Anyaarubha e Bhawuro kwo
Bhiremooni
Amakëërani
1
Eni Bhawuro,
omubhöhu gho ghiri e kuraghani Angʼana Anchömu ighoro e Kirisito Yesu,
ˆneghakwandëkëra iye Bhiremooni.
Eni haghirohamu no omohiiri wiito Timotewo,
ntoghoghukëëri iye omosiighani wiito,
uno onyi omutamishi mughëndi wiito.
2 Ntokomukëëri no omosubhaati wiito Abhiya no omurööni o riihë mughëndi wiito Arikibho,
haghirohamu na abhakumi bhano bhaghwikomana mo‑nyumba yaacho.
3 Ntököbhëëndëra aghareeya no omurëmbë koru kwo Waryobha Taata wiito,
na kwo Mutëmi wiito Yesu Kirisito,
ghibhe haghirohamu na niinyu.
Obhosiighi no obhokumi bho Bhiremooni
4 Hano neghoghusabhera eriibhagha ryose,
nekoriitabheri Eryobha,
5 gho kubha nekooghu kubha nokwëndërëra komokumi Omutëmi Yesu na kobhasiigha abhatööbhiyu bhoose.
6 Ibheere,
neghusabha Eryobha kubha,
obhokumi bhuno usangiri haghirohamu na niitu,
bhoghotoori otore kumënya amachömu ghoose ghano tokwëndëru ghuköra gho ghiri e Kirisito.a
7 Mohiiri waane,
obhosiighi bhoocho mboheere ghuchömëru kwaru na ghunköngʼi chwee,
gho kubha emetema ghe bhatööbhiyu ngisambaarokuru chwee gho ghiri yaacho.
Bhawuro ˆakamusabha Bhiremooni amwabhërë Oneesimo
8 Gho ghayo,
nangabha neenyi no obhotoro koru gho Kirisito bho ghokuhatëka kino okwëndëru ghuköra,
nteeghuköra hangʼu.
9 Amare,
gho ghiri e bhosiighi nerooche m‑bhoheene konga neghusabhe,
eni Bhawuro uno neenyi omugharuka,
no omubhöhu gho ghiri e Kirisito Yesu.
10 Neenyi ne eriisabhi rimu ghokoocho ighoro e Oneesimo.
Iwe n‑kinya omoona waane,
na neeni n‑kinya ishe,
gho kubha nemotooriri komokumi Yesu Kirisito eriibhagha neenyi mwighërëcha.
11 Ekimbërë iwe taare arakurëngʼaanera,
amare ibheere naghokurëngʼaanera iye na neeni woose.b
12 Ibheere ˆnekamugharoki ghokoocho,
iwe nemosiighiri kwo mukörö waane woose.
13 Wiiki,
nengasiighiri ikare na neeni,
kubha abhönë omweya o ghunsakeri imeerere mo‑mweya waacho,
eriibhagha neenyi mo‑riighërëcha gho ghiri e Ngʼana Anchömu.
14 Amare ibheere nerooche teenyi bhoheene ghuköra ghyokyose ntaamara mböna amitëghëërërö ghaacho.
Nteekwënda ghokuhatëka kubha ontoori,
amare obhuhöriicho bhoocho obhukörë gho kwënda koocho iye mwene.
15 Hamwabhe,
Oneesimo ꞉naaruure awaacho kwo riibhagha isuuhu,
kubha oramara ubhe nawe emiishe ghyose.
16 Korwera ibheere,
iwe taanyi kinya omusësë ghokoocho,
amare iwe n‑ngʼoni ghokera omusësë.
Iwe n‑kinya omohiiri omosiighani.
Eni nemosiighiri chwee,
iye nokomosiigha ghokera eni,
kinya omusësë o mo‑nyumba yaacho,
wiiki kinya omohiiri kwo Mutëmi Yesu.
17 Ibheere mbe,
aribha onyeche eni kubha neenyi no obhughöötani na niiye,
omwishereri uyo kinya bhuure onganyiisheriiri eni omwene.
18 Aribha Oneesimo aghutasiiri angʼana yoyoose yiire,
hamu nokwënda akorehe egheghiro,
ondehi eni.
19 Eni Bhawuro,
nyandëkiri gho kubhökö koone eni mwene,
neghokoreha.
Haghirohamu na ghayo nteekwënda ghokohiiti kubha,
noonyi na asiire yaane,
gho kubha eni nekuraghaniiri Angʼana Anchömu,
iye oghatooribhu.
20 Ibheere,
mohiiri waane,
unkörërë rino gho ghiri e Mutëmi.
Uchömi omotema waane kinya omohiiri gho Kirisito angaköriri.
21 Nekwandëka ghano,
gho kubha nyeeche kubha noghoghiishereri,
wiiki noghuköra ghokera ghano nisabhiri.
22 Haghirohamu na ghayo,
unsëëmërë ha kohikera,
gho kubha neghwitëngʼëra kubha kwo masabhi ghaanyu,
Eryobha ndeghontoori niiche bhowaanyu.
Amangʼana gha kuragha