Jon nə à dʋŋa jɩɩn wa
59
1 Gwàgá yáá tíú gwaran. «Dàn ká cʋ̀gʋ̀!» Davidə gwaran. Kʋ yɩ máŋá tə wa Sayulə nə pɩn ba cɩ̀ Davidə dìə̀ tə nə, sə ba gʋ wá.
2 À tíú Yɩɩ, jon nə à dʋŋa tə jɩɩn wa,
cɩ̀ à nə də lɩ̀à tə ba nə zɩga à nə!
3 Jon nə lɩ̀à tə jɩɩn wa,
ba nə tʋŋa kʋ̀nkʋ̀n yìə̀n,
jon nə lagʋra tə jɩɩn wa.
4 Cɩ́gá, nə̀ń ba nə ba nan ba cɩ̀ cwəŋə wa, sə ba lɩ à mɩɩ.
Ba-Yígúrə́-Jə-Tiu, ladɩra ken nimarʋ ba zɩga à nə,
yá à tà lagʋrʋ, à ga wà cʋna də tʋn.
5 À wà yolwan tʋn, yá ba dəri ba bɩ̀àn, ba ga tanɩ ba tɩ̀àn sə ta nə.
Zàn dwiən nə, n bà jəri nə, sə n ga ywàń n jə́n!
6 N mʋ̀ Ba-Yígúrə́-Jə-Tiu n nə yɩ kwatara Yɩɩ,
n nə yɩ Yɩzərayɛlə lɩ̀à Yɩɩ,
zàn yɩɩ nə n kə dwíə́ nəkaran* tə mama càn wa!
Dàn ká fwa pubwanʋ pwìí bələ tɩ̀án təntə nədʋ tətə yɩra,
ba nə tʋŋa kʋ̀nkʋ̀n yìə̀n. Zɩgɩ sìí bwálɩ́.
7 Ba yàá pìí ba bà didəni nə,
ba ŋwɩ̀nɩ̀ ndə kukuri nə,
ba ga kɩkarɩ tɩʋ tə.
8 Cɩ́gá, ba níə́ súə́ də wulʋŋʋ sʋ̀ràn,
ba nii sʋ̀ràn goŋi lɩ̀à ndə kwatara sɩ̀án nə.
Ba yàá swɩ̀n, ba wʋ́:
«Wàà nə nə̀ń?»
9 Yá n mʋ̀ Ba-Yígúrə́-Jə-Tiu yɩ n mʋŋa ba,
N yɩ n mʋŋa ba mʋ̀ dwíə́ nəkaran tə mama.
10 N mʋ̀ nə yɩ à dɩ̀àn, n mʋ̀ con nə à ywàŋá.
Cɩ́gá, Yɩɩ nə yɩ à dɩ̀àn dəkuu bwálɩ́.
11 À tíú Yɩɩ tə nə yɩ wʋywanyiən bɩ̀àn, sə ʋ jəri nə,
ʋ wá pa à na dʋŋa tə ba nə mɩlɩ nə.
12 Dàn ká gʋ ba, sə à lʋʋ lɩ̀à tə swɛ̀ɛ́ ba yoo,
vuvugu ba də n dɩ̀àn tə n pa ba tʋ,
Yuu-Tiu, n yɩ nə natana!
13 Ba nii sʋ̀ràn yɩ cʋna.
Pa ba fwìə́ tə jì yobɩbɩlʋ kʋ ja ba,
ba nə zɩrɩ ba kəni lɩ̀à nə,
də ba kʋnɩ kʋ̀nkʋ̀n máŋá mama yɩrɩ!
14 Cʋ̀gʋ̀ ba mɩ́ámɩ́án də n lɩŋa tə,
cʋ̀gʋ̀ ba mɩ́ámɩ́án,
n pa ba jɛ́n.
Kʋ dàń wá va kʋ yí lʋʋ yígúrə́ wa,
yá lɩ̀à tə mama wá lwarɩ də Yɩɩ nə yɩ pɩ̀ʋ́ Yɩzərayɛlə wa. Zɩgɩ sìí bwálɩ́.
15 Ba yàá pìí ba bà didəni nə,
ba ŋwɩ̀nɩ̀ ndə kukuri nə,
ba ga kɩkarɩ tɩʋ tə.
16 Ba yàá twá lá ba ywaŋa,
ba ma pɩ̀à wodirən sə ba də́.
Ba nə wà dí ba sú,
ba yàá ŋwɩ̀nɩ̀ wuuu, tɩa pʋrɩ.
17 À mʋ̀ wá nun à ma bɩrɩ n dɩ̀àn tə,
jɩjʋ nə, à wá bubwi à ma bɩrɩ n wʋywaŋʋ tə.
Cɩ́gá, n mʋ̀ nə yɩ à yisəgə bwálɩ́,
n yɩ à yisəgə bwálɩ́, à jɩgwarʋ dɩɩn nə.
18 N mʋ̀ nə yɩ à dɩ̀àn,
à wá dɩ gwaran à ma siən mʋ́.
Cɩ́gá, Yɩɩ yɩ à yisəgə bwálɩ́,
ʋ ga yɩ à tíú Yɩɩ tə, ʋ nə yɩ wʋywanyiən.