Càn nə yí lìù ʋ ga boŋə ʋ kəni Yɩɩ nə
56
1 Gwàgá yáá tíú gwaran, ba nə nuŋə də gunpwənə kori, kʋ nə ba naŋa zənzən. Davidə nuŋə, ʋ nə dɩga máŋá tə wa, Filisi tɩ̀án nə jɩn wá Gatə nə.
2 À tíú Yɩɩ, fwa pubwanʋ à yɩra.
Cɩ́gá, lɩ̀à púə́ à kwa ba dɩŋɩ.
Dɩɩn mama, ba yàá tɛ nə, də ba fɩfɩn nə.
3 Dɩɩn mama, lɩ̀à tə nə bʋlɩ à nə,
pwí à kwa ba dɩŋɩ.
Yɩɩ tə n nə wulə tə mɛ yuu wa,
ba dáá zənzən, ba nə tɛ ba zɩga à nə.
4 Yá dɩɩn tə fən nə jə nə,
n mʋ̀ jɩɩn wa nə, à yàá yá à tɩ̀àn.
5 À bwɩ Yɩɩ nə, ʋ sʋgʋ tə yɩrɩ.
À yá à tɩ̀àn Yɩɩ jɩɩn wa, fən kʋ́ʋ̀ ba nə jə.
Bɛ̀ɛ̀ nə ləzwənə wàá nə ʋ fwa?
6 Dɩɩn mama, ba lwànɩ́ à nii sʋ̀ràn,
ba pubʋŋa nə yɩ, sə ba tʋn lwanɩ à yɩra.
7 Ba yàá vʋrɩ duən nə, ba mɩ̀nɩ̀ nə,
də ba twarɩ à nɛɛ,
sə ba lɩ à mɩɩ.
8 À tíú Yɩɩ, ba wá tʋn cʋna təntə mama,
n ga yá n pa ba jɛ́n naaa?
Pa n lɩŋa tə cʋ̀gʋ̀ lɩ̀à təntə.
9 N mʋ̀ gàlɩ̀ nɛɛ tə nii, à nə twá lá à ywaŋa.
Lòní à yinɩa tə, n kə n púrí wa.
N wà tə pʋ́pʋ́nɩ́ n sagɩ tə wa naaa?
10 Dɩɩn tə à nə wá bon mʋ́,
à dʋŋa wá pìí də ba kwa.
À yə̀ə́ də Yɩɩ wulə də nə.
11 À bwɩ Yɩɩ nə, ʋ sʋgʋ tə yɩrɩ,
à bwɩ Ba-Yígúrə́-Jə-Tiu nə, ʋ sʋgʋ tə yɩrɩ.
12 À yá à tɩ̀àn Yɩɩ jɩɩn wa, fən kʋ́ʋ̀ ba nə jə.
Bɛ̀ɛ̀ nə ləzwənə wàá nə ʋ fwa?
13 Ooo à tíú Yɩɩ, à mɛ sə à tʋn kʋ tə,
à nə poli nii də mʋ́, à pa kʋ sú.
À wá tʋn yìə̀n à pa mʋ́,
tə nə bɩrɩ də à yə̀ə́ jwɩan.
14 Cɩ́gá, n jon nə tɩan jɩɩn wa.
N cɩ̀gà à nə, à dàń ka tʋ,
sə à ga wànɩ́ à va n yáá con, mɩɩ poni wa.