya omohiiri gho Kirisito (16).