Tiito 1

Anyaarubha e Bhawuro gho

Tiito

Amakëërani

Anyaarubha ino neyandëkiri eni Bhawuro, omutamishi o Ryobha, no o Yesu Kirisito. Eni netomuru gho ghiri e kwërëkërëri abhaato bhano bhaahwiru ne Eryobha, kubha bhatore komokumi na kumënya obhuhëënë ighoro e Yesu . Obhuhëënë bhuyo mbokobhakangata ghuköra ghano ghakwëndëru ambërë e Ryobha, 2 na mbokobhaha amiitëngʼërö gha bhuhöru bho miishe ghyose. Eryobha ꞉ndiiraghiri obhuhöru bhuyo, koru rekeere ghutëëma ase, na retaaghosiikëra obhuröngö. 3 Ibheere, n‑eriibhagha rino Eryobha ryëndiri kwërëki haheero Angʼana yaache Anchömu. Eryobha Omotoori wiito ꞉ndiihatëkiri kuuha omoremo o koyiraghani angʼana iyo. 4 ˆNeghakwandëkëra iye Tiito, omoona waane o muhëënë mo‑bhokumi bhuno tusangiri haghirohamu.

Neghokwëndëra aghareeya no omurëmbë koru kwo Waryobha Taata na gho Kirisito Yesu Omotoori wiito, ghibhe haghirohamu na niiye.

Emeremo ghe Tiito mo‑gheghinga ghe Kireete

5 Hano neruure mo‑gheghinga ke nyancha iyo Kireete, ꞉neeghotighiri iye kubha otoore bhoheene amangʼana ghano ghasaaghiri, haghirohamu na kwahura abhagharuka bha riikanisa mo‑meghya ghyose, kinya neere nekwërëkëriiri.

6 Omugharuka o riikanisa, nakwëndëru abhe omooto uno ataanyi ni isörö ryoryose. Abhe omosubhe o mukari umu hangʼu, na abhaana bhaache bhabhe abhakumi, bhatabha abhatiriighanu hamu bhano bhataanyi na asooko. 7 Ibheere , nakwëndëru abhe omooto uno ataanyi ni isörö, gho kubha nahaabhuru emeremo ghe Ryobha. Atabha omooto uno anyi no omutu muköngʼu, na atabha mwango o ghukarara, na atabha omurëëbhi, na atabha omurööni, wiiki atiighomba kwibhönëra chambiiri gho nchëra ambe. 8 Nakwëndëru abhe omooto uno asiighiri ghughënëhi abhaato, na abhe omooto uno asiighiri amachömu, na uno anyi ne ekirëngërë, no omuhëënë, na mutööbhiyu, na uno aghotora ghwikangata. 9 Abhe araghööta bhoheene angʼana e bhuhëënë ighoro e Yesu Kirisito, kinya eghuru. Hayo niho aghotora ghuköngʼi abhaato mo‑meeghi gha bhuhëënë, na ghokinda bhano bhakwanga ameeghi ghayo.

10 ˆNeghakobhoorera hangʼu, gho kubha hayo Kireete mbaanyi‑ho abhaato bhaaru bhano bhataanyi na asooko, mbaghosiikëra amangʼana ghano ghataanyi no obhwëra, wiiki m‑bhabhiihi, abhamu m‑bhano bhahënëriire emeghiro ghe Kiyahuuti. Abhaato bhayo otabhiisherereri kweghi, 11 gho kubha mbakorumeeri abhaato mo‑chanyumba chaaru. Mbakweghi amangʼana ghano ghatanchekiine, mbaghutabhara kwibhönëra chambiiri gho nchëra ambe. 12 Naare‑ho omurööti umu, Omokireete o bhowaabho abheene, uno abhughiri, “Abhakireete m‑bharöngö chaasiko choose, n‑kinya chatyenyi ingira, na m‑bhahobhaaru na m‑bhatöbhu!” 13 Amangʼana ghayo n‑gha mahëënë. Gho ghayo, ubhe orabhashaangʼi chwee abhaato bhayo, kubha bhaghöötë ameeghi gha bhuhëënë. 14 Bhatighe ghutëghëërëra amaghano gha Kiyahuuti ghano ghataanyi no obhwëra, na amëërëkërëri gha bhaato bhano bhatighiri obhuhëënë.

15 Abhaato bhayo mbakweghi kubha, mbeenyi‑ho ebheghiro bheghonchu. Amare eni nebhugha kubha, mo‑bhaato bhano bhaanyi na akörö yeero ambërë e Ryobha, ebheghiro bhyose mbemusuru. Abhaato abhaghonchu na bhano bhataanyi abhakumi, ebheghiro bhyose m‑bheghonchu, gho kubha amiihëëbhö ghaabho na amënda ghaabho, ngiichwire obhoghonchu. 16 Abheene mbakobhugha kubha mbeeche Eryobha, amare amaköri ghaabho ngakwërëki kubha, mbakoryanga. Bhayo mbaghukarari, na m‑bhiigharori, na bhataakurëngʼaanera kwo ngʼana yoyoose anchömu.