À boŋə à kəni Baan Yɩɩ nə
57
1 Gwàgá yáá tíú gwaran. «Dàn ká cʋ̀gʋ̀!» Davidə gwaran. Kʋ yɩn máŋá tə wa, ʋ nə dəri Sayulə yáá nə, paan bʋʋ tə wa.
2 Fwa pubwanʋ à yɩra,
à tíú Yɩɩ, fwa pubwanʋ à yɩra!
Cɩ́gá, n mʋ̀ con nə, à kwálɩ́ à yuu.
À wá kwálɩ́ à yuu n vànà də̀ń,
kʋ ja vələ máŋá tə yobɩbɩlʋ tə nə wá kɛ̀ń.
3 À boŋə à kəni Baan Yɩɩ nə,
ʋ mʋ̀ Yɩɩ tə, ʋ nə fwa won mama zəni, ʋ pɩn nə.
4 Ʋ wá zɩgɩ lanworu tə wa, ʋ jon nə,
máŋá tə wa ləzwənlwan tə nə dɩŋɩ à kwa. Zɩgɩ sìí bwálɩ́.
Yɩɩ wá tʋn ʋ wʋywaŋʋ* tə, də ʋ cɩ́gá tə à yɩra.
5 À jə̀rə́ tə wulə də lɩ̀à,
ba nə yɩ ndə wojankadirən nə,
ba yɩ ndə gərən nə, tə nə də́ lɩ̀à.
Ba yelə yɩ ndə cwiən də cɩan nə,
ba nəndəli ga yɩ ndə kwatara sɩ̀ʋ́ nə,
kʋ nii nə yɩ fʋlafʋla.
6 À tíú Yɩɩ, bɩrɩ n dánɩ́ nə dwə lanworu tə nətʋ!
Pa n dun tə ya tɩa yuu mama wa!
7 Ba yà ken gəgəlu à cwəŋə wa,
yá à jə̀rə́ tə kwá tɩa, ka twa kʋ də̀ń ka lɛ.
Ba kʋa gwàlʋ́ à yáá con,
yá ba tətə nə pìí ba tʋ kʋ wa. Zɩgɩ sìí bwálɩ́.
8 À tíú Yɩɩ, à bɩcan dàn, à bɩcan dàn!
À wá nun à ma siən mʋ́.
9 Zàn dwiən nə, à pubʋŋa!
Zàn dwiən nə, à bànʋ́ də à kwànʋ́!
Cɩ́gá, à mɛ sə à zɩ̀n tɩbɩlakʋnʋ dwiən nə.
10 À wá siən mʋ́ lʋʋ dwíə́ tə titəŋi wa, Yuu-Tiu!
À wá dɩ gwaran à ma siən mʋ́, dwíə́ nəkaran* tə titəŋi wa!
11 Cɩ́gá, n wʋywaŋʋ* tə dɩ̀gà kʋ yí lanworu wa,
n cɩ́gá tə ga dɩ̀ ka yí bakwan tə.
12 Ooo À tíú Yɩɩ, bɩrɩ n dánɩ́ nə dwə lanworu tə nətʋ!
Pa n dun tə ya tɩa yuu mama wa!