Ameeghi gha bhuhëënë
2
Amare iye Tiito,
ubhe oreeghi abhaato kurëngʼaana na ameeghi gha bhuhëënë.
2 Obhabhoorere abhagharuka bha ghesubhe,
bhabhe ne ekirëngërë,
na asooko,
na amangʼiini,
bhabhe abhahëënë mo‑bhokumi,
na mo‑bhosiighi na mo‑bhoghumereri.
3 Bhuure bhuure abhaghiikoro abhakungu,
obhabhoorere kubha bhabhe no orughëndö runo rokoreghongi Eryobha.
Bhatabha abhitaamereri bha bhaato,
na bhanyo bha maro,
amare mbakwëndëru kweghi amangʼana amachömu.
4 Gho ghuköra hangʼu,
bhabhe bhareeghi abhasubhaati kubha bhabhasiighe abhasubhe bhaabho na abhaana bhaabho.
5 Wiiki,
bhabhe ne ekirëngërë,
na bhaghöröröku,
bhakörë bhoheene emeremo mo‑chanyumba cheebho,
na bhabhe abhaato abhahöriicho,
na bhano bhaghosooka abhasubhe bhaabho.
Obhabhoorere bhakörë hangʼu,
kubha Angʼana e Ryobha etataraahu.
6 Koru abhabhureni,
obhatöngërë bhabhe ne ekirëngërë.
7 Iye woose,
mo‑mangʼana ghaacho ghoose,
ubhe eghetuubhaani ghe kweghu gho ghuköra amachömu.
Mo‑meeghi ghaacho,
wërëki asooko no obhuhëënë.
8 Ameeghi ghaacho ghabhe gha mahëënë ghano ghataanyi ni isörö mo‑bhaato.
Hayo erabha anyi‑ho omooto uno akwënda ghoghaanga,
naghosookibhu,
gho kubha taakubha na angʼana imbe e ghughamba ighoro yiito.
9 Wiiki abhasësë,
obhabhoorere kubha bhasooke abhantomonkoro bhaabho,
bhabhategheri mo‑mangʼana ghoose,
bhatashangʼaana nabho.
10 Wiiki bhatabha abhiibhi,
amare bhabhe abhahëënë inkongʼorimu,
kubha emeremo gheebho ghyose,
ghighëri abhande bharutu na ameeghi gha Waryobha Omotoori wiito.
11 Ubhe oreeghi amangʼana ghayo ghoose,
gho kubha Eryobha ndyërëkiri aghareeya yaache,
gho kurëëta obhotoori mo‑bhaato bhoose.
12 Aghareeya iyo,
neghotweghi kwanga amabhe na amiigha gha mo‑se.
Gho ghayo,
eriibhagha tokeere mo‑se ino,
tubhe ne ekirëngërë,
na abhahëënë,
na tubhe abhaato bhano bhamanyiri eriimanya rino Eryobha rekwënda.
13 Tughöötë amangʼana ghano,
toraghanya na ghwitëngʼëra orosiko ruure oruchömu ro ghugharuka kwo Kirisito Yesu.
Orosiko ruyo nakorighibhu mo‑bhokumi bhooche obhokoro.
Iwe niwe Eryobha riito Eriikoro no Omotoori wiito.
14 ꞉Niiruusiri gho ghiri yiito,
kubha atotoori koru mo‑mabhe ghoose.
꞉Nëëndiri ghotomusa,
kubha hëënë tubhe abhaato bhaache,
bhano bhiiruusiri ghuköra amachömu.
15 Mbe,
ubhe oreeghi amangʼana ghayo ghoose.
Wishereriiru kobhaköngʼi na kobhatöngëra abhaato kwo bhotoro bhoose.
Gho ghayo,
omooto wowoose ataghutaraaha.