Bɛɛ tə ba nə gɩgarɩ ba dʋgʋ yɩjʋnɩ
55
1 Gwàgá yáá tíú gwaran, ba nuŋə də gwaran zɩla, ba nə san də ŋoni. Davidə bʋra.
2 À tíú Yɩɩ, guni n zɩɩn, n cʋgʋ à yɩjʋnɩ tə,
dàn ká səgə à yáá nə, də à nə lòrì n sáŋʋ́.
3 Cʋgʋ à sʋgʋ zəni, n ga le nə!
À twá lá à ywàŋá tɩa mama,
də à sìrì, twara ga jə nə,
4 à dʋŋʋ bagʋ tə,
də wʋlʋnyiən fɩfɩan tə yɩrɩ.
Cɩ́gá, ba pɩn yobɩbɩlan yí nə,
ba ga tɛ nə də lɩŋa.
5 À bɩcan súə́ də fən,
yá tɩan fən jə nə zənzən.
6 Fən də vɩvagʋ zʋa nə zənzən,
kʋ pa à didigə.
7 À dàń swɩ̀n à waa con, à wʋ́:
«Aaa! À yà nə jə vànà ndə gunpwənə vànà nə,
à yà wá piri à va à ya bwálɩ́ don nə.
8 Nə̀ń, à yà wá dəri à va yiŋʋnɩ,
à va à ya kasɔɔ lanworu wa. Zɩgɩ sìí bwálɩ́.
9 À yà wá pɩ̀à bwálɩ́ lala à ya lá,
dwavʋʋ nəfarʋ tə yɩrɩ.»
10 Yuu-Tiu, gugurə à dʋŋa tə pubʋŋɩ,
sə ba dàń ká nì duən kwərə!
Cɩ́gá, à na wʋlʋŋʋ də jara tɩʋ tə wa.
11 Tɩtɩn də yɩcaʋ, tə mʋ̀ nə kɩkarɩ biritaŋʋ tə.
Kʋ̀nkʋ̀n yìə̀n, də tʋtʋnkʋkwɩnan wulə tɩʋ tə wa.
12 Lagʋrɩ wulə kʋ wa,
ŋwɩrɩ də gɩgɩra ga ba kʋ kanpwərən tə wa kwɛ̀.
13 Cɩ́gá, kʋ tà dʋŋʋ nə twɩn nə,
kʋ yà nə yɩ dʋŋʋ, à yà wá pɩ́án.
Kʋ tà lìù tə nə culi nə, nə zàn ʋ zɩga à nə,
kʋ yà nə yɩ nətʋ,
à yà wá səgə ʋ yáá nə.
14 Yá kʋ yɩ n mʋ̀ lìù tə, n nə yɩ à nyandon,
à fàrʋ̀, à nə yə̀ə́ mʋ́ zəni!
15 À də mʋ́ yà nə swɩ̀n dabarɩ sʋ̀ràn,
nə mʋ̀ yà nə twá duən
nə vəli Yɩɩ dìə̀ tə wa.
16 Yɩɩ wá pa tɩan dɩ̀ à dʋŋa yuu,
ʋ pa ba va ciru* də ba nəŋə.
Cɩ́gá, wʋlʋŋʋ súə́ ba bɩcanɩ,
wʋlʋŋʋ wulə ba titəŋi wa.
17 À mʋ̀ boŋə à kəni à tíú Yɩɩ nə,
yá Ba-Yígúrə́-Jə-Tiu wá jon nə.
18 Jɩjʋ, də yɩcaʋ, də didəni,
à yàá caga, à ga sìrì,
yá Yɩɩ nì à kori.
19 Ʋ jon nə kʋ̀ʋ̀ tə wa,
lɩ̀à kapʋpʋ yà nə tɛ ba zɩga à nə,
ʋ ga pa nə bɩcan sìə́.
20 Yɩɩ wá nì à kori,
ʋ ga pa ba də́ cavɩra.
Ʋ mʋ̀ nə yɩ pɩ̀ʋ́ máŋá mama wuuu. Zɩgɩ sìí bwálɩ́.
Ba mʋ̀ lɩ̀à təntə wàrɩ̀ ba lwànɩ́,
ba ba Yɩɩ fən dəri.
21 Ʋ mʋ̀ lìù tə pìí ʋ mà ʋ dabara tə,
ʋ də ba yà nə wulə duən nə, də bɩcan sìə́.
Ʋ pìí ʋ cʋ̀gʋ̀ ʋ nimarʋ tə.
22 Ʋ nii sʋ̀ràn ywán kʋ doni tʋ̀ràn,
yá kʋ̀ʋ̀ pubʋŋa nə wulə ʋ bɩcan wa.
Ʋ nii sʋ̀ràn bwànà tə doni nʋga,
yá tə yɩ ndə ba nə cʋrɩ sɩ̀án ba lɩ.
23 Yá n yojanʋ tə Ba-Yígúrə́-Jə-Tiu jɩɩn wa,
yá ʋ wá san mʋ́,
ʋ bá yá cɩ́gá tíú, sə ʋ də́ càn də mama.
24 Yá n mʋ̀ Yɩɩ wá pa lɩ̀à təntə tɩ,
ba zʋ libəri wa.
Ba mʋ̀ lagʋra tə, də gɩgɩrɩnyɩna tə
bá ya lʋʋ wa, ba mɩɩ tə faan tətə,
yá à mʋ̀ yá à tɩ̀àn n jɩɩn wa.