Ghuköra amachömu
3
Ubhe orabhahiiti abhaato kubha,
bhabhasooke na kobhoghwera abhakangati na bhano bhaanyi no obhotoro.
Bhabhe bhiisëëmiri ghuköra angʼana yoyoose anchömu.
2 Obhabhoorere bhatatoka omooto wowoose,
na bhatabha bharareghesa,
bhabhe bhahörëëru,
na bhabhe bhanyööhu kwo mooto woose.
3 Koru itu bheene eriibhagha riire toore tokeere komokumi Yesu,
ntoore bharaghaanu,
na abhiigharori,
wiiki ntongʼiinuru chwee.
Ntoore abhasësë bha miigha amabhe gha manga maaru gha se ino.
Eriimanya riito ndeere re bhobhe ne eriihari.
Abhaato mbaare bhaturëghiri,
na niitu ntoore tobharëghiri.
4 Niho Eryobha,
Omotoori wiito,
reghatwërëki obhuhöriicho no obhosiighi bhooche,
reghatotoori.
5 Retaaköriri hangʼu gho kubha amaköri ghiito ango n‑gha hëënë ꞉ghaare,
amare n‑gho changori cheeche okwene.
Ndetomusiri obhobhe bhwito,
kuyo niko okwibhoru okuhë.
Wiiki ndetoheere eriimanya eriihë gho nchëra e Körö Ahörëëru.
6 Eryobha ndetwiteriire kwo bhwaru Akörö Ahörëëru koheta ekirëngërë,
gho nchëra e Yesu Kirisito Omotoori wiito.
7 ꞉Ndiiköriri hangʼu,
na ghotubhara kubha m‑bha bhuhëënë gho nchëra e ghareeya yaache,
kubha tubhönë ghughabha obhuhöru bho miishe ghyose,
kebhuno toghwitëngʼëra.
8 Angʼana iyo n‑e hëënë.
Nekwënda iye oyihënërërë,
kubha bhoose bhano bhakorekumi Eryobha,
bhaghaghöötë na ghwiköngʼi ghuköra amachömu.
Amangʼana ghayo m‑machömu,
wiiki ngaanyi no obhwëra mo‑bhaato bhoose.
9 Amare,
wisache ne erihakaana re ghighëëghë,
na kwarura amariina na amangʼana gha bhasookoro,
na koreghesa ne erihakaana ighoro e meghiro ghe Musa.
Ghayo ghoose ghataanyi no obhwëra bhobhoose.
10 Omooto uno aghutamani abhaato,
omutöngërë o rumbërë na ro kabhere.
Aribha akaanga kooghu,
otighane nawe kimu.
11 Weeche kubha omooto kinya uyo natighiri obhuhëënë,
n‑omooto o masari,
niiteniire ekiina omwene.
Amangʼana gha kuragha
12 Nerooche neghi ghwikara iyo mo‑moghya o Nikabhoori,
eriibhagha re nyighita.
Amare nekomotoma Aritema hamu Tikiko awaacho.
Umu ghate yaabho hano akohika iyo,
iye ubhëndë kuucha Nikabhoori torighani.
13 Wiköngʼi ghotoori omumënyi wuure o meghiro uno akobherekeru Seena,
na Abhooro.
Obhahë bhyose bhino bhekwëndëru kobhatoori mo‑nchëra,
bhatasuuheru na gheghiro.
14 Abhakumi bhaghëndi bhiito nabho,
bheeghe ghuköra amachömu,
kubha bhabhatoori bhano bhaanyi na amënda gha hëënë.
Bharaköra hangʼu,
eriimanya reebho ndeekubha no obhwëra.
15 Abhaato bhoose bhano bhaanyi haghirohamu na neeni,
mbaghoghukëëri.
Ibheere iye woose,
obhakëëri abhakumi bhoose abhasiighani.
Nëköbhëëndëra aghareeya e Ryobha ibhe haghirohamu na niinyu bhoose.