Yɩɩ wulə tɩa yuu wa, ʋ nə bʋ̀rɩ̀ bʋra
58
1 Gwàgá yáá tíú gwaran. «Dàn ká cʋ̀gʋ̀!» Davidə gwaran.
2 Cɩ́gá mama, á nə cɩ́nɩ́ á nii, mə á swɩ̀n cɩ́gá nə?
Ləzoni-ba, mə nətʋ nə á bʋ̀rɩ̀ bʋra kʋ twá cɩ́gá nə naaa?
3 Ɔn ɔn, á yɩ á sɩnɩ á tʋŋa kʋ̀nkʋ̀n yìə̀n,
á mʋ̀ nə pɩn wʋlʋŋʋ sú lʋʋ nii tə wa.
4 Wʋlʋnyɩna yɩ ləzwənlwana,
kʋ nə zɩgɩ ba lɩrʋ dɩɩn mama.
Kʋnkʋna tə də zʋa yokʋkwɩnan wa,
máŋá tə ba nuu nə zə́n ʋ lɩra ba.
5 Ba nii sʋ̀ràn yɩ ndə dən cwan nə.
Ba tʋŋa zɩbaniu ndə dəkwaa zɩɩn nə ba nə̀ń.
6 Ba ba vʋra sʋgʋ cʋga,
ba ma ba tankwənfwana yáá tíú də sʋgʋ cʋga.
7 À tíú Yɩɩ, kɛ́n ba yelə tə nə wulə ba nii wa,
Ba-Yígúrə́-Jə-Tiu, kɛ́n ba nipɛɛ tə nə yɩ ndə gərən nipɛɛ nə!
8 Pa ba jɛ́n ndə nɩ́á nə dəri tə kɛ̀ń!
Ta n cɩan tə n pa ba jì kwaŋa,
9 ndə kasɩla tanpanɩ nə nyɩan kʋ nyʋn tɩa,
ndə ba nə lɩrɩ bɩ̀sɩ̀ná də ʋ tɩga, ba dàn ká na yɩcaʋ.
10 Vʋʋ nəfarʋ wá jàn wʋlʋnyɩna kʋ ja kɛ̀ń,
də ba mən tə ba ba nəkəni də̀ń nə jə.
11 Cɩ́gá tíú dàń wá fwa pupwən,
ʋ nə nɩ Yɩɩ nə fwi ʋ lɩŋa tə nətʋ yɩrɩ.
Yá ʋ wá sɩn ʋ nɛɛ wʋlʋnyɩna jana wa.
12 Yá lɩ̀à tə mama wá swɩ̀n, ba wʋ́:
«Cɩ́gá mama, cɩ́gá tɩ̀án wá na ba ŋwɩ́rán.
Cɩ́gá, Yɩɩ wulə ʋ nə bʋ̀rɩ̀ bʋra tɩa yuu wa.»